Aalongwa oyo aatungipo yoonkalamwenyo dhawo yene “Shapumba”

0
45

Maria Namupala

ONDANGWA – Pethimbo a li ta popitha aalongwa ya za koosikola dha yooloka moshitopolwa shaShana, ngoka e li omunongeki moshitayi shoUniversity of Namibia kOgongo Shapumba yaShapumba okwa ti aalongwa oyo ye li aatungipo yoonkalamwenyo dhawo.
Ndhika okwe dhi popi sho kwa li kuunganekwa omasiku gaali gowina moka ya li taya kumikwa kombinga yomaithano ga yooloka. Epukululo ndika olya li lya unganekwa onomenawina opo aalongwa yondondo onti-10-12 ya za koosikooa dha yooloka ya hangane yo ya topolelathane omauyelele ngoka ye na po kombinga yomaithano ga yooloka.

Shapumba okwa yelitha kutya onkalamwenyo yomuntu kehe ohayi tungwa po okuza petamekweelela, nohayi ikwatelele komaihumbato gomuntu ye mwene, “aantu oyendji oyi iyadha ya landula omaithano ga puka nenge hago ya li ya dhiladhila molwaashoka inaya pewa omauyelele ga gwana petameko, yamwe ohaya hogolola omaithano ge na iimaliwa oyindji, kakele kaye na enyanyu pomahala giilonga, shino sha hala okutya oshiwanawa okulandula eithano lyoye,” Shapumba ta gwedha po ngaaka.

Oshinyangadhalwa shika osha li shu unganekwa nokukwatelwa komeho komugundjuka gomomudhingoloko Esther Sakaria, naasho twa yi naye moonkundathana okwa holola kutya oku na aalongwa komutima, nokwa li a mono ompito yoopala opo i ithane aaniikondo ya yooloka, oshowo aakalelipo yiiputudhilo ya yooloka monooli yoshilongo yo taya gandja omauyelele kaalongwa yoondondo dha tumbulwa metetekelo.
Ta ti omwa li mwa kuthwa ombinga unene kiiputudhilo yopaungomba ngaashi shokEenhana, DAPP, oshitayi shoUNAM kOgongo, Marco Mpollo, niikondo ngaashi Social Security, oshikondo shetanga lyegameno, oshowo Triumphant College.

Sakaria ta ti nonande shi li oshinakugwanithwa shiikondo yelongo miitopolwa okukwashilipaleka kutya aalongwa moondondo dhopombanda oya pewa omalongo taga kwatha oonkalamwenyo dhawo dhokomeko, okwa ti ye paiyambo okwa li a tokola opo a longekidhe oshinyangadhalwa shoka shotango, nokwa kwashilipaleke kutya ota kala ta longekidha omapukululo ngangoka omumvo kehe nokiitopolwa ya yooloka moshilongo.

Okwa gwedha po kutya okuuvite enyanyu netumba molwaashoka omahangano,iiputudhilo oshowo iikondo ya yooloka mbyoka a li a hiya oya yamukula pethimbo lyoopala noya tumu aakalelipo yawo mboka ya kwatha aalongwa uunene.

Ta tsikileko ta ti aalongwa mboka oyo aanelago molwaashoka yo pethimbo lyawo kaya li haya mono omapukululo ngoka nolundji oya li owala haya uvu omaithano gaali gatatu lwaampoka, ngoka ta ti oga kwatela mo ngaashi uulongi, uusitagongalo oshowo uupangi.
Iiputudhilo mbyoka oya li tayi gandja omauyelele kaalongwa, noya kala taya pula omapulo shi ikwatelela komaithano ngoka ya hala okulandula, oyendji oya holola ya hala okuninga ookoosa dhopaungomba uuna ya mana omailongo gawo.

Pethimbo lyomauyelele otwa li twa ningi oonkambadhala opo tu ye moonkundathana nayamwe yomaalongwa mboka ya kutha ombinga. Saima Ikango omulongwa posikola yEtambo momudhingoloko gOndangwa okwa ti okwa pandula okangundulongekidho sho ka mono shoopala opo ke ya longekidhile oshigongi moka ya tsakanene niiputudhilo oshowo omahangano ga yooloka, nokwa ti osho oshikando she shotango ta kutha ombinga, nokwa ti okwa likola mo uuyelele owundji.

Johannes Nande omulongwa pIihenda okwa ti ye okwa mono mo oshindji, ta ti shoka sha patulula iiyelo yonkalamwenyo ye, opo woo a kale a tonatitha omeho ge, ta ti ngaashingeyi oku shi kutya nani moshigwana omu na omaithano ga yooloka, noga pumbwa okulandulwa, ta gwedha po kutya ota ka topolelathana uuyelele mboka a monopo naalongwa ooyakwawo mboka inaaya mona ompito.

LEAVE A REPLY

Please enter your comment!
Please enter your name here