Oshikumungu shopapolitika moMadagascar sha ya kompangu

0
14

Antananarivo – Omupresidente gwaMadagascar mEtitatu okwa li a ningi eindilo kompangu yoshilongo omolwa oshikogo oshiluudhe shopapolitika shoka sha palamena oshilongo.

Omupresidente Hery Rajaonarimampianina okwa taalela omuzimbukilo sho a li a pewa elombwelo kompangu u ulike omuprimaminista ngoka ta ka kala omukwateli komeho mepangelo ndika lyuukumwe woshigwana.

Okantuntu haka ke li mEfuta lyaIndia oka ninga esiku ke li moshikumungu shoontamanana dha etwa kooveta oompe dhomahogololo, moka iilyo yoongundu dhoompilameno tayi ti odhi li olwaamambinga dha gama komupresidente.

Rajaonarimampianina, momukanda gwe ngoka gwa ya kompangu, okwa pula okangundutokoli ka yeleke omalombwelo gako ngoka ka li ka gandja mEtitano lyoshiwike sha za ko.

“Ope na omaityo nomauveko ogendji, metokolo lyompangu, shoka tashi vulu oku eta natango oshikumungu shimwe, sho osho etompelo pe na omapulo ku yelithwe nawa,” omukalelipo gwopaveta gwomupresidente, Tantely Rakotonirina ta lombwele iikundaneki ngaaka.
Ombelewa yomupresidente otayi ti oya pula ompangu yi fatulule okudhiladhila kwayo “moonkondo dhomupresidente gwoshilongo nethimbo ndyoka tayi kwata oku ya po netokolo”

Ompangu oshiwike sha za ko mEtitano oya li ya gandja elombwelo komupresidente a hanagule po epangelo nokutsikila oku ulika omuprima muule womasiku ge li gaheyali.

Otaku popiwa kutya omuprima omupe ota ka lela epangelo lyetsokumwe moka li na okukala naaleli ye li ontega niizemo yomahogololo gomo2013.

Ompangu oya li wo ya tula po omasiku omulongo opo ye ye po nomikalo ndhoka taya ka kandula po oshikumungu shika.
Nokugandja wo oshinakugwanithwa kepangelo ndyoka tali ya po li unganeke omahogololo omape momumvo ogo tuu nguka.
Okuza mo21 Apilili, aayambidhidhi omathele yoongundu dhompilamena oya kala noku pula omupresidnte i ikuthe miilonga.
Otaya lundile wo epangelo kutya otali kambadhala okukaleka aakuthimbinga yompilamena kondje yomahogololo.
Madagascar okwa kala nomakuyungutu olundji konima sho okantuntu haka ka mono emanguluko lyako kuFrance mo1960.
NAMPA / AFP

LEAVE A REPLY

Please enter your comment!
Please enter your name here