Ondjila yaSelma …okuza kuusekuliti nokuninga omunambelewa a longwa

0
1083

Shipi Elago

OSHAKATI – Shiwanawa ihashi zi pokapala ka yela. Osho okakadhona okagundjuka Selma Nathingo ka lombwele aanona yosikola, sho ka li ka kutha onkatu oku enda noosekundosikola 13 moshitopolwa shaShana opo ka tse aalongwa yomondondo onti-12 omukumo meyilongo lyawo noku ya hokololela onakuziwa yako ndjoka ya li itayi nuwa omeya.

Selma okwa holola miipopiwa ye kutya oku li gumwe gomuunona Uunamibia mboka wa mona iihuna molwonkalo yoluhepo nokwa li e shi pondola okuhwepopaleka onkalamwenyo ye nando okwa li eende muudhigu wamemememe nomashongo gwonkalamweno ngoka ga li taga vulu okuteyagula po onakuyiwa ye.

Pethimbo a li ta tsu omukumo aanasikola pErundu mOshakati, Selma ngoka ngashiingeyi e li omunambelewa gwoonzo dhaantu (Human Resource Practitioner) mOshana Regional Council okwa li a holola kutya konima sho a li a mana ondondo ye onti-12 ka li naana a mona iitsa ya gwana onkene osha li oshidhigu opo a taambwe kiiputudhilo yopombanda.

“Onda li ndi iyadha kapu na ngoka ta vulu okupa ndje oshimaliwa opo ndi ka tsikile neyilongo lyandje ashike shika inashi teya ndje omukumo, onda li nda mono iilonga yuusekuliti moka nda li ndi na okulonga opo ndi tale ngele otandi mono mo okathilinga opo ka kwathele ndje meyilongo lyandje, sho ndi li muusekuliti onda li nda taambwa moshiputudhilo shoLingua College moka nda li nda tameke nokoosa yandja yoHuman Resources,” Selma ta holola.

Muusekuliti Selma okwa li a kala mo okathimbo okafupi nokwa li a mono po iilonga yilwe yokulonga momagumbo moka a kala noku opaleka opo wo tuu i imonene okathilinga ye a humithe komeho eyilongo lye.

“Elalakano lyandje opo ndi kuthe iikonga mbika yokukumika aanasikola onda hala oku egulula uuluyi waalongwa unene tuu mboka ye na ko ashike oomwedhi oonshona opo ya thige po enongelo, oshoka olundji aantu ihaya gandja uuyelele wi ihwa po kombinga yonkalamwenyo yokonima yenongelo,” Selma ta tsikile.

Okwa li a lombwele aanasikola kutya dha londoka ihadhi yi iita, onkene na ya dhiginine eyilongo lyawo opo ashike taya ka kala ye na onkalamwenyo yi li nawa.

Ngele ope na ngoka to ki iyadha monkalo ngaashi ndjoka ya li ya adha ndje pethimbo sho nda li nda mana osikola, ino tula omutse kepepe, ino kala omutumba oshoka omutumba ethete, longa kehe shoka to vulu opo wi imonene okathilinga ngoye wu vule okuya ponkatu ya landula ko ngoye wu adhe iilalakanenwa yoye.

“Ashike okulanditha po omalutu nokuteya omaliko gaantu hayo iilonga tandi popi mpaka oshoka oyendji yomaanyasha mboka haya thigi po ondondo onti-12 ohaya ningi iihakanwa yiinima mbika naashika kasha na mpo tashi ku fala, otashi ku fala owala kokwena kwa hula,” Selma ta ti.

Okwa tsu aalongwa omukumo ta ti kapu na shidhigu ha nyenge mwene, ko kokule ihaku thikwa ongula.
“Yanona ne ilongeni mwa mana mo onkalamwenyo yomomapandaanda kayi shi ompu onkene ilongekidheni nawa opo kamu ka mone iihuna oshoka oompito dhiilonga otadhi ende tadhi thinana unene tuu ngele omuntu ina mona elongo lyothaathaa konima yondondo onti-12,” Selma ta tsikile.

Iikonga mbika Selma ote yi longo oshali nota longitha oonzo dhe oku adha oosekundosikola 13 moshitopolwa shaShana, kepulo kutya ote shi ende ngiini opo a gwanithe po oonzo a adhe oosikola 13 meni lyethimbo efupi, Selma okwa li a yamukula kutya shidhigu iha nyenge mwene.

Selma oku na onkatu yuulongelwe moHuman Resources noku li ha longo mOshana Regional Council onga omunambelewa gwoonzo dhaantu (Human Resources Practitioner)
Okwa holola wo kutya iikonga ye yokuhwahwameka aanasikola yi itule melongo oya pewa eziminino komukuluntu gwelongo moshitopolwa shaShana.

LEAVE A REPLY

Please enter your comment!
Please enter your name here