Outomeno va tameka okupatuluka monooli …ovanafaalama ova ninga eedula nhe vehe na outomeno

0
32

Tusnelde Nghilinganye

OUTAPI – Konima yeedula nhe eshi ovanafaalama vomonooli va kala vehe na outomeno, omo kwa li tava dulu okulandifa oimuna yavo, Ouministeli wOshikondo shOunafalama, Omeva nOmakuti owa tameka okupatulula outomeno monooli. Okatomeno kotete oka patuluka oshivike eshi mOutapi. Okatomeno ka landula ko okupatuluka ota ka kala mEenhana, aka taku tiwa oke li kapwa okulongekidwa, noku na ashike oulonga vaniingholi va Kamba ko opo ka patuluke. Oka teelelwa ka patuluke muJuli, Ominista yOshikondo shOunafalama, Omeva nOmakuti Alfeus !Naruseb osho ya tumbula ngaho.

Omanga oshilahite shombelela mOngwediva kwa tengenekwa shi kale sha patuluka kehulilo lodula eyi.
Ovanafaalama vokoumbangalanhu woshilongo kakwa li tava dulu okulandifa eengobe davo pambelewa oule weedula di li nhe, konima eshi okatomeno kaShakati naako kaKatima Mulilo va li va tulwa omakumba mo 2016 omolwa omukifi wekondo nelaka.

Oshikondo shOunafalama Omeva nOmakuti, osho sha wapalekulula etungo eli lOkatomeno mOutapi, ova longifa oimaliwa yongushu yeemiliona N$25. Okatomeno oke li momake Ehangano laNamibia Loonakulwa mEkondjolomanguluko (NNLVA), ovo tava longele kumwe nongeshefa yimwe oyo yi na owino yokulonga noutomeno nokulandifa eengombe nombelela.
“Okatomeno aka otaka ka nghonopaleka opo ku dule okulandifa ombelela miitopolwa yetu aishe ngaashi Oshana, Ohangwena, ombinga yonooli yaKunene, nokouningino woshitopolwa shaOshikoto.

Ota ti, shaashi ovanafalama voitopolwa oyo, inava toma eengobe davo oule weedule di fike punhe (4) netomeno omolwa outomeno ovo va pata Kashakati nokaKatima Mulilo netomeno likwawo omolwomukifi wekondo nelaka.
Nonande epangelo ole lilongekida okutunga ofabulika yombelela mOngwediva, okatomeno aka inaka patela nande oitopolwa pondje, aishe oya manguluka opo yuu ye i lande nokulandifa,” osho !Naruseb a ti.

!Naruseb okwa holola okuuda nawa kwaye ta ti okuudite etumba okuya MOutapi nokupatulula okatomeno. Ta ti nande pa kala omaupyakadi mahapu ngaashi omomatomeno oo a etifa omaupyakadi ongaashi odalate oyo yatopola oshitopolwa eshi shokonooli opo shiha landife ombelela okudja konima yomufinda mutilyana.

Opa kala yoo omukifi oo wa li we liteyela moshitopolwa modula 2015 wekondo nelaka.
Nashikwawo oupyakadi oo wokatomeno Kashakati nokaKatima Mulilo ovo vapata modula 2016.
“Eshi osha etifa epangelo li kondje la mana mo opo ku dule okunghonopeka oinima oyo hatu longeni fyee vene, eshi osho omulandu wepangelo ovanamibia va kale tava longifa oilongomwa yavo vene momukokomokondjila wokufika ko2030,” osho a ti.
Natango ope na outomeno u li uvali tava longululwa nawa ngaashi okatomeno kaEenhana nonhele ei yokOngwediva, kai shi naana okatomeno ashike onhele yokulongela mo ombelela yomeendooha.

Ta twikile ko ta ti ouministeli owe lipyakidila okutunga okatomeno KoKatimaMulilo oko taka kala nokudipaa eengobe di fike pomilongo heyali mefiku. Eshi hasho ashike natango ouministili wounafalama omeva nomakuti owe lilongekida okutunga okatomeno koRundu nokOpuwo oko taka ka tungwa pomufika wopombada.

Ope na yo ondunge imwe oyo ouministeli tau lalakanene okuyambidida onghalo yokulanda oimuna kaNamibia. Omo epangelo tali ka landa eengobe, tadi tomwa kAanamibia opo ombelela i liwe miikondo ngaashi Oshikondo shEameno lOshilongo (NDF) Opolifi, nomomihandjo depangelo.

“Inashi pumbiwa tu kale nokulanda oinima pondje, ndele natu landeni meni opo oimaliwa yetu i kale tai yambidida Ovanamibia,” osho !Naruseb a popya nokulombwela ovo va li va ongala pefimbo ta yandje oshapi kehangano olo la kalelapo oonakulwa vakulu.
Opo nee okatomeno aka kafindane onga fye Ovanamibia hatu ka longifa nokuxwepepaleka eenghalamwenyo dovanafaalama. Ovanafaalama ova pumbwa okulongela kumwe naavo tava ka landa.

Minista okwa kumaida yoo ovanafaalama opo va life nawa oimuna yavo opo ve ke limonene ondado iwa mokulandifa. Okwa lombwela yo ovalandi opo va kale ve na ondunge yokulonga ovanafaalama nghene ve na okumuna oimuna yavo. Okwa kumaida ehangano lovanafaalama opo va kale va kwashilipaleka kutya ovanafaalama ova yambididwa. Kehangano lovakondjelimanguluko eli tali ka kalela po okatomeno aka, !Naruseb okwe va pandula noku va twa omukumo opo va longe noudiinini vo va mone kutya ovakondjelimanguluko ova yakulwa nawa neenghalamwenyo davo oda lunduluka.

Ngoloneya woshitopolwa shaMusati Erginus Endjala naye wo moshipopiwa shaye okwa pandula unene omolwonghatu ya katukwa koshikondo shounafaalama. “Ovashiinda shetu vaAngola navo yoo ove na ehalo linene opo ve limonene oshivelelwa,” osho a ti.
Endjala okwa indila opo ovanangobe va landife po eengobe dimwe. Okwa ti ombelela oya pumbiwa okuliwa momihandjo deefikola, moshikondo shopolifi nomoshikondo sheameno loshilongo.

“Ombelela inai kala ashike ya yuka pondje yoshilongo, ndele nai yakule nokuliwa moshilongo. Eshi osha yandja yoo eenghono shaashi modula tai uya moshitopolwa shaMusati otamu ka kala yo mwa patuluka ofabulika yomatama,” osho a ti.
Tate Ben Shikongo, oo e li omukwateli komesho wEhangano laNamibia Loonakulwa mEkondjolomanguluko okwapandula oshikondo shounafaalama, omeva nomakuti ponhele yokomitiye aishe oyo tai ka nana okatomeno.

“Eshi oshi li efindano lile kuvo nove lilongekida okupendula po okatomeno aka.
Otashi ka kala efindano la shiya ko nge ouministeli ove vape otendela youtomeno ovo yoo ve li metifa lokulongululwa,” osho Shilongo a popya noshipala shi yadi ehafo linene.

LEAVE A REPLY

Please enter your comment!
Please enter your name here