Oshituthi shopamuthigululwakalo shAanama osho ondjodhi ya tsa

0
20

KuSuzith Tjitaura

KEETMANSHOOP – Omayamukulo taga ziilile oombinga adhihe kombinga yoshituthi shoNama Cultural Festival shoka opo tashi itoto mo mondambo nuumbo omawananwa kaaku na we.

Oshituthi osha li sha tameke mEtine 24 Mai nosha hulu mOsoondaha 27 Mai, mokati kiilongadhalwa omwa li oonkundathana; euliko lyoonkambe nombenda yoongalo; osho wo aakalelipo yomihikogonona dhAanama dhi li 12 ye li moonguwo dhawo dhopamuthigululwakalo; ondaanisa yolangarm; uutewo, iinyandwa, uunkulungu noongalo. Cornelius Cloete gwaa!Aman koBethanie okwa lombwele iikundaneki mOsoondaha kutya oshituthi shika otashi ulike ondjodhi ya tsa oshoka oya kala ethimbo nuule ye na ehalo moka Aanama ayehe taye ya pamwe ya hangane. “Otwa kala twa hala nokuhalelela okukala mpaka, otwa za komakule opo tu ye tu kale mpaka, tu inike omilungu kumwe osho wo tu inyanyudhe moshituthi shika shopamuthigululwakalo,” Cloete ta ti.

Yasar Ohle, ngoka a zi koNdowishi, okwa ti okwa li e wete oshituthi shika tashi nyanyudha. “Aantu oya li ya manguluka okutaamba ko yakwawo. Onda li nde ya okutala omuthigululwakalo gwawo, iikulya nosho tuu, osha li etumba sho nda li nda hiywa.” Ta ti ngaaka.
Ohle okwa li a hiywa kOmukwaniilwa gwaaKai-||Khaun, Petrus Kooper, sho a li e ya poonkundathna kOndowishi petameko lyaApilili dhi na sha nedhipago lyi nyanyaleka lyomo 1904-1908.

Omukwaniilwa gwaaGoab Paul Swartbooi gwaaBondelswaarts yokoSouth Africa okwa ti oshituthi osha enda nawa noshi li ngaashi osho a li ta dhilaadhila notashi ndungike.

“Osha li oshinima oshiwanawa kungame, osha li tashi nongeke molwa oonkundathana ndhoka dha li dha ningwa kokangundu osho woo iinyandwa mbyoka ya li yu ulike nkene iinima yontumba hayi longwa momuthigululwakalo gwetu,” Osho a ti ngaaka.

Nonando sha enda nawa ngaaka, okwi indile okangulongekidhi koshituthi shoNama Cultural Festival opo ya nunine ethimbo lya gwana komalongo ge na sha nomuthigululwakalo nondjokonona yoshigwana shawo. Swartbooi ta ti shika otashi kwathele Aanama yi ilonge kombinga yomuthigululwakalo gwawo nontsapo yawo.

“Otashi kala wo oshiwanawa ngele aalongekidhi oya ningi omathaneko gokutalela po omahala ngoka gen a ondjokonona mondoolopa kumboka taye ya koshituthi,” osho a ti sho a pulwa kutya aalongekidhi otaya vulu ngiini okuninga oshituthi shika oshihwepo.
Nichodimas Cooper a za koBotswana okwa ti osha li oshituthi shopandjokonona shAanama. Okwa enda ookilometa 1 200 okuya koKeetmashoop. Cooper ta ti Aanama yomoBotswana oya li ye na etimaumbwile moshituthi shoka tashi hanganitha Aanama ayehe, nolwahugunina osha ninga. Naye okwe shi ithana ondjodhi ya tsa.
– NAMPA

LEAVE A REPLY

Please enter your comment!
Please enter your name here