Oomeme ye li momategelelo naya silwe oshimpwiyu

0
20

Victoria Kaapanda

ONGWEDIVA – Ngele oomeme yi ihumbata otaya silwa oshimpwiyu nena oto sile oshigwana oshimpwiyu. Ndhika odha popiwa komukuluntu goshipangelo shaMediPark Dr Tshali Iithete, Olyomakaya ga zi ko omasiku ga-02 gaMaalitsa moshikandjohogololo shaEenhana moshitopolwa Ohangwena.

Iithete okwa popi kutya esiloshimpwiyu lyoomeme yi ihumbata olya simana noonkondo, lyo nali kale oshimpwiyu pokati kaakuluntu ayehe yokanona ke li mepunda, pamukalo gu li ngaaka ohagu shonopaleke omikithi odhindji koomeme yi ihumbata.
Ta gwegha po kutya uunona tawu valwa nuundjolowele inawu simana ashike koshitopolwa shuundjowele ashike osha simana wo miilongo nge tashi ya peyalulo nkene oshilongo sha yambuka po.

Ta ti okuuvite ohokwe nuunambano shaashi esimano ndino lyomeme yi ihumbata otali dhana onkandandala lela nolyuuka komeho mepangelo .
“Omukalo nguka ngaashi naanaa tatu ningi ngashiingeyi gwokulonga nokuuvitha ko oomeme yi ihumbata nkene ye na okukala muundjolowele ogo omukalo gu li mondjila opo ya ka mone uunona wu li muundjolowele,” Iithete ta ti.

Ta popi ta ti omalongo agehe ya gandja okwa hala ga taandele oshilongo ashihe, inaga huulila ashike mEenhanana. Iithete ta ti kasha na sha niimaliwa okugandja omalongo nokuuvitha ko oshigwana, sha simana uunongo.

Shino Iithite okwe shi popi esiku kwa li taya gandja omalongo mEenhana, nosha li oshikando oshititatu. Ta popi ta ti omalongo ngano otaga ningi omukalondjigilile oshoka oye shi ndhindhilika mokalindeli kawo, go ga kale haga ningwa kehe omvula.
Omukuluntu gwoMedipark okwa li a gandja omapundulo komunyekadhi goshilongo Monica Geingos, omolwa eyambidhidho lye. Eyitulemo lye ohali ya pe eenghondo nomukumo okutsikila omalongo ngaka. Iithete ta pandula ashihe ya ningilwa komunyekadhi.

Hugunina okwa gandja natango omapandulo kelelo lyotopolwa shaHangwena ndyoka tali lelwa kungoloneya Usko Nghaamwa ngoka ha kala aluhe nokugandja omayambidhidho gomalongo guundjolowele moshitopolwa shawo.

Iithete okwa ti otashi kala ondjo ngele athigi ko endiki ndyoka hali pungula iimaliwa tali ithanwa Standard Bank sho lya panga uukuume noMedipark. Oshowo kehe ngoka a li a yambidhidha opoloyeka ndjika yi kale ya etwa po.

LEAVE A REPLY

Please enter your comment!
Please enter your name here