Aanambelewa moshikondo shuunamiti ya kutha ombinga momaudhano

0
21

Maria Namupala

ONIIPA – Ehuliloshiwike lya piti olya li lyopandjokonona moshipangelo shaNandjokwe, aanambelewa yopaunamiti oya li ya hangana pamwe nokukutha ombinga momaudhano ga yooloka mpoka.

Omuunganeki guudhano mboka Gebhard Katanga okwa yelitha kutya onga shimwe shomiilalakanenwa yawo moshipangelo shoka oya li ya thaneke opo ya longekidhe oshikando shotango omaudhano ga yooloka, moka mwa li tamu kuthwa ombinga kaaniilonga moshipangelo osho tuu shoka.

Katanga okwa ti oya li ya mono ethimbo lyoopala opo ya hanganithe aaniilonga, mboka ya li taya dhana omaudhano ga yooloka, “muudhano wetu otwa li twa kwatela mo ngaashi etanga lyokoompadhi, etanga lyomokambamba lyaakadhona, uudhano womithigululwakalo, okuhila ongodhi pu talike ngoka e na oonkondo dhi vulitha yakwawo, oshowo yilwe oyindji,” Katanga ta popi ngaaka.
Katanga ta ti oyali yuunganeke opo ya hanganithe aaniilonga, tashi pitile momukalo gomaudhano molwaashoka oyendji ohaya zimbuka owala yu uka komagumbo yo yamwe taya yi komahala gomanwino nokwa ti oya hala okuya kutha pomahala gomanwino yo taya kala taya nyanyukilwa pamwe, kaaya kale owala taya tsakanene kiilonga.

“Nonande shika sha li oshikando shetu shotango oshe tu tsu omukumo molwaashoka aanilonga oyendji oya li ya kutha ombinga noyendji oyu ulike eitulemo lyawo, nonkene ngame pamwe naalongekidhi yuudhano otwa thaneke opo tu kale tatu longekidha uudhano ngambuka omwedhi kehe, tse tu thuwithe po omadhiladhilo getu,” ta gwedha po ngaaka.
Okwa gwedha po kutya olundji aaniilonga ihaya mono ompito okukutha ombinga momaudhano ga yooloka, nonkene osha thiminike aaNandjokwe ye ye po nomadhiladhilo ngoka. Ta ti uudhano owa simana molwaashoka ohawu nkondopeke nokukoleka omalutu, okukuthapo owike nayilwe oyindji.

“Ohashi kala sha simana uuna aaniilonga ye na omalutu ga kola noga pama, omaudhano ohaga tungu omalutu gaantu, yo taya tula uuluyi wawo pomahala, shika otashi nkondopeke omalutu, oku ga tunga po, go ga kale ge na oonkondo ethimbo alihe, nokukala taya vulu okulonga sha nokugwanitha po iilonga yawo ayihe,” Katanga ta gwedha po.

Okwa ti otaya kala taya unganeke omaudhano ga yooloka momukokomoko gomumvo, yo ya dheulile aaniilonga yawo omaudhano, yo taya yambulapo ohokwe yawo yomaudhano. Ta tsikile ko ta ti aaniilonga oyuulike elongelokumwe, noya dhana mombepo ombwanawa.
Molwaashoka omaudhano gawo oga li omalolelo, kapwa li tapu gandjwa omasindano molwaashoka ayehe oya li taya dhana nelalakano lyokutunga po omalutu nokunyanyukilwa pamwe, ashike okuuvaneke kutya omaudhano ga landulako otaya ka gandja omasindano kwaamboka ye gi ilongela, ta kumike aaniilonga ayehe ya kale taya kutha ombinga nokunyanyukilwa pamwe.

Kakele komaudhano yamwe yomaaniilonga oya li taya yogo oohauto, noku dhi opaleka onga omadhewo gomalutu gawo.

LEAVE A REPLY

Please enter your comment!
Please enter your name here