Omuthigululwakalo otagu hwahwameke ngiini ehumokomeho?

0
45

Dr Sam Nujoma

Ondi uvite etumba okukala nda hiywa koshiithanene shika oshiwanawa shOshituthi shOmagongo mpaka pOnalushwa, pombala yoshilongo shUukwaluudhi. Oshituthi shika shomagongo osha kwatelwa mo momusholondondo dhomithigululwakalo itaadhi gumwa dhuuntu womuntu poshimbo yomutumba omu-10 gwoIntergovernmental Committee for Safeguarding of the Intangible Cultural Heritage ngoka gwa li moWindhoek mo 2015.

Onkene, onda pulwa ndi tye ko sha niitya iifupi kohi yoshipalanyolo: Ehumokomeho Okupitila Momuthigululwakalo.
Mokwiipula oshipalanyolo shika, epulo lyotango ndyoka nda hala okuya muule walyo olyo ndi: Omuthigululwakalo oshike, notagu longithwa ngiini okuhwahwameka ehumokomeho lyaantu yontumba nenge yongandi?

Ngaashi naana atuheni tu shisheni, omuthigululwakalo ogwa kwatela mo omaitaalo, omaihumabato, iiningwanima osho wo omaukwtya ngoka taga adhika mongundu yaantu yontumba. Omuthigululwakalo ogwa talika ko onga ehukamugongo meilongo lyaantu, mwa kwatela iinima oyindji mbyoka hayi taambathanwa okupitila momakwatathano gopauntu niilonga yawo. Shika osha kwatela mo uunkulungu, oongalo, oondanisa, omaitaalo, uutekinika ngaashi elongitho lyiituulusa, okuteleka, omalukalwa nomizalo.

Okupitila momithigululwakalo, aantu noongundu dhaantu ohaya ohaya itala ko nokwiihumbata ngaashi shu uthwa komaitaalo gomuthigululwakalo ngoka nokugandja wo koshigwana. Edhiladhilo lyomuthigululwakalo omukwakugumwa oya kwatela mo ngaashi uutekenika, okuthaneka nuunkulungu, omanga edhiladhilo lyomuthiguulwakalo omukwaakugumwa lya kwatela mo iinima ngaashi omaitaalo, omadhilaadhilo, uunamambo (wopakana nuunyolwa), nuungomba.

Oshitopolwa oshitiyali shepulo lya simanana otashi tala nkene omuthigululwakalo gwa pambathana nenge tagu endeleleke ehumokomeho. Monkatu ndjika, ehumokomeho otali fatululwa nokundjandjukununwa okupitila miinima oyindji ngaashi ehumokomeho, ekoko, etaandelo nenge enenepeko, mbyoka ayihe tayi ulike okupula komeho.

Onkene otema “okuhwahwameka ehumokomeho okupitila mokukaleka po omithigululwakalo dhetu oonkwaakugumwa” oya pumbwa opo tu hadhe omikalo ndhoka tadhi kwatele mo ooelemente adhihe dha tumbulwa pombanda mopolohalama yetu yehumokomeho. Shika osha kwatela mo oohandimwe, omikunda, omalelolo gopaikandjo nogopaitopolwa osho wo pamuthika gwopashigwana montalelo yoNational Development Plans.
Onkene otapu gandjwa omuthindo kutya ekalekepo lyomuthigululwakalo ihagu , gwo inagu huulila momandhindhiliko gokudhimbulutha nomokugongela iinima mbyoka tayi ulikwa moongulu dhomaulikilo. Osha kwatela mo wo omihingo osho wo omaihumbato gen a omwenyo ga thigululwa okuza kaakulu yonale nokupewa aathigululi. Onkene, ekalekopo lyomithigulukwalo oshinima sha simana mokuhinga ehumokomeho moshipala shomuuyuni. Euveko lyekalekopo lyiigwana ya yooloka ohali kwathele pokuinikathana komilungu pokati komithigulwakalo dhayoolokathana, nokukumika okusimaneka omikalo dhayakwetu yalwe dhonkalo.

Taku talwa kwaashoka sha popiwa pombanda, otwa pumbwa okutaamba ekalekopo lyomithigululwakalo, nekalekopo lyoonkalo dhetu dhonkalamwenyo. Mpaka opo nduno oshiindingili shika shokudhana nokutanga omagongo tashi yelula oshipala, molwashoka, okuza komuti gomugongo, Aawambo ohaya mono mo omuzile, oongongo, oshinwa, omagongo, omagadhi goongongo nosopa. Ongashikwawo, omafo omatalala gomugongo otaga vulu okulongithwa mokupanga omukolo, notashi eta opo Aawambo ya kale ye na onkalo ya pamba nokuidhingilila komuti nguka pamikalo odhindji.

