Usko Nghaamwa a lukilwa osikola

0
44

Victoria Kaapanda

OHANGWENA-Ngoloneya goshitopolwa shaHangwena okwa lukilwa osikola yoshikunino, tayi ithanwa Usko Nghihepavali Nghaamwa Kindergarden, shika osha ningwa Olyomakaya ya zi ko, momasiku ga07 Juni 2018 mondoolopa yaHelao Nafidi moshikandjohogololo shaHangwena.

Ngoloneya okwa lukilwa osikola ndjika yopetameko komukuluntusikola Frieda Shangadi pamwe naalongi ooyakwawo. Shangadi ngoka kakwa li a mona ompito yokuthika okwa li a popi moshinyolwa she shesiku, shoka sha leshwa komuhongi gokosikola Nakambunda Combined School. Okwa ti elalakano lyokulukila ngoloneya olyo ndyoka kutya Nghwaamwa oye ongudhi yokonakuyiwa, oku na ohokwe ne alakano nelongo, ye natango okwa longela uuminesteli welongo oshindji, nomukalo omwanawa gokumupandula ongele ta lukilwa osikola.
Ngoloneya okwa li a longitha oshimaliwa sha konda pooN$ 45 000, mbyoka a kutha mondjato ye mwene okutungitha oongulu dhosikola ndjoka. Oongulu odhi na omala omanene ge li gatatu, ngoka gaali tamu vulu okutaambelwa uunona wu thike pomilongo ne nela limwe ndyoka tali kala ombelewa yoshikunino.

Nghaamwa okwa popi ta ti okwa pandulo sho a lukilwa osikola ndjoka, oshoka yo nelongo ookuume aanene, nohole ndjoka e na nelongo kayi shi kuyelekwa.

“Ngame ompito yelongo inandi yi mona, omolwa aakuluntu yandje ya kala nokutumandje ndi kale tandi takamitha iimuna, ashike itandi ya pe ombedhi oshoka iimuna okwa li ya simana noonkondo kaakuluntu nondi na oku uva nokusimaneka aakuluntu yandje sho taya ti”. Nghaamwa ta ti ngaaka.

Ngoloneya ta gwedha po ta ti elongo nali kale oshinima shotango kukehe omuvali, elongo olyo oshipatululo shokukupatulula onkalomwenyo nonakuyiwa yakehe omunona. Okwa gandja oshiholelwa ta ti ethimbo limwe owu na omunona a pita nawa ihe okwa kuutumba megumbo, ihe omuvali ota ipopile kutya ke na sha oshimaliwa shokutuma omunona kosikola, ashika oku na oshigunda shu udha iimuna.
“Landitha oshimuna shimwe e to tumu omunona kosikola. Pamukalo ngono oto kunu, omunona ngono oku na kugaluka uuna a mana osikola e teya e ku kwathele.” Nghaamwa ta ti.

Omupopi gwesiku ndika, Minista Gwuukwashikekookantu, Uuthikepamwe nOnkalonawa Yuunona Doreen Sioka okwa li a popi esiku ndika lyoku egulula oskola ndjika pambelewa ta ti nampongo na gwedheleko ngoloneya kwaashoka ta longo, ota longo iikumithalonga iiwanawawa, mbyoka oyendji inaye yi longa.

“Usko Nghaamwa ngoye owal ongwa, oto uvitha ndje nayi sho to ti ino longwa omolwompito ndjoka inomona yokuya kenongelo, ashike ngame ote ti owa longwa uunongo woye uuvalelwa mo,” Sioka ta popi ngaaka.
Uuministeli we owa li wa gandja omagano guudhanitho wu na sha neyilongo lyaanona, iikwatelwa, uupelende noyindji yi na sha nelongo lyaanona kosikola ndjika ya lukilwa ngoloneya gwaHangwena.

LEAVE A REPLY

Please enter your comment!
Please enter your name here