Epangelo ole litula mo mokuyambula po Aus

0
40

Tuulikki Abraham

Aus – Ou ta kwafele momafaneko okuhumifa komesho oshitopolwa sha//Kharas okwa tumbula kutya elelo loshitopolwa sha//Kharas oli na omafaneko okuhumifa komesho omukunda oAus.

Wilbard Kambonde okwa tumbula edi pefimbo Kansela woshikandjohoololwa sha!Nami#nis Jan Scholtz a li ta yandje pambelewa oundjuwo ve li 24 vokupomba voovene, momukunda o Aus, sha ningwa mEtivali loshivike eshi.

Kambonde okwa tumbula kutya pamutengeneko woshimaliwa shomudo 2017/2018, elelo loshitopolwa sha//Kharas ola yandja oshimaliwa sho N$3 million osho sha longifwa mokutunga oundjuwo aveshe kumwe ve li 154 hava pombo, ovo va pingena po oundjuo vomavela ovo va kala hava longifwa momukunda ou.

Okwa tumbula kutya oundjuo ve li 24 ovo va yandjwa koovene oshivike eshi, ovo ashike va li va hupa ko, nova kwatelwa momwaalu woundjuwo ovo ve li 154 va tungwa moAus.

Kambonde okwa kufila ko ovakalimo vomoAus e shi ninga ponhele yomupeduwiliki oo e na sha nomafaneko okuyambula po oshitopolwa sha//Kharas Ralph Sachika, oo ina dula okuholoka omolwa omaimbo.

Kambonde okwa tumbula kutya kasha li oshipu okupondola oprojeka oyo ya tunga oundjuwo moAus, nokwa pandula ovanambelewa ovo ve lile po onhele yolukalwa yaAus oshoyo ovakalimo vomoAus, eshi va longela kumwe nokufikamifa po oundjuo ovo tava longifwa paife kovakalimo aveshe.

Okwa timaumbwilifa ovakalimo vomoAus kutya elelo loshitopolwa sha//Kharas oli na omafaneko taa twikile okuhumifa komesho onhele eyi novakalimo vavo aveshe. Ta ti momu tengenekwamwaalu wodula 2018/2019 okwa fanekwa taku ka longifwa oshimaliwa sheemiliona N$6, nomodula 2019/2020 okwafanekwa taku ka longifwa eemiliona N$4 osho yoo mo 2020/2021.

Kambonde okwa udaneka oimaliwa aishe yeedula odo ya fanekwa tai ka longifwa mokuyandja omayakulo moAus, ngaashi okutula omayakulo omeva, nokutula po ominhino donyata, opo pe na omaumbo naapo tapa ka tungwa omaumbo moAus.
Okwa indila ovakalimo vomoAus va kale netimaumbwile kutya ehumokomesho otali ende la yuka moAus.

Penomwaameni Shadjuuka naSelma Kutyowa, ovo ve li mongudu yaavo va pewa oundjuwo oshivike eshi moAus, inava holeka nande ehafo olo ve na mokupewa oundjuo ovo hava pombo. Noitya ya faafana ova pandula epangelo eshi le va tungila oundjuo hava pombo, nova indila aveshe ovo va mona elao eli loundjuwo ve va longife noukeka nokuvakaleka va yela.

LEAVE A REPLY

Please enter your comment!
Please enter your name here