6Five te shi enditha nawa mongalo ye ompe

0
17

Pinehas Nakaziko

Windhoek – 6Five ngoka ha imbi oongalo dhoHip-hop noRnB, oku li te shi enditha nawa nongalo ye ompe yedhina Roll One, ndjoka opo a pititha pehulilo lyomwedhi gwa zi ko pamwe nokavidio kayo.

Roll One, ongalo ndjoka yi li tayi dhanwa nawa komapandja gointaneta, nokavidio oke li taka talwa koyendji koYou Tube. Mongalo muka 6Five ngoka ha ithanwa nedhina lye pakuudha Adam Aluvilu, oku li a imba pamwe naPrincelou, omuhikingalo ngoka a za kongundu yaaimbi yoBlvcboxx, nokavidio oka thanekwa kehangano lyoReggie Film moshilando.

6Five okwa ti ngashingeyi oku li i ipyakidhila nokutaandelitha okangalo haka kooradio dhomoshillongo. Ongalo Roll One otayi popi kombinga yokutyapula oshimwenyo, unene tuu maagundjuka yopethimbo lyopaife.

 “Ongalo otayi ti natu lyeni oshimwenyo, ashike inatu pitililitha tse tu ningeni iinima ya puka nenge uukolokoshi,” 6Five ta ti ngaaka. 6Five ngoka a valelwa mOshilando okwa ti okwa koko ta pulakene oongalo dhomoshilongo nopondje yoshilongo, naashika oshe mu eta ponkantu mpoka opo a kale a hokwa oongalo, nokwa li nokuli a tameke okushanga omaimbilo ge.  

Omaimbilo ge ogendji oge li taga popi kombinga yokukaleka uuhwapindi kokule, oshoka ye anuwa okwakokele momapandaanda moka mwa kala nokuningwa uuhwapindi. 6Five okwa li a tameke okwiimba oomvula heyali dha piti pamwe nongundu ndjoka yedhina Lyrics Concept (LC).
Konima yokupititha nokushanga omaimbilo gawo omashona ongundu ndjika okwa li ya topoka omolwa ekwatathano kaali li nawa, nokonima yoomvula mbali, 6Five opo a tameke okuninga omaimbilo ge kuye mwene, gwoalbuma Temptations, edhina ndyoka ta ti olya hala okutya omashongo, noya tegelelwa yi ka pite pehulilo lyaSepetemba. Okwa ti ongalo Roll One oku ulika ashike omulyo gwoongalo ndhoka tadhi ka kala moalbuma ye ndjoka ya tegelelwa koyendji.

“Onda kala ethimbo ele moongalo tandi kambadhala mpaka naampeyaka, okutula oshitalenti shandje komeho gaantu, ashike ompumbwe yoshimaliwa oyo ya kala nokulaateka ndje, Okukala wa za momuhoko gwAawambo kashi shi naana oshinima oshipu ngele owumuhikingalo, oshoka aakuluntu oye wete owala to mana po ethimbo,” 6Five ta ti ngaaka.

 Okwa ti paife oku li ta longo ongomulandithi pehala lyokunwa nokulya moshilando, opo a mone iiyemo ya gwana ye a pitithe oalbuma ye nawa. 6Five ngashingeyi oku li a shamga omaimbilo ga adha po 20, ashike omaimbilo ashike 11 taga ka kala ge li moalbuma ye ompe.

LEAVE A REPLY

Please enter your comment!
Please enter your name here