Kansela Indongo a pula aantu ya yapukile ehumokomeho omahumokomeho

0
12

Maria Namupala

ONAYENA – Kansela gwoshikandjohogololo Onayena Iyambo Indongo okwa indile aakalimo yomomudhingoloko ngoka ya yapukile omahumokomeho ngoka ga thanekelwa mo, Indongo ndhika okwe dhi popi omasiku ga zi ko pethimbo kwa li kuunganekwa oshigongi showina naakwashigwana.
Indongo ta ti ngaashi kwa konekwa kutya Onayena oyimwe yomomahala ngoka ga thanekelwa omahumokomeho ogendji, konima sho ehala lya yelwa otaku indilwa aakwashigwana ya pitike aanambelewa ya longe iilonga yawo ya manguluka, nokwiiyutha komalombwelo ngoka taya pewa.

Kansela ta ti okwa konekwa aakalimo oyendji taya tindi okulongela kumwe naanambelewa, yo yamwe inaya hala okulandula oompango nooveta dhelelo lyondoolopa, ta ti nayi iyageke okulonga iilonga mbyoka yi li ompinge nomilandu yo taya iyutha komalombwelo aluhe.
Momutumba moka kansela okwa totha mo kutya opwa konekwa omagumbo ogendji ngoka ge li moongamba dhondoolopa taga tembudhwa mo opo ga kongelwe omahala mpoka taga ka kala molwaashoka pomahala mpoka ye li ngaashingeyi opwa thanekelwa omahumokomeho gondoolopa, kakele yamwe oya tindi okutembudhwa po, yo yamwe taya tsikile okutunga pomahala ngoka gi indikwa.

Indongo ta ti shika hasho oshikando shotango taya ningi iigongi mbyoka yomayelithilo, ta ti aakwashigwana inaya hala okuuva ko nokulandula, aluhe nande naya popye omalombwelo oga fa owala haga yi momakutsi ga thita.

Okwa ti oshinima shoka osha yemateka nombelewa ya kansela sho unene natango yamwe mboka ye na omitse dha teka taya tsikile okutunga omagumbo gawo pomahala mpoka inaaya pitikilwa, nonande taya lombwelwa kaaye shi ninge oya tindi omalombwelo.
Ta ti oye na omathaneko omanene unene meyambulepo lyOnayena opo li kale tali imonikila momahala agehe moshilongo, noya hala li kale tali imonikila nolina ontalelo ombwanawa, tayi eta aatalelipo naangeshefi ya yooloka.

Okwa kunkilile ayehe mboka tayi iyadha moongamba dhondoolopa notaya ka tseyithilwa yiinyenge ya yapukile omahumokomeho, okwa uvaneke taya ka kala taya ningi iigongi mpaka naampeyaka opo yu uvithe ko aakwashigwana, yo ya kale ya pashuka nokutseya omahumokomeho ngoka taga inyenge momudhingoloko.

“Ngaashi shi li pakotampango nopaveta yoshilongo kutya elelo lyondoolopa kehe oli na uuthemba okutululula omagumbo ngoka ge li pomahala mpoka pwa thanekelwa omahumokomeho nomondoolopa yetu opo shi li, nooyene yomagumbo ohaya pewa okashona omolwa etembu ndyoka, olundji oya tindi okuyapukila omahumokomeho, nonande ge li muuwanawa waantu ayehe,” ta popi ngaaka.

Okwa ti otaya kala ya kutha ko oongaku nokukatukila mboka itaaya iyutha koompango ndhoka dha tulwa po, unene mboka taya tsikile okutunga pomahala giindikwa nonande ya lombwele aluhe otaye shi ningile owina, ta pula aakalimo ayehe ye na uupyakadhi, omapulo nenge omagwedhelepo ya talele po ombelewa yoshikandjohogololo.

Indongo okwa kunkilile ayehe kaaya tunge omanga inaaya pewa epitikilo okuza kelelo lyondoolopa, yo naya iyageke okuya omathaneko gelelo lyondoolopa moshipala, ta ti ayehe mboka ye li moongamba dhoondoolopa otaya vulu owala okutsikila okutunga uuna ya pitikwa kewiliko lyopombanda, ta ti mboka ya adhika ya tameka omatungo gawo naya ethe manga.

LEAVE A REPLY

Please enter your comment!
Please enter your name here