Onkalo ya-ELCIN okuza 2011 sigo 2017

0
132
WINDHOEK, 13 May 2014 - Bishop Shekutaamba V.V. Nambala of the Evengelical Lutheran Church of Namibia (ELCIN) Western Diocese gives a keynote address at the opening of the Photo Exhibition on the 'Finnish Memories of Northern Namibia' at the National Art Gallery. The black and white photographs are donated by the Finnish Mission Museum in Helsinki to the Nakambale Museum in Olukonda in the Oshikoto Region.The picttures dipct the lives of the Finnish missionaries and the local communities in the North during the early years of the Finnish missionaries work. (Photo by: Joseph Nekaya) NAMPA

■ Dr Shekutaamba VV Nambala

Nena esiku lyowina mOngeleki ndjika yetu onkwaEvangeli paLuther muNamibia (ELCIN). Ngiika shika osho oshikando shotango, sho kwa tokolwa okwiithanwa aakwanegongalo yetu ayehe moshilongo ashihe nokombanda yasho, opo ya pulakene pamwe shoka tashi inyenge mu-ELCIN. Otwe mu hiya aaholike mOmuwa, opo mu pulakene onkalo yOngeleki yeni kutya, oya zi peni, oyi li peni, noya longo shike muule womimvo heyali dha piti po, 2011 – 2017. Osho wo okutseya mpoka yuuka.

MOshitokolitho oshiti-164.4 shEkotampango nOmauthompango ga-ELCIN, Omuwilikimbisofi oku na okweetela Elelongeleki ehokololo lyiilonga yOngeleki nomiyaluhokololo dhayo omumvo kehe. Eeno, shika ohashi ningwa. Ehokololo lyOngeleki ohali gandjwa wo mOshigongingeleki kehe uuna shi li ko. Mupya munene omahokololo ga tya ngaaka ihaga thiki momakutsi gaakwanegongalo oyendji.
Aambiisofi momumvo 2016, oya li ya shangele omagongalo niikondolonga ayihe yOngeleki omukanda gwowina: “Ekwatho komagongalo: Omukanda gwopaumbiisofi komagongalo ga-ELCIN 2016.” Walyewo ngele omukanda ngoka ogu shiwike mo tuu momagongalo getu. Oshindji tandi ka popya mpaka otashi holoka wo momukanda ngoka.

Ongeleki ya-ELCIN itayi longo meholamo. Ihe otayi longo montaneho yaayehe notayi lalakanene uuwanawa waantu yaKalunga ayehe, mboka yi itaala nenge mboka inaa itaala. Inayi hala wo okulonga muukwatya wuulingilingi nando owasha. Oyi ilongekidha okuyamukula koshipala shaKalunga noshaantu kutya, shoka tayi ningi otayi shi ningi puuyelele nelalakano lyokukwatha omuntu gwaKalunga noku mu tseyithila shoka Kalunga a hala a ninge manga e li muuyuni mbuka.

Jesus ota ti: “Itonateleni ne mu tonatelathane. Omumwaanyoko ngele ta yono, mu nyenyetela. Nongele ti itedhulula, mu dhimina po. Nongele te ku ningi nayi luheyali esiku limwe, nota galuka luheyali e ta ti: Onda sa oluhodhi, mu pa ombili.”

Nandi shi tumbule wo mpaka kutya, ando aakwanegongalo kamwa li po meyambidhidho lyOngeleki ndjino, ando ELCIN ina vula okuya komeho niilonga ye. Onkee petameko mpaka onda hala peha lya-ELCIN ayihe ndi mu pandule sho mu hole shili Ongeleki ndjika nohamu yi kwatha moompumbwe dhayo. Oshiningwanima shonena osha futilwa nokuli komukwanegongalo, opo shi vule okutuminwa ayehe okupitila moradio. Tangi unene shili Kalunga sho ta longitha aantu ye naashoka ye na. Kehe ngoka ta kwatha Ongeleki, na kale a yambekwa dhoshili!
Etompelo lyeithano olyo okugandja ompito yokutseyithila iilyo yOngeleki kombinga yehumokomeho lyiilonga ya-ELCIN; Okutseyithila iilyo yomagongalo ga-ELCIN iinima iipe mbyoka ya holoka po noopulana dhokomeho mOngeleki; Okugandja ompito kiilyo yetu, opo yi ulike oshimpwiyu shawo nokupula omapulo miinima tayi gumu okukala po kwOngeleki; Okugandja wo ompito kiilyo yOngeleki yi vule okugandja omayele nomauyelele ngoka taga kwatha ewiliko, opo Ongeleki yi vule okulonga oshilonga shayo nawa muuyuni.
Opwa kala omapulo ogendji haga tumwa koohandimwe gu uka kOmbelewa. Ohaga yamukulwa ngaa, ihe inatu tseya ngele omayamukulo ohaga thiki. Omapulo oge li po ogendji. Etumwalaka lyonena olyo oshitopolwa shokuyamukula omapulo gamwe, nenge okuga faalela hoka taga ka yamukulwa. Onkee etumwalaka lyonena olya nuninwa okutseyithila pafupi lela aakwanegongalo ya-ELCIN naayehe mboka ya hala okutseya ELCIN niilonga ye. Nomolwasho otatu hiya wo nesimaneko aakwashigwana yalwe yaa shi iilyo ya-ELCIN, nayo ya pulakene etumwalaka ndika, yo ya tseye ELCIN naashoka ta lalakanene.

