Endiki lyomadheulo gaavali

0
19

KuRuusa Magano Uushona

Mpoka elelo lyoskola lyu uvite kutya olya hala aavali ya kale ye na omauyelele ga gwana okukwatha oskola, unene melongo lyaanona, oyi na okudheula aavali mpoka tashi vulika.
Omadheulo otaga vulu okuningwa miinima tayi landula: Mokweeta po omilandu dhoskola (school policies) okudhi fatulula nokudhi tula miilonga woo.

Okupewa uunongo noowino nkene ye na okweeta po iipumbiwa niilongitho yopashinanena poskola, iifonkundana, oovideo, olnternete oradio yopashigwana, nokukandekela oluhepo lwoshimaliwa poskola. Uunongo wokusila okanona oshimpwiyu kolutu, pambepo omanga inake ya koskola, sho take ya koskola nokonima sho ka galuka. Uunongo wokusindila elandulathano lyaashoka okanona ke na okuninga manga taka penduka, nokonima sho ka galuka koskola. Elandulathano Lyiinakugwanithwa megumbo, mbyoka yi na okuningwa kokanona sho ka galuka kenongelo, nghaashi okuninga iithigilwa nekwatho lyomuvali tate, meme, nomuputudhi gwa ko.

Oshowo nkene omuvali ta kwatha okaana ke mokwiilonga kegumbo. Oshiholelwa okulonga okaana okulesha, okupulakena omahokololo, okwiimba, okudhana, okuthaneka, okutala uuhokololo koTV waanona, nokuhokolola shoka wa mono, koTV, mondjila koskola nosho tuu.
Elongo lyuukashikekookantu, nelongo lyoonkuluhedhi nOmaitaalo, uuhokokolo womOmbiimbeli, mono oshiholelwa okuvalwa nokuputuka kwa Jesus, wu tseye kuyele kutya Jesus okuume kaanona, nokayimbilo, ‘Jesus oye ohole ngame okanona ke …’
Uunongo wokupopya, okupulakena, okuthaneka, okuyalula nokulesha, okuyoolola iinima pamaludhi. Oshiholelwa osho ngaashi oshiluudhe, oshitiligane, oshindjimbi, oshishungasheyi, oshizizi, shongonga nosho tuu.
Oowino dhokukandula po omaudhigu ge etwa komaihumbatonayi gaanona megumbo. Oshiholelwa ongaashi okuyoolola oshili niifundja manga kuyele.

Oowino dhokulonga aanona omaihumbato nawa megumbo, koskola nomomudhiingoloko, lipango omulongo yaKalunga unene Oshipango oshitine.
Oowino dhokukwatha nawa ethimbo, opo aanona ye ye kenongelo kuyele.

Oowino dhokukwatha aanona mboka ya gwilwe muupyakadhi wokusimbapala nokusimbapaleka, wokunwa nokuhila omakaya yo inaya mana oskola.
Omadheulo gokufatululila aanona omukithi omudhipagi HIV/AIDS, nokuyambidhidha aanona ye na ombuto nenge mboka oothigwa dha eta komukthi nguka.

Oowino dhomaithano, opo aavali ya kwathele aanona mokuhogolola omaithano gomondjila, uuna taya yi koounivesiti nosho tuu.
Oowino dhokukwatha aavali mboka ye na aanona yoompumbwe dhi ikalekelwa nosho yilwe (aaposi, oombolo, iilema yomagulu, iikaha nomadhiladhilo).

Engongo lyiinima yimwe mbyoka aavali ye na okukala ya tseya opo ya nkondopale okukutba ombinga melongo poskola.
Omukalo wokutseyithila:

Iinima ayihe ya tumbulwa, otayi ningwa monkalo yeiyambom lyelelo lyoskola, eiyambo lyaavali yaanona mboka ye li poskola mpoka.
Onkene shika osha pumbwa owala ehalo lyomuule lyokuputudha okanona poskola opo ka ninge omukwashigwana eshi okwiinekelwa: “Aanona oyo omagano getu ge na ondilo ga zi kOmuwa, onkee otashi pula omazigudhe tuga putudhe.”
• Ruusa Magano Uushona oye omulongi e li moshipundi shevululuko

LEAVE A REPLY

Please enter your comment!
Please enter your name here