Ombala ndjoka ya li ya tungwa mombuga pethimbo lyuukoloni

0
22

■ Komutoolinkundana

WINDHOEK – Mombuga yaNamib Desert, omu na ehala tali ithanwa Duwisib Castle, ndyoka lyi li ngashingeyi ehala lyoshinanena lyaayenda nolyi li momake goNamibia Wildlife Resorts (NWR). Shoka ihaashi popiwa olundji osho shoka kutya osha enda ngiini ocastle ndjika yi kale ya tungwa momudhingoloko gwaMaltahohe. Olya li lya tungwa kuHansheinrich von Wolf nomukulukadhi gwe omugundjuka gomuAmerica.

Von Wolf okwa li omunambelewa metanga lyegameno lyuukoloni lyaNdowishi, nokwa li a tumwa moNamibia, shoka sha li nale hashi ithanwa German South West, petameko lyomumvo 1905 opo a gamene oshitopolwa shika shaNdowishi pethimbo lyaaHerero taya ikanyuna uukolononi mbuka, okwa li a pewa nokuli oombandi molwuupendafule we. Niitya yimwe, Von Volf moNamibia okwa thiki mo pethimbo lyomadhipago ganyanyaleka gAaherero nAanama kAandowishi pokati komimvo 1904-1908.

Mo 1906 Wolf okwa li a lemanekwa molugodhi lwawo nAaherero, nokwa li a pewa epitikilo a shune koNdowishi, moka a li e shi pondola mokuhila Javta Humphreys, okamonagona komukalipondjayi gwaAmerica moDresden.

Von Wolf okwe mu lombwele nkene South West Africa e na oompito odhindji, tashi popiwa kuHarald Nestroy, ngoka a li nale omukalelipo gwaNdowishi nomunyanyangidhi gwoshinyolwa Duwisib: A German castle in Namibia and its master Hansheinrich von Wolf. Humphereys okwa li omulondi gwoonkambe dhingi, onkene inashi pula ondjila onde oku itaala. Konima owala yomasiku omashona mondjokana yawo, oya li yi idhenge ondjila yomefuta nokuya koshitoplwa shika sha li tashi kolonyekwa kuNdowishi, moka ya tameke okwiikunditha omalelo ge ya pitike ya lande evi enene.

Konima sho ya landa evi koDuwisib, oya li ya kutu Wilhelm Sander, ngoka a li omutungithaneki ngoka a li a kwathele mokufoloma po omatungo gatatu omanenene moWindhoek, moka omo mwa li unene aakolonyeki, opo e ya ndulukile egumbo ndyoka ewanawa nolya kola kaaku na we, moshitopolwa moka oomvula ndatu dh aka pitile Von Wolf naakwiita yakwawo yaNdowishi ya li ya dhenge nokweehameka mboka ya li taya kondjitha uukoloni wawo.

Evi ndyoka lyolwaala olutiligane olya li lya fulwa ookilometa mbali okuza mpoka tapu tungwa, ashike iinima yilwe ayihe oya li ya zi kOndowishi okuya ketuliloskepa lyaLuderitz. Okuza koLuderitz, iilongitho oya li ya tumwa kuuzilo neshina lyokolutenda koAus, moka aahingi ya li taya longitha omatemba taga nanwa koonani 20 uule woomvula mbali okuyelula nokufala kocastle ookilometa 215 muumbangalantu, shi ikwatelele kuuyelele wu li moThe Namibian. Mokuyambidhuidhwa kaanaumanya yaaItaly naahongi yiiti yaaSweden , ombala oya li ya pu okutungwa muule woomvula mbali.

Olweendondjila lwa Hansheirich von Wolf oya li ya hulu nolugodhi lwoSomme. Ehala mpoka pwa li pe na o castle, nando ka li ki ikalelela, oya li pamuthika gwuuyuni, Nestroy ta ti. Von Wolf okwa li a nongela nawa kutya omudhingoloko nguka ogwa henukwa komukithi hagu dhipaga oonkambe nogwa li hagu dhipaga oonkambe okuza moWindhoek wa thinda kuumbangalantu, nokwa li a dhiki po oshigunda shoonkambe dhi li konyala 350 muule ashike woomvula mbali. Okwa li wo gumwe gwotango gwaanafaalama okumuna oludhi lwonzi talu ithanwa Karakul, ndjoka hayi ithanwa oshingoli oshiluudhe. Momumvo 1911 sho tuu tagu koloka, ye oku na iimuna yi vule po 8500.

