Oosikola 13 mOshikoto dha pewa oohi koSea Flower

0
12

Maria Namupala

OMUTHIYA – Ehangano lyoSea Flower olya gandja omagano giipakate yoohi koosikola 13 moshitopolwa shaShikoto, shika osha ningwa oshiwike sha zi ko pombelewa yangoloneya goshitopolwa shoka Henock Kankoshi.

Omukuluntu gwelongo moshitopolwa shoka Lameck Kafidi pethimbo ta taamba ko iipakete mbyoka yoohi okwa pandula ehangano ndyoka, sho tali gandja omakwatho aluhe, ta ti oya yamukula kombumbwe yawo pethimbo lyoopala.

Ta gwedha po kutya oohi ndhoka otadhi topolelwa oosikola 13 moshitopolwa, ndhoka unene dhokiitopolwa yokuushayi nopu na aalongwa mboka taya hupu nuudhigu, okwa popi kutya moshitopolwa omu na oosikola odhindji tadhi hupu shokadhila omolwonkalo yeliko lyoshilongo.

Okwa ti oshikondo shelongo osho shi inekelelwa shi to the mo oosikola ndhoka dhi li monkalakatenya notadhi hupu nuudhigu, opo ya pewe iipakete yoohi yi ikwathele, yo yeende ko kashona ya vule okutsikila nelongo lyawo.
Ehangano ndika ohali gandja aluhe omakwatho notali kambadhala okutsakaneka epangelo ondjilakati moku kwathela mboka ye li mompumbwe, shika hasho oshikando shawo shotango taya gandja omakwatho koosikola.

Sea flower otali kwatelwa komeho kehangano lyoFishcor, ndyoka lya yama kepangelo, odhi na ongushu yoshimaliwa shooN$170 000. Poshiindingili mpoka opwa li pwa kalwa kuminista Goohi noonzo dhopaushitwe Bernhard Esau.

Pethimbo ta popi mpoka okwa pula aaniipambuliko oshowo omahangano goohi, ga gandje sha moshigwana opo woo nasho shi tyapule omauwanawa ngoka taga monika moohi, ta ti aakwashigwana oyendji ihaya tyapula omauwanawa noyafa ye ekelwahi.
Ta ti aantu mboka haya li oohi ohaya kala ye na omalutu ga paluka noge na uundjolowele, ta ti ehangano olya longa oshinima sha simana sho tali pungula mepipi lyokomongula. Ta pula dhi topolelwe oosikola ndhoka dhi li mompumbwe, nokwiindile shi ningwe pauyuuki.

Ngoloneya Kankoshi naye okwa kuthile ko ehangano egala, ta ti olya yambidhidha oosikola moshitopolwa, nokwa yelitha kutya shika hasho oshikando shotango ehangano tali gandja omayambidhidho moshitopolwa shawo.
Ta pula woo omahangano galwe ga kwathele mpoka taga vulu nokutsakaneka epangelo ondjilakati, unene monkalo ndjika yeliko lyoshilongo tayi shongola, nomolwonkalo yoshikukuta.

LEAVE A REPLY

Please enter your comment!
Please enter your name here