Oongeshefa otadhi shongola mOshakati Totem Expo

0
104

■ Victoria Kaapanda

OSHAKATI – Aashingithi yiipindi otaya nyenyeta omolwiipindi yawo mbyoka itayi ende nawa momaulikilo giipindi moShakati moshitopolwa shaShana, ngoka ga tamekele momasiku 25 gaMai notaga hulu mu 02 gaJuni moshiwike tashi ya.

Omauliko giipindi moShakati oga gwanitha oomvula heyali nuumvo. Ashike aanangehefa oye li ya yemata notaya nyenyeta kutya nuumvo oye wete kutya oye na okukanitha oshindji, oshoka iilandithomwa yawo itayi landwa nawa okuza esiku lyotango sigo omesiku ndika lyonena.

Meme Sophia Shilongo ngoka a kala ha kutha ombinga kehe omvula momayuliko giipindi okwa ti omvula ndjika ke shi wete nando, oshoka itayi yelekwa nando noomvula adhihe dha ka pita. Ta gwedha po ta ti ngeno oshito, mesiku ngaashi lyonena , oshili ngeno okwa gongela po nale oshimaliwa shi li metata lyokulanda oshitukutuku ihe sigo oompaka iikaha yowala.

“Ondi wete kutya oshimaliwa shoka sha shonapala moshilongo, osha dhenga lela oongoshefa dhetu pevi, oshoka Oshakati totem yetu hasho nando ndi yi shile ngeyi,” osho Shilongo a ti.

Shilongo okwa li a indile kehe ngoka e na oonkondo dhokulonga, unene mboka ye li kuushayi ya longe nuudhiginini okulonga momapya, okutenda oongongo, okulikokola omahandangali, oondunga , uutwishi, omankili nakehe shoka tashi vulu okulandithwa opo ya ete ya landithe komatala, yo mboka ihaya vulu kuthika kuushayi ye ye ya lande kuyo ya ka ninge oongeshefa dhawo keuliko lyiipindi ngaashi mbika yoTotem noshowo iikwawo tayi ya.

Ta tsu aanangeshefa yakwawo omukumo kutya inashi ya teya nando omukumo, sho itashi ende nawa pethimbo ndika. Shilongo ta ti iinima iiwanawa ohayi ya kwaamboka ya tegelela. Oshi li sha simana opo aanangeshefa ya longe neyitulemo, ya yambulepo wo ondolopa yawo opo yi hilile wo aatalelipo ya za kiilongo yi ili noyi ili ya kungulukile mondoolopa yawo, shono otashi eta ehumokomeho lyondoolopa yaShakati.

Minista yomayambulepo gomoondolopa nokomikunda Peya Mushelenga ngoka a li omupopi gwesiku a simana esiku lyeegululo lyoOshakati Totem mOsoondaha, okwa popi kutya okwa pandula Elelo lyondolopa yaShakati sho lye ya po noshinyanagadhalwa shika tashi ithanwa omazimo.

Minista ta ti ohashi ithana nokuhila oyendji mboka kaye shi omazimo gawo. Ta ti kehe ngoka ku shi nawa ezimo lyoye nenge ku shi sho hali itanga, onawa wu ye komaulikilo ngaka, wu pulakene nkene hali tangwa nosho wo oku uva nawa ondjokonona yalyo.

Mushelenga ta gwedha po ta ti pamukalo ngoka aakwashigwana sho haye ya okushuwa omazimo gawo, ohashi ya pe wo omukumo gokusapota mboka taya landitha iilandithomwa yawo.

“Onda li nda tseyithilwa kutya omvula ndjika aalandithi yonuumvo oyendji ye vulithe yomvula ya zi ko. Nonda hala natango omvula ta yi ya aalandithi ya ninge oyendji ye vulithe po pwaambaka yonuumvo,” Mushelenga ta ti.

Oongundu 15 odha li dha kutha ombinga momaulikilo gomazimo moShakati Totem mOlyomakaya nOsoondaha ya zi ko, notaya ulike omazimo gawo lwahugunina mOlyomakaya.

Omazimo ngoka ga kutha ombinga nuumvo omulongo nagatano gamwe gomugo ongaashi nee  Aakwambahu, Aakwanambwa, Aakwananime, Aakwanangombe, Aakwanayuma, Aakwanekamba, Aakwanyati, Aakwaluvala, Aakwamhalanga, Aakwankala, Aakwaniilya, Aakwaanyoka, Aakwananganda, noshowo Aakwananzi.

Omazimo ngoka oga li ga pewa ga ndjandjukunune ondjokonona yago nokudhana iidhano niinyandwa. Nezimo esindani ndyoka tali ka kala ponomola yotango otali ka sindana shoka ya longela.

LEAVE A REPLY

Please enter your comment!
Please enter your name here