Olweetho lwotango lwoNorth West First Division lwe ya pehulilo

0
16

Shipi Elago

Oshakati – Omapu oge li pokuza mumwe noongongo moliha yoNorth West First Division, sho oliha ndjika yi na ko owala omawudhano taga yalulwa.

Ehuliloshiwike lya za ko oosipana odha li dha manitha edhingoloko lyotango lyoliha ndjika , moka oosipana odhindji unene tuu dhokonooli dhi li tadhi li tadhi pi.

Ongwediva City oyo yimwe yomoosipana dhokonooli yi li muudhigu wu vule oonkondo dhawo noya pumbwa okulwa ya tula ombunda moshihwa edhingoloko etiyali sho ta li ka tameka oshoka ngele oya dhana uulangedhi nena otayi ka adha ya shuna koSecond division hoka ya li ya yambukile.

Ongwediva City oya kuutumba pevi lyongundu yoosipana dha A moka yi na ashike iitsa iyali noya pumbwa oonkondo oonkwagulu opo dhi ya kwathele opo dhi ze mokakololo koosipana ndhoka tadhi ka umbwa mo moliha.

Konyala oosipana dhokonooli odhi li tadhi lu ondende na kadhi li pomahala omawanawa moliha moongundu adhihe kakele kaAfrica Motto ngoka oye ta pangele ongundu yoosipana dha B niitsa 9 na oku li nale koontuni dholiha ndjika, ashike okwa li a hunutha ompito yo ku nkondopaleka ehala lye pombanda yoshitafula shongundu ya B osondaha yazako moka ali a kanitha uudhano we wa hugunina 1-0 kuUNAM Ogongo.

Mongundu ya A Golden Bees okwa li a gwithwa ko koshipundu kuMilitary School konima sho a kala ta pangele ongundu ya A ethimbo nuule.
Oosipana dhomonooli nando odhi li odho dhi na omwaalu ogundji moliha ndjika odha ndopa oku ulika kutya odhi na ohokwe yokugalulila uudhano woPremier League konooli.

Oyendji oya li ye wete kutya molwomwaalu gwoosipana dhokonooli ndhoka tadhi dhana onkandangala moliha ndjika nena oombwa dha kwata odhawo ashike monkalo moka oosipana tadhi dhana otashi tula aatali yokatanga momalimbililo.
Oosipana ndhoka tadhi ka sindana po oongundu ndhika mbali otadhi ka ya momawudhano gwopaali moka omusindani oye ta ka sindana po oliha ndjika nokumona wo ompito yokuwayimina NPL Namibia Premier League.

Ngele oongundu mbali odha sindanwa po koosipana dhokonooli shika otashiti oliha yopombanda oya galukila monooli sho olweetho olupe talu ka tameka , ashike ngele ongundu onkwawo oya sindanwa po kosipana yokuushimba nena aakalimo yokonooli oye na okutegelela sigo okominute gwahugunina ya tale ngele otaya kala haya tala uudhano woliha onene moshilongo tawu dhanenwa monooli nenge oye na okutegelela natango konima yomvula ya tale ngele genongo otaga fe tuu gongombe.

Kombinga yimwe oosipana dhokuushimba dhoka dhi li moPremier league odhi li tadhi dhana okagulu notashi ka kala onkundana ombwaanawa oku uva kutya kape na osipana yokonooli tayi dhana moliha ya-NPL oshoka otashi ke ya konda omagulu oku enda iinano iile okuya ya dhane konooli oshoka oosipana odhindji dhomuushimba odhi li nale hadhi nyenyeta kutya ohadhi longitha oonzo odhindji.
Oosipana ngaashi Onambula United naKK Palace odhi li dha geelwa koyendji oshoka odha ndopa okulongitha ontseyo yadho ndjoka ya ye na moliha ndjika ya kala nokudhanena ethimbo nuule ashike itadhi ulike dha fa dha kala mo moliha ndjika.
Omeho gwoyendji oga ligamena kolweetho olutiyalii ndoka inalwu tseyika natango kutya otalu ka tameka uunake.

LEAVE A REPLY

Please enter your comment!
Please enter your name here