Geingob a komanda opo aapolisi yaa na uushili ya kuthwe miilonga

0
157

Obrein Simasiku

OMUTHIYA – Omupresidente Hage Geingob oku li u uvitile nayi aanambelewa yopolisi mboka haya ningi aakwatheli yiimbuluma osho wo aanambelewa mboka itaya longo moshili, onkene itaya vulu okukaleka po omilandu nooveta dhopolisi, ndhoka dhokugamena nokulwitha iimbuluma.

Naandhoka, Geingob okwa gandja elombwelo opo aanambelewa yoludhi ndoka ya kuthwe mo miilonga, ta ti inaya ilongela okukala metanga ndika lyegameno. Geingob ta tsu omuthindo nguka mEtitano pOmuthiya, pethimbo a li ta patulula oombonge oonene dhopolisi pOmuthiya.
“Osha simana okudhenga omuthindo kutya ekalekopo lyosasiona ndjika momuthiya itayi ka sindana mokukondjitha iimbuluma ngele oya kala yi na aapolisi mboka omaihumbato gawo ge li kondje yooveta. Aanambelewa yoludhi ndoka oya pumbwa okukala ye na elandulathano, aayinekelwa noya tale ko iilonga yawo onga eithano ashike kashi shi ashike iilonga. Ondi shi shi kutya aapolisi oye shi kutya oshinakugwanithwa shawo okukwata oongangala ndele haku kala oyo oongangala,” Geingob ta tsu omuthindo ngaaka.

Ta gwedha po ishewe kutya, oshi li oshinima oshiwinayi okuuva aapolisi yamwe taya longele kumwe noongangala, nopoompitio dhimwepo, taye ya kwathele ya mangululwe konima sho ya kwatwa molwa okulonga iimbuluma.

“Iilonga mbika iiwinayi nayi hulithwepo meendelelo,” kakukutu komatanga osho a ti ngaaka.
Geingob ta kunkilile woo aakwashigwana yaa holeke aalongi yiimbuluma, nonando ya kale ye na ekwatathano ewananwa. Ashike naye ya tse omukumo yaa kuthe ombinge miilonga yuungangala, nangele osha pumbiwa ye ya lopote kopolisi.

“Pwaa na etulomiilonga lyooveta, nena oompango nooveta itadhi ti sha moshigwana. Ooveta ongudhi onene okukeelela evundakano moshigwana. Oshi li ekwashilipaleko lyuuthemba wemanguluko ndyoka lyi li mekotampango lyaNamibia, shoka shi li oshitopolwa sha simana shepangelo lyetu,” Geingob ta ti.

Ta gwedha po kutya, shi omwaalu gwaantu moshilongo tagu ende tagu indjipala noshigwana tashi ende tashi humu komeho, ompumbwe yokukaleka po ooveta oya simana. “ Oshi li sha tambulwa ko ngashiingeyi muuyuni kutya aanambelewa yopolisi oye li oshitopolwa sha simana moshigwana, onkene etompelo lyokutunga omatungo ngaka okukwashilipaleka etonatelo lyopolisi lyi li nawa moshilongo ashihe,” ta gwedha po ngaaka.

Geingob okwa longitha wo ompito ndjika okutseyithila oshigwana, kutya omasiku ga zi ko okwa li a tambula ko oshishani shaNamibia oshoka oshilongo osha longa dhingi moAfrica ngele tashi ya mokunkondopeka uuthikepamwe wuukashikekookantu.

LEAVE A REPLY

Please enter your comment!
Please enter your name here