Lapindja osho a mana okuteleka

0
92

Maria Namupala

OMUNTELE – Mathew Mathew a tseyika nawa nedhina lyokwiimba oongalo Lapindja, osho a mana okuteleka oalbuma ye ontiyali ndjoka ya kala ya tegelelwa koyendji. Oku na oomvula 27 nokwa yambukile momukunda Iimanya moshikandjohogololo Omuntele.
Moonkundathana naye okwa yelitha kutya okwa wayimine ehangano lyokwiimba oongalo mo 2010, konima yoomvula sho a kala e na ehalo lyokwiimba oongalo, okwa ti ohokwe yokwiimba oongalo oya kala muye pethimbo lyeputuko lye, nokwa kala e na ondjodhi opo a wayimine aayimbi ooyakwawo moshilongo.

Pethimbo ndika okwa pititha ooalbuma mbali, moka yotango e yi pititha omumvo gwa zi ko, nongashingeyi okwa mana okuteleka nokudhunga oalbuma ontiyali ndjoka ya piti pehulilo lyomwedhi gwa zi ko.

“Ngame mwene onda tula po ondjuvanene yandje opo ndi imbe oongalo tadhi tungu, oalbuma yotango otayi ithanwa Councillor, omanga ndjoka nda pititha pehulilo lyomwedhi tayi ithanwa Familly Planning moka mu na uungalo 12,” ta popi ngaaka.
Konyala muungalo we owundji okwa kwathelwa kaahikingao Aanamibia unene ngaashi

Omsaane Niihana, Mbuku nayalwe oyendji. Wumwe womuungalo tawu adhika moalbuma moka ongaashi Aandonga, Suicide hoka ta ti okwe ka imba nelalakano a kunkilile mboka haya ningi oonkambadhala dhokuhulitha po oonkalamwenyo dhawo, Kotoka moka ta indile aakwashigwana ayehe ya kale ya kotoka uuna taya longo oshilonga kehe.

Ta ti okwa tokola opo a kale mokombitha ethimbo kehe ye a teleke oongalo tadhi nyuwitha omakutsi gaapulakeni. Ta ti omumvo kehe okwa hala opo a pitithe oalbuma, ye a nyanyudhe aaholi yoongalo dhe moshilongo nopondje yoshilongo.

Lapindja ta ti moalbuma ye okuhole mo okangalo kamwe hoka taka popi kombinga yuuyuni, nonkalo yaantu kaaye na ombili yo kaye na oshili moonkalamwenyo dhawo, ta ti uuyuni pethimbo ndika otawu limbilike, nowa taalelwa komashongo ogendji, unene tuu aagundjuka.
“Ondi na okulonga ngaashi tashi vulika opo ndi gandje etumwalaka tali tungu moshigwana, ndyoka nda tokola ndi li gandje pamukalo goondjimbo, molwaashoka ohadhi pulakenwa kaantu oyendji, ohashi kala oshiwanawa uuna omuntu ta kambadhala okuninga sha kuye mwene ngoye to nyangadhala niinima oyindji monkalamwenyo nena oho humu komeho nawa,” ta popi ngaaka.

Okwa pandula ayehe haye mu yambidhidha mokuyambulapo oshitalenti she shokwiimba, ta indile aahikingalo Aanamibia ya longele kumwe mokuhumithakomeho oongalo moshilongo, yo ya tsikile nokugandja etumwalaka tali tungu moshigwana.
Olundji oha kala ta nyanyudha pomahala ga yooloka, nokwa ti ota tsikile nokunyanyudha aaholi yoongalo dhe , ye a kwashilipaleke kutya oku na elongelokumwe nekwatathano ewanawa naaholi yoongalo dhe moshilongo. Oku uvaneke oshindji okuza kuye omumvo nguka.

LEAVE A REPLY

Please enter your comment!
Please enter your name here