Efiku lokaana kaAfrica otali ti naanaa shike?

0
29

Dr Paulina Uugwanga

Efiku 16 June olo tali dimbulukiwa omwedi ou, ola nuninwa okudimbuluka nokufimaneka ounona vaAfrica ovo va kufile ombinga moikonga yomolukanda laSoweto moSoth Africa modula 1979. Moikonga omu vahapu ova kanifila mo eemwenyo davo mokukondjela oufemba wavo ongounona unene shi na sha nelongo. Efiku eli ola hoololwa yoo okudimbulukifa Africa kombinga yongushu yokaana unene mekwatafano nomadilaadilo ongongahangano mounyuni, opo oufemba wounona mounyuni u fimanekwe. Namibia naye oku li wo moilongo mounyuni oyo ya shaina etwokumwe eli li na sha neameno nefimaneko lounona.

Omunhu oto dulu okupula kutya: Omolwashike okaana kaAfrica ke na ku liyoololelwa mo nokupewa efiku lako?
Ounona ova talika ongo inava kola palutu nopamadilaadilo noinava kula, nomolwaashi onghalo omu ve li oya pumbwa kuamenwa nokufilwa oshisho nomoAfrica yoo. Eameno eli ola teelelwa oku etwa po komunhu keshe naunenene nee ounona ovanhu va ameneneka koveta yopaKotamhango. Eameno lounona pamhango yOngongahangano yOunyuni oya kwatelamo yo ounonona va dalwa ile inava dalwa natango, hano ve li momadimo.

Hano, efiku lokaana ka Africa, oli lilepo okutu dimbulukifa oshinakuwanifwa shetu oku amena ounono, nokuva fila oshisho. Eshi osha kwatelamo ounonoa vetu tweva dala pambelela, noshoyo ounona veli mefiloshisho letu ile tuu apa hatuva hange
Oshisho eshi osha fimana unene eshi penya naapenya hatu udu eenghundana dinyanyalifa kombinga yomahepeko ounona vadalwa ile inava dalwa natango ile pefimbo lokudalwa kwavo. Eenghundana domahepeko taa ningilwa ounona moshilongo shetu oda duka nodapumbwa oku katukilwa onghatu idule ei ilipo.

Luhapu ohatu udu okaana okadipawa komudali, xe ile ina, katuwa nomikonda molwa onghone pokati kovadali, kaxhwikwapo ile kaekelwa momeya. Ounona va Namibia ova iwa navo momilele, hano va kwatwa onghonga kutya oumati ile oukadona. Vamwe veshi ningilwa nokuli kovanhu vedule pu umwe ile vavali, navamwe veshi ningilwa kovakwanedimo novapambele. Ovanhu vamwe paife otava vakepo ounonona nokuvalandifapo ongoipindi koilongo yopondje. Pefimbo lopaife ohatu udu ounonoa vaekelwashi pefimbo lokudalwa kwavo ile manga inava fika okudalwa. Edi odo eenghundana tadi dana onghandangala moikundaneki nomomapeko opolifi pefimbo lonena
Oinima ei eshi ndei tala otai holola pena omadidiliko mai moshiwana apumbwa ekwafo. Unene, oshiwana osha pumbwa unene ekwafo nelidopomo kombinga a)yoveta nelandulafano, b)elongo neputuko nexumokomesho, noshoyo omilandu dowina dinasha nefiloshisho lounona vehena efiloshisho.

Ei ohandi i fatulula pauxupi ngaashi tashi landula:
a) Oveta nelandulafano
Olo edilaadilo lange kutya ngeno ehepeko lokaana nali katukilwe onghatu yadiinina idule eenghatu dikwao omolwa oukwatya wokaana wapopiwa nale metetekelo oo itau pitike okaana keli amene ile keli popile koovene komahepeko. Oshiwana inashi shiivifilwa ashike eshi omahepekepko taa ningilwa ounona ndee nashi shiivifilwe yoo eshi shaningilwa ova hepeki vounona. Ngaashi naanaa hatu mono eengangala tadi ningilwa ngee davaka oinima yovanhu kutya oimuna, oimaliwa ile omaliko amwe. Ehandu lopaveta laningilwa okaana nail kale lidjuu loo olayooloka pamufikwa wamakwao. Eshi nashi ningwe opo ova hepeki veli honge po sha.

b) Elongo loufemba wokaana nali ye moule. Oufemba wokaana nau longwe meefikola opo ounona voovene vashiive oufemba wavo. Naava tava ka fila oshisho ounona nava fiyepo eefikola vaudako ongushu yokaana. Oufemba wokaana naudeulilwe ovalongi naavo tava unga unga nounona momandiki elili noku lili ngee omandiki eefiye, oikunino, ounona vovanadolongo ile moi- pangelo. Hano napa kale eyooloko pokati komunailonga wounona nomunailonga adeulilwa oinima inasha nounona nonghee ounona tava filwa oshisho.

c) Napukale omandiki enasha nefiloshisho lounona vehena ovafilishisho momikunda nomoshilongo nosho yo ovakulunhu vounona vatya ngaho nabde ovaliyambi. Namibia nakufe oiholelwa imwe koilongo oyo ina ovakulunhu/ovadali ovali yambi vahala oku tekula ounona vepangelo ovo vehena efiloshisho naavo vaekelwashi ile vahepekwa, opo ounona vatya ngaha vehe keli hange vali va alukila momake ova hepeki vavo.

Naxuuninwa nee pexulilo loshi nyolwa eshi nandi tye ashike omwedi June woneudo 2018, nau kale omwedi woku dimbulukwa oinima iwa yaningilwa ounona ngaashi oshi holelwa sha Tulonga ou a toolapo okaana nokwe ka xupifa moshiponga manga vahapu ava vali poshiponga vali vafya outalala novatila okweetela eemwenyo davo oshiponga omolwa outile womundilo. Tulonga okweshi ninga ehena omadilaadilo kutya okaana kakeshi kaye, kakeshi komuhoko noshipa shaye no ita ka pulwa nande okulye kutya okweshi ningila shike manga Opolifi ya Namibia ina fika po natango poshiponga.

Omwedi ou nau tu longe yoo oku nyanyala omahepeko okaana ka Namibia ngaashi oo aningilwa mOkatana eshi omunyasha umwe oshivike osho tuu eshi sha June 16 a umbila okaana opo kadalwa melambo loka Shaishe opo kafye. Nonande ohanana ei ina fya koutalala nokonghalo yomo kashaishe, elalalakano olali ololo kafye koo kakane. Onghee oitwa ya tetetekela ngeno nai tulwe moilonga opo ilonge, yoo ikwafele ovo tava ka hangwa komadilaadilo afa opo oku hepeka okaana ka Africa.

• Omundohotola Paulina Uugwanga oku li omupedukulunhu moshiputudilo shUnam mOshakati. Omadilaadilo aa oange mwene no inaadja koshiputudilo sha-UNAM oko ndi li omutonateli.

LEAVE A REPLY

Please enter your comment!
Please enter your name here