Ongundu Swapo ya patulula osikola mOshikoto

0
197

■ Obrein Simasiku

OMUTHIYA – Ongundu yopolitika Swapo oya patulula pambelewa osikola yawo oshiwike sha zi ko poshigongiilonga shoka sha li mondoolopa Omuthiya nosha li sha endwa kiilyo yongundu ndjoka moshilongo ashihe.

Oshigongiilonga shoka osha li shi na enenedhilaadhilo lyokundungika nokulonga aayendigongi mboka kombinga yoompango, omaihumbato noshowo oohedhi dhosikola ndjoka.

Osikola ndjoka ya patululwa moshilongo momumvo 2016 nelalakano lyokumuna aalanduli yongundu, mboka ye na omikalo koonono mboka taya vulu okukala ya landula oohedhi dhongundu ndjoka mondjila nodhuuka mokulela.

Ta popi pepatululo ndyoka omuhwahwameki gwongundu ndjoka moshitopolwa shaShikoto, Armas Amukwiyu, okwa lombwele engathithi ndyoka lya li lya gongala kutya aakwaSwapo yomoshitopolwa shoka oye li ya pikwa komukithi gwuutondwe noshowo omatopokauko.

“Out na ondjokonona ndjoka mongundu na ngele inayi talwa neho lyolukeno nena shoka otashi ka tengaukitha ongundu nokuteya po uukumwe. Oto adha nduno aakwaSwapo mboka yamwe itaya popithathana, otaya ka longa nuudhiginini ngiini ngele itamu popi, otwa pumbwa omiti dholela opo tu kandulepo omukundu nguka. Osha pumbwa okuhula po meendelelo,” osho Amukwiyu a popi ngaaka nomuthindo.

Moshinima sha faathana omuhwahwameki gwoshikola ndjoka gwopashigwana Dr. Charles Mubita ngoka woo a ulike aalongi okwa dhimbulukitha aakwaSwapo kutya kapu na ngoka e vulithe po puyakwawo moveta yongundu ndjoka nonande oku kala e na opoosa yili pombanda, ta ti aantu ayehe oye thike pamwe.

Mubita okwa ti kutya ope na mboka ye li mongundu ye na ooposa dhi li pombanda nohaya ihumbata ye wete ye vule iilyo yongundu yilwe.
Onkee Mubita okwa ti kutya iilongwa mbyoka tayi gandjwa mosikola moka oya simana notashi ka kala tashi longwa kehe oshilyo.

“Shino oshilongwa shokulela, na ngele ino shi longwa owu na ompito yaandjuka okukala ino kutha ombinga momahogololo gongundu nenge gwopayitopolwa nenge yopashigwana oshoka ino adha omuthika ngoka gwa pumbiwa okukala wa kutha ombinga,” osho Mubita a yeleke ngaaka.
Mboka taya ka kala taya yi kosikola ndjoka ngele ya mana okuhita ootundi ndhoka nena otaya ka pewa oonzapo dhoka ya ilongela.

“Elalakano lyetu okukulundulula mpoka wu li pamuthika gwopolitika e to ihumbata pamukalo ngoka. Onkene tse ongaaleli otu li kumwe twa hala okuhanagula po omutondi,” osho Mubita ngoka a li a ende pamwe naMinista Gwegameno Daniel Kashikola a hokolola komeho woo gwomukuluntusikola ndjoka moshilongo Marco Hausiku.

LEAVE A REPLY

Please enter your comment!
Please enter your name here