Suzy Eises a gwitha aatali kiipundi

0
117

Komutoolinkundana

WINDHOEK – Omuhikingalo a tseyika nawa moNamibia Suzy Eises okwa li a ningi a ningi oshikonga shokuhika oongalo nelalakano lyokugongela oshimaliwa moSafari Court Hotel oshiwike sha zi ko mEtitatu, oshimaliwa shoka tashi ka longithwa melongo. Uusiku mbuka wa li wa talala owa li wa shituka uusiku uuwanawa kumboka ya li poshiindingili shoka, ya li taya li uulalelo tawu tokola elaka, taya nu uukunwa wawo manga ya pulakena komukwelengendjo gwoongalo dhoJazz yo ya tala sho Suzzy te shi enditha.

Omwali wo mu na aahikingalo yopondje yoshilongo Dan Shout a za koSouth Africa naIan Darrington a za koUnited Kingdom. Shout, ngoka a putukila mOranjemund okwa li a gwitha aatali kiipundi, omanga Ian Darrington, ngoka a tota po Wigan International Jazz Festival a li wo a fuula aatali. Suzy ke shi ashike omuhikingalo ashike oku li e na ohokwe nelongo niiningwanima yomoshigwana mbyoka ya palamena aagundjika Aanamibia. Ndika olyo etompelo a tota po Physically Active Youth (PAY) moKatutura. Onkene okwa ningi egongelo lyoshimaliwa opo a vule okufuta iinyangadhalwa yimwepo mbyoka a hala oku adha.

“Ngame ondi li oshitopolwa shepipi ndyoka kaali na ashike ohokwe okulundulula oshigwana okupitila moongalo, ondi li wo ndi itula mo okuninga elunduluko menenevi Africa. Naashika onda itaala kutya otashi ningwa ashike uuna tandi tsikile mogwesha uunongo wandje nokunkondopeka aagundjuka yalwe mboka inaaya mona ompito yoku ilonga okupitila moongalo.

Ehangano lyaSuzy ohali longo naagundjuka mboka ya za miitopolwa tayi dhengwa koluhepo moKatutura, tali kondjele uundjolowele, elongo, ehumitho komeho lyuunongo osho wo onkalonawa yaakwashigwana. Opolohalama ohayi gandja etonatelo kaanyasha, tayi ya kwathele ya gwedhe ko kiizemo yawo, okushonopeka iimbuluma osho wo okugamena aanyasha yaa ye momilalo inaadhi gamenwa nokulongitha iingangamithi.

Konima sho a li a sinda po omapole goAlbuma dhingi osho wo omuhikingalo omupe dhingi kooNAMA Music Awrds, Suzy okwa tsikila nokwi ishangitha koAfrican Music Institute. Opo ye shi pondole moshiindingili shika, omahangano oga futa oshimaliwa shoo N$10 000 moshitaafula omanga oohandimwe ya futa N$1000. NBC, Space Dimensions, Appletiser noLumiere oyo ya li ya kwashilipaleke oshiindingili shika.

LEAVE A REPLY

Please enter your comment!
Please enter your name here