Aagundjuka yane ya ti omutumba ethete

0
35

Loide Jason

WINDHOEK – Kansela gwoshikandjohogololo shaKatana, moshitopolwa shaShana, Rosalia Shilenga oku li u uvite uunambano sho aagundjuka yane yomoshikandjohogololo she yi imanga uukuni kumwe e taya teya eteyo ewanawa lyiikwamboga.

Mbaka oya teya aniwa omatama, oonyanga, omanyangwa noshowo iikwamboga yi ili noyi ili mwa kwatelwa ondungu ozizi.
Shilenga shika okwa ti shika oshiholelwa oshiwanawa nomutumba ethete onkene aagundjuka naya tale yakwawo mboka taya ilongele yoyene inaya tegelela ashike epangelo opo ya makele sha, yo ya vule wo okuyambidhidha omazimo gawo.

Aagundjuka mbaka yane oye na aniwa oshikunino oshinene shi li momukunda Emono moshikandjohogololo tuu shoka sha tumbulwa pombanda.
Oshilyo shomutumba gwopashigwana pakansela okwa ti kutya okwa li u uvite uunambano sho a lombwelwa kutya ope na aagundjuka ya teya nawa iikwamboga moshitopolwa she.

Okwa ti edhina lyoshikuninino shoka olyo Uhuru nohaya longitha nduno omeya gwomokanaala hoka haka kunguluka omeya okuza komulonga gwaKunene, oku tekela iikwamboga mbyoka ngashingeyi tayi landithwa moshitopolwa.

“Iikwamboga oya pumbiwa momalutu getu opo tu kale tu na uundjolowele onkene mbaka oya pumbwa okupandulwa, aagundjuka oyendji omo ye li momikunda moka ihaya longo sha noya tegelela ashike aniwa epangelo lyi ya pe iilonga. Ashike mbaka oyi itumba shili,” osho kansela a hokolola ngaaka sho a yi moonkundathana naKundana mongodhi.

Okwa hala aagundjuka mboka ye li momahala ge li popepi nokanaala moshitopolwa she nenge miitopolwa yi ili noyi ili mpoka omeya ge li po goshali naya longe ngaashi naanaa yakwawo mboka.

Onkene otandi ya indile kutya okutameka noshikunino shomegumbo oshinima sha simana noonkondo oshoka omuntu oha tameke kashona e ta koko nale noshikunino sho.

Okwa ti kutya aagundjuka inaya tegelela shike ya pewe iilonga kepangelo , nomutumba ihagu eta po sha.
“ Otwa pewa omagano goondunge , oonyala nomagulu kuKalunga opo tu ga longithe ngaashi tatu vulu . Ye shiwanawa iha zi pokapala ka yela,” osho omupiya gwoshigwana a popi ngaaka u uvite uunambano.

LEAVE A REPLY

Please enter your comment!
Please enter your name here