Omakondombolo osho ga li ehete pOluno

0
42

Maria Namupala

ONDANGWA – Ngaashi hawu longekidhwa omumvo kehe oshikondo shezulonkalo lyoondolongo nonuumvo osha li shu unganeka ethigathano lyuudhano, moka oosipana dha za kiitopolwa ya yooloka hadhi thigathana po,

Uudhano mbuka owa dhanenwa pokapale koondholongo wa tamekele Olyomakaya nowa fumvike onkolo osoondaha mpoka omakondombolo ga li taga li ehete moshili, nopwa li iiti tayi teka, wonuumvo oomboka haku ti kapwa li mwali ta tumbu mukwawo.
Osipana yoTown Boys oyu ulikile oosipana adhihe ndhoka dha kutha ombinga muudhano wetanga lyokoompadhi komutse gondjamba noya yambulapo ekopi, oshimaliwa shooN$6500, oshowo oombandi odhindji.

Osipana ndjoka oya yambukile mondoolopa yaNdangwa nomedhingoloko lyahugunina opwa li iiti tayi teka, molwaashoka kehe gumwe okwa li a hala a faalele okapandi oshowo ekopi kaandjawo.

Kakele ketanga lyokoompadhi uudhano owa kwatela mo ngaashi etanga lyomokambamba, ovolleyball, moka mwa kuthwa ombinga koosipana dha yooloka dha za koombinga noombinga dhoshilongo ashihe.

Omukwatakanithi gokomitiye ndjoka hayi longekidha uudhano mbuka omumvo kehe Festus Hamukwaya, okwa yelitha kutya endiki lyawo otali lalakanene okuyambula po omuthika gomaudhano goludhi kehe monooli yoshilongo, nokweeta aadhani pamwe, yo taya yambula po uunongo nokuulika omaunyakwa gawo muudhano kehe.

“Uudhano mbuka wetanga lyokoompadhi owa kuthwa ombinga koosipana 13, wetanga lyomokambamba owa kuthwa ombinga koosipana hamano omanga ovolleyball ya kuthwa ombinga koosipana ntano (5)”, Hamukwaya ta ti.
Hamukwaya okwa ti ethigathano ndika lyuudhano olya etwa poshitaafula sho ewiliko lyendiki lya mono shoopala okuhanganitha aadhani ya za kiitopolwa, kumwe woo nelalakano lyokunyanyukilwa pamwe, nokutala nkene aadhani yalwe haya dhana omaudhano ga yooloka.
Konyala momaudhano agehe omwa kuthwa ombinga koosipana dha za woo mendiki, ndhono hadhi idheula Etitatu kehe, ndyono olyo lya talika ko esiku lyomaudhano mendiki.

“Ngaashi twe shi tumbula metetekelo kutya otatu lalakanene okuyambulapo omaudhano monooli yoshilongo otwa koneke kutya uudhano wetu mbuka wokomumvo otawu ende tawu koko omumvo kehe, nongele to tala uudhano wetu wotango owa li owala wa kuthwa ombinga koosipana oonshona ashike shoka inashi tu tulitha omutse kepepe, otwa pula owala komeho,” ta popi ngaaka.

Okwa tsikile ko kutya omaudhano oshinima sha simana moshigwana, shono hashi tidha po ethindakano lyomadhiladhilo, hashi nyanyudha omuntu, nokulundulula oonkalamwenyo dhaantu pamikalo odhindji dha yooloka, ta ti uudhano ohawu nyanyudha aantu yo taya kala ye na ombili yokomwenyo.

Oosipana dhilwe ndhoka dha sindana ongaashi Fresh Ideas ye ya puutiyali metanga lyokoompadhi tayi pewa oshimaliwa shooN$ 4500,oshowo osipana yOluno ya mono ooN$ 3000, metanga lyomokambamba, osipana yOluno Angeles oyo ye ya kadhenga tayi mono ekopi, ooN$ 2500, Brave Lions e ya puutiyali ta mono N$ 1500, omanga COBRA e etelele okano.

Movolleyball osipana yo-DAPP VTC oye ya puutango noya sindana oshimaliwa shooN$ 2500, Keetmanshoop a sindana ooN$1500, nOluno lolwene lwe etelele okano. Oosipana odha li tadhi dhana neitulemo molwaashoka oya li taya kondjele esindano ndyoka lyi na okapandi koshimaliwa oshowo omangano ogendji mwa kwatelwa nogaadhani.

Ovolley ball oya sindanwa po kospana yo Shaaya Club ya mono N$ 2000, omanga Namibia Airport Company e ya puutiyali noya pewa N$1500, nospana ya yambukile ko Grootfontein ye etelele okano.

LEAVE A REPLY

Please enter your comment!
Please enter your name here