Omukiintu a tomeke oombashu omundilo molwohole tayi tengaatenga

0
1316

Loide Jason

WINDHOEK – Aakalimo yomolukanda Oshitenda moKatutura mOvenduka oye li ya limbililwa sho omukiintu ngoka e li metegelelo a fike po okandingosho noondunda mbali dhokulala sho aniwa ina halika we komulumentu gwe.

Oshiningwanima shika osha holoka petameko lyoshiwike shika uusiku sho aniwa mbaka yaali ya li moondjuma oondulu nokulwithathana .
Kansela gwoshikandjohogololo shaTobias Hainyeko Josef Likuwa okwa hokolola kutya aniwa oombashu dhi li mbali dhokulala nepeleki limwe lyomalandithilo olya pya sho omukadhona ngoka a tomeke ombashu omundilo moka hamu zi omulumentu gwe ngoka a hulitha po iihole yawo.

Likuwa okwa ti shoka sha etitha opo omulumentu ngoka a hulithe po iihole yawo inashi shiwika ihe oshi shiwike ashike komulumentu ngoka e shi ninga.

“Sho nda talele po ehala ndyoka, mboka yaali inandi ya mona nonda popya ashike nooyene yoombashu mboka nda lombwela ya tule iinima yawo kumwe ayihe mbyoka ya pila mo mompile ndjoka,” osho omunapolitika a hokololele Kundana mongodhi sho a gandja ehokololo.
Okwa koleke kutya mbaka yaali aniwa kaya li ye na ombili naaluhe oya kala nokupiyaganekathana shoka ta ti kasha li mondjila nonande okwa ti ke shi shoka sha kutha po ombili ndjoka.

Likuwa okwa tsikile ko ta ti ongushu yiinima mbyoka ya pila mompile ndjoka itayi vulu oku popiwa manga oshoka ombelewa ye oyali ya tegelela mboka ya longelwa omunyonena ya ete uuyelele mboka kombelewa.
“Sigo ongashingeyi aantu mboka otwe ya tegelela kombelewa opo ye tu etele uuyelele wa gwana oshoka mboka tu na po ngashingeyi kawu shi wothaathaa,” kansela a ti ngaaka.

Okwa ti shi ikololela kuuyelele mboka a mono po sho a talele po ehala ndyoka omalovu ngaashi oonamunate noshowo iikolitha yimwe yi ili noyi ili oya li ya yangatwa po thilu kondalu yanelyanga.

Ashike omupiya gwoshigwana okwa ti ombelewa ye ngashingeyi kayi na omakumbatha noshowo omatalashe ihe otayi ka kwathela okugandja iipeleki noshowo oopaala opo mbaka ya kale ya dhika po oombashu dhawo ndhoka dha pya po.

Ashike omusimanekwa okwa ti shika otashi ningwa meendelelo oshoka uutalala owu li uunene metifa na ina hala mepangelo lyoHarambee mbaka ya se kuutalala oshoka Harambee otashi ti kutya hamuntu ta ka pitililwa po kuuwanawa wepangelo.
Kundana okwa ningi onkambadhala okukonga mboka ya longelwa omunyonena opo a uve ngele nguka ope na oshipotha sha patululwa ihe ina pondola sha oshoka kaya li ye wetike.

LEAVE A REPLY

Please enter your comment!
Please enter your name here