Ehangano lyoBasketball lya opaleka okapale koBasketball pErundu

0
6

Shipi Elago

Oshakati – Onge oshitopolwa shomapendulepo gwuudhano wobasketball moshilongo, ehangano lyoBasketball lya fufupikwa NBF olya li lya manitha eyopaleko lyokapale kobasketball posikola Erundu noku ka gandja miikaha yelelo lyosikola Etiyali lya zi ko.
Okapale hoka ka li ke li monkalo ya nyayika noka li ke na iilongitho kayi li we pamuthika oka li ka pewa oshinge konima sho ka li ka pewa oshali yiilongitho ya kotha konyala N$ 11 500.

Pethimbo sho a li ta gandja okapale haka pambelewa kelelo lyosikola ndjika Elifas Haifidi ngoka e li omukwatakanithi gwopolohalama yomapendulepo gwomawudhano gobasketball monooli okwa li a holola kutya okapale haka otaka kala eliko lyosikola Erundu onkene naye ka kwate nawa.

Okwa ti shika oye shi ningi opo ya kwathele uunona mboka hawu longitha okapale haka opo wu kale hawu dhanene mokapale ke li monkalo ombwaanawa notayi hokitha.

“Etumwalaka ndi na kune aadhani olyo ndyoka kutya, kalekeni po okapale haka ngaashi tashivulika, lopoteni kehe ngoka ta ka kambadhala okuteya po iilongitho mbyoka yi li pokapale mpaka, kutheni ko oshinakugwanithwa shokwoopaleka okapale haka uuna sha pumbiwa ne mu ka sile wo oshimpwiyu,”Haifidi ta ti.

Okwa ti osikola nayi kuthe ko oshinakugwanithwa shokusila okapale haka oshimpwiyu opo ka kale taka kwatha okumuna iitalenti oyindji nokomapipi tage ya.

Omukuluntusikola gwopakathimbo Ismael Shapange okwa li a gandja olupandu lwe ko-NBF sho ya yumudha po uudhano mboka wa li tawu hala okuhula po, ta ti otaya ka longitha okapale haka muuwanawa woshigwana shokomongula noosipana dhobasketball odha manguluka okulongitha okapale haka.

Opoloyeka ndjika oya li ya kwatelwa komeho kaayiyambi ya za koNdowishi Louisa Plaisir naKilian Stahlhot mboka ye li haya dhewula uunona omathele moosikola muudhano wobasketball.

LEAVE A REPLY

Please enter your comment!
Please enter your name here