Uutalala okiipeta yakahima… Siddy ota pititha oombiNdja nena

0
118

Loide Jason

WINDHOEK – Omulumentu gwomimvo 21 ngoka woo e li omunasikola koshiputudhilo shopombanda shedhina International University of Management (IUM) ota pitithitha iizalomwa yuutalala nena (mEtitano) moshilandopangelo. Eliander Johannes ngoka e shiwike nedhina lyomolukanda Siddy Consalles okwa ti kutya ota ka pititha oombindja noombulukweya dhuutala oshikando shotango mokukalamwenyo kwe sho a toto ongeshefa ye yiipindi yiizalomwa.

Omulumentu nguka okwa hokololele Kundana oshiwike shika kutya ye ongeshefa ndjika okwe yi tameke omanga e li mondondo onti-1 posikola yedhina David Sheehama ndjoka yi li mOutapi moshitopolwa shaMusati.

Okwa hokola kutya okwa tameke tangotango ta landithile kuume ke Helao Kapuka iikutu mbyoka a kala ta tumu omanga e li koshilandopangelo opo e mu landithile kuyakwawo mboka e li nayo kosikola ndjoka.

“Onda kala nokulandithila kuume kandje ihe konima onda ka kwatwa kedhilaadhilo lyokutota po ongeshefa yandje mwene moka nda tameka okulanditha tango uumbindja nuuhema kaanasikola ooyakwetu,” osho a fatulula ngaaka.

“Onda hogolola iizalomwa molwashoka ondi uvite kutya aantu otaya vulu okwiitotomona paushili niikutu mbyoka ya zala, oshoka otaya kala ye li mo yu uvite uugumbo. Ohole yandje yokumona elunduluko oye eta ndje mpaka ndi kale popepi neithano ndika, moka mu na omalunduko ethimbo kehe,” osho a ti.

“Uuwananwa woku ya mongeshefa ndjika yiikutu owo emanguluko nohokwe yokukambadhala oshinima oshipe oshikando kehe. Kamu na oompango dha tulwa po uuna to longo moshimpungu shika shiizalomwa, niizalomwa yoye iiwanawa aluhe uuna to dhilaadhila. Aalandi yongashingeyi oye na shoka ya hala. Inaya hala ashike okulanda oshikutu kehe, oya hala okulanda onkalo osho wo omaiyuvo. Oya hala okwaandudhwa nokukala oshitopolwa shoshinima oshinene.”

“Kandi na aantu nde ya kuta mboka haya hondjo iizalomwa nando, ashike ondi na mpoka handi mono iikwa niipangitho yokunyanyangidha nohandi landitha ihe iikutu yi na ongushu,” osho a ti.

Johannes okwa ti edhina lyiizalomwa ye olyi ikalekelwa noha kwashilipaleke oku eta po iizalomwa yongushu. Okwa hala wo okulanda omashina ge gokushanga opo iikutu ye ya nyolwa yi kale tayi monika ethimbo kehe.
“Aantu naya kale yi ilongekidha okumona iizalomwa yandje momaulikilo giipindi, oshoka ondi itaala kutya okukutha ombinga miipindi mbika ompito ombwaanawa okutseyitha edhina lyoye osho wo okufala iilongomwa yoye kaantu. Onda hala wo okupatulula okasitola kiikutu yandje,” osho a ti.

Ashike okwa ti nonande ongeshefa ndjoka oyi li yi na omashongo ga yaga kegonga okwa pondola okukala a tsikila nomukumo sigo ta thiki ponkatu ndjika yokupititha oombindja.

Iikutu mbyoka a kala nokulanditha oyi li nduno ya shangwa ‘Slow by Slow’ (shoka tashi ti kutya kashona nakashona).
Okwa ti kutya mboka haye mu yambidhidha oomboka unene yepipi lyopokati noshowo aagundjuka yepipi lye mboka woo hayi nayo kosikola koshiputudhilo shopombanda.

“Ashike kasha shi oshipu oshoka omuntu oho mono omahongololo taga zi kwaamboka wa li wa tegelela ye ku yambidhidhe nomadhilaadhilo. Onkee otandi pandula mboka ya yambidhidha ndje pashili unene tuu aalandi yiipindi yandje. Ngeno okwa li inaya yambidhidha ndje ngeno kandi li po mpaka,” osho Johannes a hokololele Kundana ngaaka.

Okwa ti kutya ngashingeyi eliko lyoshilongo olya yaga kegonga notati epangelo otali ka longa nuudhigu mokuyambidhidha kehe gumwe.
Onkee ta indile aanyanyamagulu ya tameke okwiilongela yoyene opo ya mone iipalutha.

LEAVE A REPLY

Please enter your comment!
Please enter your name here