Uuna a li a ta pumbwa efudho miilonga ye yuunafaalama, von Wolf okwa li ha nukile mokatemba taka nanwa koonkambe hamano nokuya komukunda gwedhina Maltahohe, Roger Webster osho a shanga moshinyolwa she The Illustrated Fireside: True Southern African Stories.

Shi vulithe poshikando shimwe, okwa li ha nyanyudha aantu mondingosho, moka a li ha yaha omakende gatano nondjembo ye, moka oholo ontihamano hayi kala ya nuninwa elamba. Okwa li ha futu omuyonena nguka, Webster ta nyola ngaaka.
Aahokanathani oyendji aape itaya idhidhimikile okukala momithitu, ashike
Jayta okwa li omukulukadhi e hole omaudhano, nokwa li taya tsu ya thithe nomusamane gwe. Ashike ngele tashi ya kokuyaha, kakwa li naana e shi shi nawa. Esiku limwe ongula yaMaalitsa go1908, ye nomusamane gwe oya li ya yi molukongo lwiiyamakuti. Jayta okwa li a yaha okadhila kotango okanene hoka a mono, nokwe ke ka yotha. Sho omusamane gwe a galuka, a sa ondjala ye okwa tsimagala, okwe mu pe a lye okadhila pamwe nolushi nomakunde. Ashike onyama yokadhilahaka oya li ye mu ende nayi. Okwa gandja po onyama yekola ndika lya yothwa kookatali ye, ashike nayo oya li inaaye yi hala, osho Harald Nestroy, omukalelipo gwaNdowishi moNamibia nomunyanyadidhi gwa Duwisib: A German castle in Namibia and its master Hansheinrich von Wolf a shanga.

Aahokanathani mbaka yaali oya li ya tula ko oshigongoti koshiningwanima shika. Oya li ya tsikile okutunga nokumana konima ashike yomvula yimwe, omolwa ekwatho ndyoka lya za kuJayrta omolwa uuyamba wezimo lye, Nestroy ta ti. Oomvula dhi li ntano dha landula, ondho oomvula dha li dhenyanyu kuyo, oshoka oya li taya tyapula onkalamwenyo yawo kokule nakehe gumwe nokumuna oonkambe dhawo noonzi moondundu ndhoka dhi na omano kamana dhi li komunkulo nombuga.

A valelwa moDresden mo 1873, Von Wolf okwa li omwanamwati gomukwiita, ashike ngaashi hashi tothwa mo olundji, ka li oshipuna. Mepipi lyomimvo 17, okwa li a wayimine etanga lyegameno lyaRoyal Saxon Army, moka a li a yelwayelwa mbala poondondo dha yooloka sigo ta adha ndjoka yuucaptain.

Okukala kwawo muAfrica kwooVon Wolf okwa li kwe ya pehulilo lwanima sho Kaiser Wilhelm 2 a li a unganeke ongundu yetanga yegameno yaNdowishi muJuli 1914. OoVon Wolf oya li ya thigi po Duwisib niinima yawo ayihe nokuya koHamburg. Nosha li osho oshikando shahugunina ya tsa okacastle hoka omeho.Von Wolf okwa li a tumbalekwa noshishani shoIron Cross mo 194 konima sho a li a tula aakwiita aaBritain miipandeko oye awike molugodhi lwaYpres. Ashike elago lye olya li lya adha okwena kwa thita sho a li a onithwa oshiponga molugodhi lwaSomme sho a li a ongotele momasiku ga- 4 Sepetemba 1916, mepipi lyomimvo 43.

Omuselekeadhi Von Wolf okwa li a hombola omunadiplomate, ashike inaya kalelathana. Momimvo dho 1930, sho epangelo lya Ndowishi lya li tali yaga kegonga, okwa tembukile koSwitzerland, nalwanima okwa tembukile koSummit, New Jersey, moka a li a manene oondjenda mo 1963.

Konima yiita yotango yuuyuni, ocastle niinima ayihe oya li ya landithwa po kezimo limwe eSweden, mboka nayo wo ya li ye li landitha posha landula iita iitiyali yuuyuni. Mo 1979 ocastle oha li ya kolekwa onga ehala lyoshigwana kepangelo lyuukoloni lyaSouth Africa. Konima yemanguluko, epangelo ndika olya li lya gandja ehala ndika kepangelo lyaNamibia, ashike inashi kwatela mo ofaalama ayihe ndjoka ya li ya kooVon Wolf. ODuwisib sigo ongashingeyi oyi li miikaha yopaumwene noyi li ofaalama yaatalelipo. – Shika osha shangululwa shakuthwa unene moshinyola sha OZY noonzo dhimwe po tuu.

LEAVE A REPLY

Please enter your comment!
Please enter your name here