Okatomeno komOndangwa otaka etitha oonkondo

0
24

■ Maria Namupala

ONDANGWA – Konima yomitumba odhindji dha ningwa pokati kelelo lyondoolopa yaNdangwa oshowo Meat Board noSPCA, omolwonkalo yokatomeno ndjoka ya kala ya nayipala uulethimbo, okwa tseyithwa kutya onkalo ngashiingeyi otayi nuwa omeya.

Omunambelewa goMeat Board John Uutoni naWilmarie Horn a kalela po Oshana SPCA, oya li ya ningi natango omakonaakono opo ya tale ngele onkalo yokatomeno oya lunduluka. “Out uvite etumba okumona onkalo yokatomeno pethimbo ndika, notwa pandula elelo lyondoolopa, molwomalunduluko ngoka lya eta po,” Uutoni ta ti.

Okwa li kwa gandjwa elombwelo elelo lyondoolopa li longulule nokwoopaleka okatomeno kawo, molwaashoka onkalo yiimuna oya li tayi etitha ohenda, noka kala eipulo enene koshikondo shuutomeno moshilongo.

Uutoni okwa ti oya li ya nongele kutya ehala moka hamu kalekwa iimuna eshona unene, nolundji ihayi vulu okwiinyenga, nohamu kala owala iimuna yomuntu gumwe omolwa uushona wehala.

Ta ti omw ali mu na ongombe yimwe tayi ehama noya li ya tumu ndohotola gwiinamwenyo opo e yi yakule, noya gandja elombwelo kumwene gwayo opo e yi dhipage manga onkalo inaayi nayipala, omeya nago ohaga kala taga kanda omapunya kiinamwenyo mbyoka ya edhililwa moka.
Shimwe shomonkalo ndjoka a holola sha nayipala, onkene iimuna hayi dhipagwa, ohapu longithwa omukalo omwiinayi moka hayi mangwa nongodhi nohayi tetwa nombele, omikalo ndhoka tadhi longithwa kadhi li pethimbo nopashinanena.

Okwa konekwa woo kutya mehala moka omwa kaka noonkondo nomwa pumbwa esiloshimpwiyu , molwaashoka ohamu kala tamu nika oombinzi ethimbo kehe. Ta ti Meat Board ina mona iifuta okuza kokatomeno hoka, ko inaku tumwa omukanda okuza mo2012.

SPCA okwa li a gandja elombwelo kelelo lyondoolopa opo kaaya longithe we okatomeno hoka kopakathimbo manga taya opalekulula hoka ke li pamuthika, nokeli monkalo ombwaanawa.

LEAVE A REPLY

Please enter your comment!
Please enter your name here