Onkene itashi kumitha sho omihoko hetatu (8) dhAawambo dha kambadhala okumona oshinima shoka she ya pamba ayehe opo ya dhane ekalekopo lyomuthigululwakalo, oya kutha ethimbo lyomagongo, nomagongo ongoshituthi shoka tashi taambathanwa mokati kawo.
Ohungi oya li oshinima sha simana moonkalamwenyo dhaakwashigwana mokugandja omithika dhopamuthigululwakalo kepupi eshona. Onda panda sho nda nongele kutya omwa li mu na ohungi ongulohi, naanongononi yetu yopankalathano oya gandja uunongo kaagundjuka. Ashike, otashi etitha ohenda sho aavali oyendji ihaya hungile naanona, ashike ohaya longitha ethimbo lyawo olindji taya longitha nayi iikolitha poondingosho, unene tuu ootate.

Netompelo ndino, oshigwana oshishona otashi kotha mo nokwiidhimbitha esimano lyoku lyokutaamba ko omithigululwakalo dhetu omolwa okwaapukululwa opo ya tseye kutya oyo oolye, oya za peni, naampoka yuuka. Shapo oye li ashike koosocial media, moka olundji taya ningi omakwatathano naantu kaye ya shi, osho wo omaihumbato taga teya. Natango otashi limbilike kutya ope na aantu yalwe mboka ye tonde iikulya yawo yopamuthigululwakalo ngaashi omboga, oshigali, oshikwiila, omagungu, omwayi, nontaku nokusimaneka mbyoka ye etwa mo moshilongo.

Iikulya mbika yanakanena kayi li paushitwe, oya pombelwa, onkene hayi eta omaupyakadhi guundjolowele. Aakuluntu yetu oya li ye na uundjolowele noonkondo, omolwa ehogololo lyawo lyiikulya mbyoka haya li, mbyoka olundji iikulya yetweni yopamuthigululwakalo mbyoka ya mena nokukoka paushitwe.
Omagumbo getu gopamuthigululwakalo oga li taga yamukula kuukwatya womidhingoloko dhetu. Kashi shi oshidhigu wi ipule nkene omagumbo ngoka gopamuthigululwakalo ga li taga gandja nokukale ka po onkalo ombwanawa. Taga eta okautalala pethimbo lyuupyu, notaga gandja uupyu pehimbo lyuutalala.

Onkene natu tsikileni okukwatela mo omikalo ndhika dhokutunga momikalo dhanakanena. Shika itashi humitha ashike onkalo yetu komeho, ashike otashi kwathele woo okushunitha oondando pevi, nokulongitha iitungithi mbyoka yi li mokati ketu. Onda nyakukwa sho pe na omadhiladhilo omawanawa gokupendula po ekalekopo lyomithigululwakalo noshituthi shika shomagongo nayilwe ngaashi euliko lyomazimo lyoTotem Expo, Olufuko nayilwe otayi kwathele mokutaamba ko elalakano lyetu ndika lyopandjokonona lyopashigwana.

Onkene pitikeni ndje opo ndi gandje olupandu lwandje lwa sheywa nokupupula kombunda Elelelo lyopamuthigululwakalo lyUukwaluudhi, nokondandalunde Omusimanekwa Tatekulu Josia Shikongo Taapopi, Omukwaniilwa Gwelelo Lyosholongo shUukwaluudhi sho a li a unganeke oshituthi shika shomagongo nelalakano lyokuhwahwameka ehumokomeho okupitila momuthigululwakalo .
Ngashikwaswo, nandi kombe kombunda okangunduwiliki ke li mewiliko lyomunashipundi Omusimanekwa Leevi Katoma molwomailongekidho omawananwa nokuninga oshiindingili shonena oshisindani.

Ngaashi nde shi popi iikando yontumba, oshigwana shaa na omuthigululwakalo osha fa omuti gwaa na omidhi. Onda hala okukumika aaleli yetu yopamuthigululwakalo ya tsikile nokupopila ekalekopo lyomithigululwakalo dhetu nokunwetha mo omihingo ndhika maagundjuka yetu opo tu tunge po oshigwana shi na omwago.

• Shika osho oshipopiwa shOmukokoliplesidente ye oye He yOshigwana, Dr. Sam Nujoma, pepatululo pambelewa Oshituthi shOmagongo on 26 May pOnalushwa, moTsandi, mUukwaluudhi.

LEAVE A REPLY

Please enter your comment!
Please enter your name here