Shivute a hogolululwa natango a kale omukuutumbithi mOshikoto

0
79

Maria Namupala

OMUTHIYA – Konima ashike sho kwa li kwa ningwa omahogololo gowina mokati kookansela melelo lyoshitopolwa shaShikoto, opo ku hogololwe omunashipundi oshowo iilyo yokomitiye yomutumba, ngoka a li omunashipundi Samuel Shivute natango okwa galulilwa oshipundi she.

Omahogololo ngaka oga li ga ningwa pombelewa yopashitopolwa mOmuthiya Etiyali lyoshiwike shika, noga li ga kwatelwa komeho komupanguli Isabella Tjatjara, ngoka woo oye a li a ganithile mboka ya hogolululwa miilonga.

Ookansela ayehe ya kalelapo iikandjohogololo ya yooloka moshitopolwa oya li ya gongala, oshowo aakalelipo ya za kokakomisi komahogololo, kansela Victoria Shikongo ota wilike oshikandjohogololo shaLukonda,Iiyambo Indongo Onayena, Jerry Ngwena Oniipa, Petrus Kambala Onyaanya, Sackey Nangula Omuntele, Protasius Neshuku Eengodi,Samuel Shivute Omuthiya ,Betty Kaura Guinas, Lebbeus Tobias Tsumeb,Hansa Nambodi naReinhold Shiningombwa a kwatela komeho Nehale lyaMpingana.

Oya li ya hogolola mboka taye ya kwatele komeho melelo lyaShikoto moka Shivute a hogolululwa a ninge natango omukuutumbithi gwelelo lyoshitopolwa shoka, Sackeus Nangula, Jerry Ngwena naIyambo Indongo oya hogololwa ya kale iilyo yokangundumutima, ayehe oya galulilwa iipundi yawo.

Omunambelewa omukuluntu melelo lyopashitopolwa Frans Enkali okwa yelitha kutya omahogololo ngoka ohaga ningwa aluhe konima yoomvula mbali noomwedhi hamano, sho ethimbo lyawo lye ya pehulilo, nopakatendo oka-109 (3) mekotampango lyoshilongo oka gandja elombwelo opo iilyo yi hogolululwe konima yethimbo lya tumbulwa metetekelo.

Ta ti ethimbo lyawo olyeya pehulilo lyaMai nuumvo, noya landula ekotampango nokugwanithapo ooveta dhoshilongo. Enkali okwa pula iilyo pamwe nookansela ya tsikile okulonga nuudhiginini nokugwanithapo iilonga yawo, yo ya kale omeho gepangelo kiikandjohogololo yawo.

Omukuutumbithi pethimbo a pewa ompito a tye sha okwa pandula ookansela adhihe sho dha kala tadhi longo muukumwe nokwe ya indile ya ende ondjila yimwe yo ya yambule po noku eta omahumokomeho ngoka ga pumbiwa moshilongo.
Ta ti ookansela odha pumbwa ekwatathano ewaanawa noshigwana opo dhi tseye shoka oshigwana sha pumbwa , noku ya tsa omukumo ya gandje aluhe omakemo nomathaneko gawo.

“Tu kaleni tu neni ohole yoshigwana tse tu kale tu na eitulemo miilonga yetu ashike haku gandja omauvaneko giifundja ngoka itaatu vulu oku ga gwanitha po, natu longeleni oshigwana shoka shi li mondjila tse tu uve aluhe omakemo gawo,” Shivute ta ti.
Shivute okwa uvaneke ta tsikile okutalela po omahala ga yooloka moshitopolwa, oosikola oshowo okulonga kumwe nooyene yomikunda oshowo aaleli yopamithigululwakalo okukandula po omashongo unene ngoka ge ya palamena, ta ti oya taalelwa unene keshongo lyaakwashigwasna taya longitha iikolitha sha pitilila yo itaaya landula ooveta dhoshilongo.
Moshitopolwa shaShikoto otamu adhika iikandjohogololo omulongo nashimwe (11).

LEAVE A REPLY

Please enter your comment!
Please enter your name here