Ongwediva City moompadhi dhaSimon Yamalombo

0
37

■ Shipi Elago

ONGWEDIVA – Osipana yOngwediva City oya li ya pewa nambwa muudhano wawo awuhe wehulilo shiwike lya za ko na inayi likola nando oshitsa shimwe sho oosipana dhoFirst Division dha li dhi inika komakombo.
Ongwediva City oya li ya pitilwa koMilitary School Olyomakaya ga za ko nookoola 5-2 omanga mOsoondaha ya li ya pupulwa kuGolden Bees nookoola 3-1.

Iizemo mbika oya li ya thigi osipana ndjika pevi lyoshitaafula sholiha ndjika nangele otayi dhana okalimba komakaha otayi ki iyadha tayi yalula oonyothi yu uka koSecond Division.

KK Place okwa li a toto nuupenda muudhano we wotango moka a li a dhenge African Lions 2-1 ashike oya li ya tsuwa ko iilyaalyaka kOtavi Touch & Go ngoka a li e ya pe oshipandi shookoola 4-1 muudhano wa li wa dhanwa mOsoondaha ya za ko.
Golden Bees okwa li a wo a ndopa okusindana po uudhano we wehululishiwike awuhe nokwa li ashike a sindana uudhano wumwe nokudhana shi thike pamwe muudhano wulwe.

Golden Bees okwa li a dhana 1-1 naEleven Warriors nokwa li a dhenge Ongwediva City 3-1 muudhano womOSoondaha.
Oliha ndjika otayi ulike ya kindja noosipana otadhi ningi shanamutango okutala kutya olye ta ka kutha po ehala ndyoka lya li lya thigwa po kuYoung Chiefs ngoka a li a lalekwa mo moPremier League.
Oshitopolwa shokonooli natango oshi na ompito yoku kala shi na osipana yi li koPremier league sho oliha yopombanda tayi ka tameka nonando shika otashi pula eyitulemo koosipana adhihe oshoka ethigathano oli li pombanda noonkondo nongele oya dhana siku limwe otaya ka kanda dha yama.

Osipana yokOutjo waNepando Golden Bees oyo noTouch & Go ya Tavi odho dhimwe dhomoosipana dhi na ontseyo moliha ndjika nodhi li tadhi kala endangalati mondjila yoosipana dhokonooli okuya koPremier League.
Onambula United ndjoka ya li ya tameke uudhano mbuka ya nika oombwayelo oyo ya pumbwa oku ya Golden Bees moshipala mongundu ya A opo kayi sindane po ongundu ndjika yo yi kale ashike yi na ko onkatu yimwe yi ye ko Premier League.
Oosipana ndhoka hadhi dhana moliha ndjika yoNorth West First Division odhi li 12 nodha topolwa moongundu mbali, A na B, moka oosipana mbali ndhoka tadhi ka sindana po oliha ndjika tadhi ka tegelelwa dhi ka tsakanene nokukutha po esipa pokati kookatali.
Oosipana mbali odha tegelelwa dhi ka dhane muule womalweetho ge li gaali moka ngoka ta ka sindana po uudhano mbuka ta ka mona okatekete kokuya moPremier Liha.

Onkundana ombwaanawa oyo ndjoka kutya iitopolwa yokonooli oyi li ya kalelwa po koosipana odhindji muudhano mbuka onkene ope na ompito wu ka mone oosipana mbali dhokonooli dhi itaalela medhingoloko lyahugunina.

LEAVE A REPLY

Please enter your comment!
Please enter your name here