MuNamibia uukriste owe ya mo tango manga uukoloni inaawu ya. Opwa piti omimvo 80 tu na uukriste, manga enenevi Afrika inaali itopolelwa kaakolonyeki Aaeuropa pethimbo lyOshigongi shomuBerlin shaNdowishi. Moshigongi moka Afrika olya li lya topolwa miimpungu yuukoloni nAaeuropa oyi ihawaleke ngaaka iitopolwalongo yaAfrika momumvo 1884/5. Namibia olya gandjwa miikaha yAandowishi.
Nando uukrite owe ya muNamibia momumvo 1806, inawu thika mbala kiitopolwa yokuumbangalantu woshilongo. Uukriste kuumbangalantu woshilongo owa etwa ko kaatumwa Aasoomi.

Opwa piti ngashingeyi omimvo 64, ELCIN a manguluka. Opwa piti wo omimvo 58, sho ELCIN a kala ta wilikwa kaavalelwamo yoyene. Momumvo 1960, omutumwa omusita Alpo Hukka nomusita Leonard Auala oya li ya taambathana oshilonga shuuwilikingeleki newiliko lyEpangelongeleki. Ongeleki oya tokola yi landule omulandu gwopaumbiisofi. Mesiku eti-30 Juni 1963, omo omusita Leonard Auala a yapulilwa oshilonga shuumbiisofi. Okuza mpoka Auala okwa ningi ihe oye omumbiisofi gwotango gwa-ELCIN. Sigo opo mpaka okuza kuAuala, ELCIN okwa wilikwa kaambiisofi ye li yahetatu.

Oshikandjongeleki kehe oshi li mewiliko lyomumbiisofi. Oshitayingeleki kehe oshi li mewiliko lyomutonatelishitayingeleki negongalo oli li mewiliko lyomusitagongalo. Mupya munene omagongalo gamwe kage na aasitagongalo natango. Omagongalo kaa ge na aasita otaga yakulwa kaatonatelishitayingeleki. Aatonatelishitayingeleki kaye na oombelewa, ihe otaa longitha oombelewa dhomagongalo moka taa yakula. Shika osha tula omutenge omudhigu komapepe gaasita mboka ye li aasita yomagongalo yo aatenatelishitayingeleki pethimbo limwe, pamwe nokuyakula ishewe omagongalo ngoka kaa ge na aasita.

ELCIN iha mono iiyemo tayi zi pondje. Kakele uuna shila pu na ooprojeka dhowina, naashoka tashi gandjwa osha tetwa komakutsi sha ninunwa owala oprojeka ndjoka. Iiyemo ayihe tayi longithwa ku-ELCIN, moombelewa nomomagongalo ge, ohayi zi maakwanegongalo okupitila miigandjwa yokomumvo, moongalo, momagano gowina nomiinyangadhalwa yi ili noyi ili mbyoka hayi ningwa kaakwanegongalo.
Sigo opo mpaka, elongitho lyiimaliwa miilonga yOmbelewangeleki, yoombelewa dhIikandjongeleki, yIitayingeleki noyomagongalo agehe 146 mwa kwatelwa ooprojeka dhomatungo kumwe oyi thike poomiliyona N$62 komumvo. Omwaalu gwiimaliwa hayi longithwa miipangelo, moosikola dhongula nomomadhikwahala gamwe inagu kwatelwa momwaalu nguka, oshoka iimaliwa mbyoka ihayi zi komagongalo. Ombelewangeleki omvula 2017 miinakugwanithwa yayo ayihe oya longitha omwaalu gwoomiliona N$ 4.1.

Kombinga yiiniwe yOngeleki, natango otatu kumagidha aawiliki ayehe yomagongalo nomadhikwahala gOngeleki kutya: Iiniwe nayi dhigininwe nawa, yo nayi hokololelwe mboka ye ya pamba, opo ya vule okutseya kutya iimaliwa oya holoka po ngiini noya longithwa ngiini. Uufuthi nuumbudhi auhe wopaimaliwa nawu kondjithwe. Iimaliwa niiyemo kehe ya gandjelwa Ongeleki nayi nyolwe momambo ya yela, napu kale oonzapo dhomafatululo gomilinda dhiimaliwa mpoka ya zi naampoka ya thindi. Iimaliwa ya nuninwa shontumba inayi pitikwa yi longithwe sha shilwe shi ili, okuninga pwa gandjwa eziminino lyowina. Inaku pitikwa nando ogumwe a longithe edhina lya-ELCIN okwiimonena eliko lyopaumwene.

