‘Nakukuthwa uulumentu’ oku na ashike ondjo yokufika po ondunda yohonda ye

0
83

Komutoolinkundana

OSHAKATI – Erickson Uudhila, 37, ngoka a kala mondjedhililo sho a li a tomeke omundilo ondunda yaEveline Shithigona ngoka a li ohonda ye onkulu, monkambadhala yoku mu dhipaga, oshiwike shika okwa li inaa monika ondjo yoku ehameka omuntu nenge okuninga onkambadhala yedhipago. Okwa li ashike a monika ondjo mokutomeka ondunda omundilo. Okwa li a pewa egeelo lyoomwedhi dhi li 24 mondholongo, moka oomwedhi dhi li hamano dha ekelwahi. Nonando Uudhila okwa li a gandja ehokololo kutya okwa li a fike ondunda yohonda ye onkulu omundilo, nokonyala e mu dhipage, ompangu oya ti kapu na uumbangi wa gwana tawu ulike kutya okwa li e na elalakano lyokudhipaga Shithigona. Uudhila okwa li a itaala mompangu yaMangestalata mOshakati kutya okwa li a fike po ondunda oshoka okwa li anuwa i itaala kutya Shithigona okwa kutha po uulumentu we. Uudhila okwa hokolola kutya okwa kambadhala okuyaka naakiintu yalwe yaa shi Shithigona, ashike kehe ethimbo okwa hulile muunyengwi oshoka uulumentu we itawu thikama uuna a yi naakulukadhi yalwe.
Shika, Uudhila ta ti, osho she mu undula a ka tomeke ondunda yaShithigona Ondalu yaNelyanga, ndjoka yi li mOkamule, nosha li sha ningwa momasiku 30 Auguste 2017. Kakele konkambadhala yokudhipaga omukiintu gwe, okwa li wo a hala okwiimangeleka nokwa li a shanga okambapila taka ti ota ka dhipaga ohonda ye.

Shithigona, ngoka a li te dhi kutha komasipa pethimbo ndyoka, okwa li e shi pondola okuhupa inaa mona nando oshiponga sha sha, pamwe nayakwawo ye li yaheyali mboka ya li wo ya lala mondunda moka. Uudhila okwa li a patululilwa iipotha iyali yefiko nokuehameka pamukalo gwomatilitho, mbyoka ya li ya leshwa pamwe noveta yoDomestic Violence Act 4 of 2003. Uudhila okwa kala mondholongo okuza tuu sho a kwatelwe po muAguste 31, 2017.

Mangestalata Castro Makapa Simasiku okwa ti ompangu kaya li yi li itaala othaathaa kutya Uudhila okwa li e na elalakano lyokudhipaga Shithigona. Epangelo, ndyoka kwa li lya kalelwa po kuNelao ya France, olya li lya patana omapopyo guulumentu wa yakwa po, ashike olya li lya pula ompangu yi mone Uudhila ondjo miipotha ayihe iyali.

Ya France ta ti ompangu ohayi longo ashike nuumbangi mboka wu li komeho gayo na ihayi longo nuulodhi nenge omalundilo ge na sha noonkondo dhuupulile. Ya France ta ti Uudhila okwa li e na okukonga ekwathelo lyopaunamiti pehala lyoku ka fika po ondunda yaantu.
Mompangu, Shithigona okwa li a tindi okutaamba ko uumbangi wUudhila nokwa li a pula uumbangi mboka tawu ulike kutya Uudhila ke na we uulumentu. “Ngele kashi shi oshili kutya ke na we uulumentu, onda hala ndi mone shili kutya kawu po,” Shithigona osho a ti.

Okwa li wo a lombwele ompangu kutya Uudhila okwe mu ningila omambandameko kutya ote mu dhipaga iikando yontumba. Ashike Mangestalata ota ti omambandameko ngoka oga ningwa uule wethimbo lyontumba nopethimbo wo ya kala mohole yawo yopaihulo. Ompangu oya mona kutya, ngeno okwa li Uudhila ina tomeka ondunda omundilo ngeno Shithigona ina patulula oshipotha shokuningilwa omatilitho oshoka kakwa li e shi lopota nale. Ompangu tayi mono wo kutya uumbangi otawu ulike kutya omatilitho ngaka kaga li taga ka tulwa miilonga mbala noga ningwa sho mbaka yaali ya li ya topoka, onkene nakutula mo oshipotha ka li e na etompelo a kale e wete onkalamwenyo ye yi li moshiponga.

Pethimbo lyiihokolola, Uudhila okwa kala noku endulula kutya ye okwa hala ashike okushunithilwa uulumentu we. Ya France okwa yamukula nepulo kurtya uudhila oku shi shi ngiini kutya Shithigona oye a kutha po uulumentu we.
Uudhila okwa yamukula ta lombwele ompangu kutya iikando iyali ya yoolokathana, Shithigona okwa li a thengaathenga uulumentu we osho wo moshipala she nokambulukweya ke kokohi.

Noshikando shimwe anuwa okwa li ya yi miihulo e mu pilamena. Ayihe mbika itatu, Uudhila okwa lombwela ompangu kutya oye mu thiga nomadhiladhilo taga ti oya li ya ningwa nelalakano lyokukuthwa uulumentu we.

Ya France ta ti shoka sha holoka po otashi vulu okukala omukadhona a li a hala okukambadhala omikalo dhimwepo dhoku ya miihulo.
“Pamwe okwa li ashike te ku ulikile omukalo gumwe omupe gwiihulo,” ya France ta ti. Ashike Uudila okwa li i ikanyuna kutya yo inaya ya nando onale omiihulo pamikalo ndhoka tadhi limbilike. Nonando okwa li a ti ke na ondjo kiipotha mbyoka ya patululwa, ina patana efiko lyondunda nenge kutya okwa ningila ohonda ye onkulu omambandameko goku yi dhipaga.Oombangi dhi li ntano ndhoka odha li dha hokolola kutya okwe ya lombwela kutya oku na ehalo lyokudhipaga omukadhona gwe.

LEAVE A REPLY

Please enter your comment!
Please enter your name here