Esimbapalo maanona eshongo enene moshilongo

0
4

Maria Namupala

EENHANA – Nonando kwa za owala omasiku omashona komumvo, iitopolwa yopaali moshilongo Oshana nOhangwena oya lopota omwaalu gwaanona ya simbapala moosikola gu li pombanda unene.

Shika osha li sha tothwa mo oshiwike sha zi ko sho okomitiye momutumba gopashigwana ya li ya talele po iitopolwa mbyoka. Shoka oshe eta puuyelele kutya miitopolwa mbyoka aalongwa taya ihilile po 235 oya lopotwa ya ningi omategelelo moshikako shotango ashike.
Omukuluntu gwelongo moshitopolwa shaShana Hileni Amukana okwa yelitha kutya moshitopolwa shawo omwa lopotwa oshikandjolongo
shaShakati osho shi na omwaalu ogundji gwaanona ya simbapala ye li 34, taku landula shaLuno (31), Onamutayi (30), Eheke (25) nOmpundja ya lopota omategelelo 12.

Amukana ta ti aalongwa 35 yomwaamboka oye etha nale oosikola noye li owala momagumbo ya tegelela ya pulumuthe, ta ti oonkalamwenyo dhaanona mboka odha tetulwa, molwaashoka itaya landula we elongo lyawo.

Okwa eta puuyelele kutya okutala komayalulo ngoka ya mono po otaga ulike kutya moshitopolwa shawo mo2010 aalongwa 119 oya ningi omategelelo, 2011 ye li 95, 120 mo2012; 124 mo2013; 86 mo2014; 127 mo2015 oshowo ye li 103 mo 2016.

Amukana ta ti nonade pwa totwa omulandu gokukeelela aanona kaaya ninge omategelelo oosikola, pomanongelo ogendji omulandu nguka ihagu longithwa, naavali yamwe momagumbo kaye na etonatelo nesiloshimpwiyu naanona yawo shoka ta ti oshe eta wumwe womuunona wu ininge kakombo ilitha kanzi igalula, tawu ki iyadha wa ninga omapunda nonande wa li wu na okulandula omailongo gawo.

Ta tsikile ko kutya oyendji yomaalongwa mbaka inaya nongela iilanduli iiwinayi konima yaayihe, ngaashi omategelelo inaaga longekidhwa oshowo omikithi dhomomilalo, ta ti onkalo oya nayipekwa wo sho aakuluntu yaanona mbaka ihaaya itula mo oku ya kwatha, oluhepo nalwo otalu thiminike aanona ya ye momilalo inaadhi gamenwa.

Otwa li twa yi moonkundathana nomukuluntu gwelongo moshitopolwa shaHangwena, Isack Hamatwi, ngoka a yelitha kutya esimbapalo maanona yosikola olye eta woo opo iizemo moosikola odhindji moshitopolwa shawo yi kale ya nkundipala, molwaashoka yamwe ihaya ka mana we omailongo gawo, yo uuna ya mono uunona ihaya galukile we koosikola.

“Nonande tatu kambadhala okugandja omauyelele mpaka naampeyaka out na uumbanda molwaashoka okutala komiyalu ndhoka odhi li pombanda unene sho twa kutha ko owala oshikako shotango, aakuluntusikola, aavali oshowo aalongi oye na oshindji okuninga opo ya kwashilipaleke kutya esimbapalo moosikola olya fulilwa okalambo,” Hamatwi ta ti ngaaka.

Pamayalulo ngoka ga etwa poshitaafula ogu ulike kutya aalongwa 4000 oya simbapala mo 2016 oshilongo ashihe, notagu ende tagu indjipala ethimbo nethimbo. Hamatwi okwa kunkilile aavali ya kale taya pukulula aanona, yo aalongwa tayi tula melongo lyawo molwaashoka oyo aaleli yokomongula.

LEAVE A REPLY

Please enter your comment!
Please enter your name here