Aakwanegongalo otaa indilwa ya landule nawa popepi omaliko gomagongalo gawo. Aakwanegongalo inaa ethela iiyemo yomagongalo momake owala gaamboka taa longo miinyangagongalo nomoombelewa. Aasita naawiliki yiikondolonga ayehe mu-ELCIN oya tegelelwa ya tonatele nawa omilinda dhiiyemo yomagongalo nodhiimpungulonga yawo, ihe hayo ye na okukala aadhiginini yiiniwe naatokoli yelongitho lyayo. Oongundu dhomatokolo ndhoka dha tulwa po odho nadhi tokole nkene omaliko gOngeleki taga longithwa.

Aakwanegongalo ayehe mwa kwatelwa aasitagongalo naayakuligongalo yalwe, otaa kumagidhwa ya yande okulongitha nayi eliko lyOngeleki. Kehe ngoka ta longitha iimaliwa yOngeleki inee yi pewa / pitikilwa kOngunduleli yopehala mpoka, ota talwa ota yaka.
Uufuthi wiimaliwa nelongitho nayi lyeliko kehe lyoshilongo nalyo otatu li pangula nonyanya. Iinyangagongalo nayo oya ningwa iihakanwa yaafuthi. Otwa koneke oku wo na aayambantu yamwe taa longitha aathigona opo ya ka yake peha lyawo. Shika nasho otatu shi pangula noonkondo. Ngele oku na iilyo ya-ELCIN yi itula muufuthi nomeyo lyomaliko goshigwana, otatu galikana Kalunga a galulile oomwenyo dhawo keitedhululo.

Eeno shili, Namibia lya manguluka. Emanguluko olya etelela oshindji. Hoka tu uka, ongele Ongeleki nenge oshigwana ashihe, otwa taalela iinima oyindji. Iipu niidhigu. Omathimbo gamwe Ongeleki oya hala okulonga nokukwatha aantu, ihe aantu oyo tuu mboka otaa
gandja wo omikundu kOngeleki. Uuyuni sho wa lunduluka, niinima iiyapuki nayo inayi simanekwa we kaantu yoshigwana shetu.

Aamwameme aaholike, Ongeleki nayo ngashingeyi oya talwa oyo ehala lyoopala okwiimonena eliko. Iiholelwa yimwe oyo Aantu yamwe otaa dhike oongeleki nelalakano lyokumbotsotsa aakwashigwana. Mondjokonona yOmbiimbeli noyuukriste inatu uva mo Kalunga a gandja omagano guuprofeti kofamili ayihe. Moses naye okwa li a pewa aamwayina ye mu kwathe, ihe oye awike a li a ithanenwa oshilonga. Omuwilikimbisofi gwa-ELCIN okwa li a ithanwa kOhofa omolwaakwanegongalo taa hengathana nando haye e ya hokanithile, ye ka li ishewe oshinkumbi shawo. Eliko tali popi.

Nandi tseyithile wo mpaka noluhodhi iilyo ayihe ya-ELCIN kutya, Ongeleki ndjika oya falwa kOmpangu komukwanegongalo nomukwashigwana Omunamibia aniwa sho inaa pewa epango ndyoka a li a hala mOshipangelo shOngeleki, Onandjokwe. Moshipotha shika ELCIN nando a li ipopile komeho gompangu, Ompangu yaNamibia naapanguli Aanamibia, oya tokola ELCIN opo a fute omukwashigwana ngoka iimaliwa oomiliona N$1,15.

Nongele ELCIN ita futu, oku naokukuthwa iinima yongushu yi thike piimaliwa mbyoka, nenge pamwe Omuwilikimbisofi a ye mondholongo peha lyaELCIN. Sho kaa pu naoshimaliwa shOngeleki sha kala mombaanga yontumba, Elelongeleki olya tokola li lye oongunga, lyo li fute oshimaliwa shoka. Pethimbo ndika omusindani gwoshipotha okwa futwa ko ombinga yimwe yiimaliwa ye, nombinga onkwawo yongunga okwe yi tegelela yi futwe mbala. ELCIN oku na ongunga ndjika.

Iimaliwa yokufuta ongunga ndjika itayi zi palwe, ihe otayi futwa kaakwanegongalo. Omufutwa noonakulyamo sha aapanguli otwi inekela ngiika nayo otaaka gandja ngaa sha sha kola komagongalo gaandjawo, opo ongunga ndjika yi futwe.
• Omuwilikimbiisofi Dr. Shekutaamba V. V. Nambala okwa gandjele oshipopiwa shonkalo ya-ELCN pOniipa mo27 Mai 2018. Oshipopiwa osha fupipikwa komudhindoli.

LEAVE A REPLY

Please enter your comment!
Please enter your name here