Edhingoloko Etiyali lyOshikoto Second Division lya tsimika ontsi

0
41

Shipi Elago

OMUTHIYA – Oosipana ndhoka hadhi kutha ombinga methigathano lyoosipana dhopevi moshilongo mOshikoto odhi li dha tsimika ontsi kombanda yomeya okutala ngoka ta ka kutha po oshihani sholiha ndjika nuumvo.

Oliha ndjoka ya thinda komukundalili oyi li ya mbwalangandja natango na kapu na efano lya yela kutya otayi ka fadhuka po nalye sho uudhano wahugunina wedhingoloko lyahugunina tawu ka ya mondambo.

Safile United okwa li a mana edhingoloko lyotango e li pombanda yoshitaafula ashike ehuliloshiwike lya za ko okwa li a dhana uulangedhi konima sho a li a dhengwa kuVolcano 2-3 nokutula onakuyiwa ye kombanda yoshitaafula monkugo yi na onkambe.
Ondangwa United oya li yi ithigi othika naMama Love 2-2, Omandengu United 3-2 Omuntele.
Mosoondaha Volcano okwa li i ithigi othika 3-3 noNine Eleven, omanga Mama Love a li a hanagula po Omandengu United 3-0.
Onathinge United oya li ya dhenge mo Omuntele 2-1 .

Omasipa omanene ihaga pi mombiga yimwe na ngengele oondjamba mbali tadhi kondjo omwiidhi ogwo hagu mono iihuna, oosipana dholiha ndjika kehe yimwe otayi ulike oonkondo noya hala oyo yi kale kombanda yoshitaafula uuna oliha tayi ka pwa.
Ehuliloshiwike ndika pokapale kUukule, Omuntele Warriors ota ka patulula okapale naNine Eleven potundi oyimwe yomutenya omanga potundi ontitatu yokomatango Omandengu United otaga ki ikwata nOndangwa United.

Newcastle United otayi ki ikwata
noYoung United okuzilila pokapale kaOscar Norich moTsumeb potundi oyimwe yomoshanga shomutenya.
Mosoondaha pokapale kUukule Omandengu United otaga ka tema omulilo naNine Eleven, potundi ontitatu yomutenya.
Mosoondaha okapale kaOscar Norich Stadium otaka ka patululwa kuNewcastle naVolcano potundi oyimwe yomutenya.
Young United ota ka kondjithathana nOnathinge United pokapale ka Oscar Norich moTsumeb potundi ondatu yomutenya.
Oosipana dhoSecond Division mOshikoto natango inadhi longitha ompito yokudhanena mokapale hoka ke li p muthika gwopawuyuni.
Omukwatakanithi gwoliha ndjika Johannes Adreas ota ti oosipana odhindji kadha li tadhi vulu okulongitha okapale haka oshoka momuthiya kamu na nando osipana hayi dhana moliha ndjika noosipana odha li dha longitha uupale mboka wu li popepi onkene osha li oshidhigu okulongitha okapale okape ke li kondoolopa yaMuthiya.

Johannes okwa li a holola kutya oshi li shimwe shomiikundathanwa yoshigongi shoka ya taalela okutala nkene oosipana dhi na okukonga ondungethano okukala hadhi dhanene mokaple kongwena yopashinanena.
Johannes okwa li wo e tu yakele ko kutya oosipana mbali odhi li dhi ikutha mo moliha ndjika molwa uukule wondjila noosipana ndhika odho neeGhetto United nOshikoto Nampol.

Osipana ndjoka tayi ka sindana po oliha ndjika otayi ka wayimina omawudhano gwomalolelo gwokuya koliha yoNorth East First Division ndjoka oyo yi li osheelo shokuya koPremier Liha.

LEAVE A REPLY

Please enter your comment!
Please enter your name here