NDF itaka pitikwa we a kale noosipana dhi vule puyimwe moliha yimwe –Fire ta ti

0
63

Shipi Elago

OSHAKATI – Oshikumungu shoosipana dhaNDF shoka sha kala tashi ungaungwa nasho ethimbo nuule ngashiingeyi sha potokonoka noosipana dha-NDF odha tegelelwa dhi ka gwe mo moliha molweetho lwoliha lwo 2018/2019.
Omaudhatho mpango ga-NFA oga li ge shi ulika nawa kutya kapu na omuntu a pitikwa a kale e na oosipana mbali hadhi dhana moliha yimwe.

Ashike oliha yoNorth West First Division oya li yi iyadha pokati koshilaleko nomukonda konima sho ya li yi iyadha ye na oosipana dhi li ndatu adhihe dha-NDF tadhi dhana moliha yimwe.

Omunashipundi gwoliha yoNorth West First Division Philemon Fire Vatilifa okwa li e shi holola pethimbo a li moonkundathana naKundana kutya osha li oshidhigu okupotokonona oshikumungu sha-NDF oshoka oosipana dhika odha li dhi ishangitha nomadhina giikandjo ya yooloka mo-NDF nolundji odha li dhi ikala kutya inadhi yamathana.

“Ashike konima sho twa li twa ningi omakonaakono otwa li twe shi mono kutya oosipana ndhika adhihe odhetanga lyegameno , shoka sha li sha etwa puuyelele sho iimaliwa yawo hayi futwa mocheke yimwe, omalweendo gawo ohaye ga ningi nosheenditho shimwe naashika oshe tu pe uuyelele wi ihwa pokutya oosipana dhika ine odha-NDF,” Fire ta ti.

Okwa ti oye li ngashiingeyi ya ninga etokolo kutya oosipana ndhika otadhi ka ethwa ashike dhi ka dhane momumvo tu uka noliha sho tayi ka pwa osipana ya-NDF ndjoka yi na iitsa oyindji yi vule oonkwawo oyo ashike tayi ka thigala mo moliha omanga oonkwawo tadhi ka pewa olukaku.

Oshikumungu shoosipana mbali moliha oshi li wo sha taalelwa kosipana yoMilitary School yaKahandja ndjoka yi na ompito yaandjuka oku ya koPremier liha ashike ngele shika osha ningwa enyanyu lyawo otashi vulika li ka shituke oluhodhi oshoka koPremier Liha oku na nale osipana ya-NDF Mighty Gunners onkene osipana ndjoka tayi ke ya ontiyali otayi ka kala onelago oshoka oyo ashike tayi ka pitikwa yi ye moPremier liha.

Shika otashi ti ondjodhi yoMilitary School yokuya ko Premier liha otayi ka tsa owala ngele Mighty Gunners okwa gu mo moPremier Liha.
Fire okwa li a holola kutya osipana yimwe ya-NDF oyi li yi ikutha mo moliha yoNorth West First Division, osipana yoTropical Heat oyi li ya shanga omukanda moka tayi ulike kutya itayi vulu we okutsikila noliha ndjika molwomukundu gwoshimaliwa shoka ngashiingeyi sha eta omwaalu gwoosipana dhi kale ashike ndatu, Military School, Eleven Warriors noBrave Lions.

Okwa ti oshikumungu shika inashi guma ashike NDF ashike osha guma kehe osipana hayi dhana oliha, ta ti UNAM Ogongo naye oku li mokataalelo kamwe na-NDF oshoka ngele osipana yaUNAM Ogongo nayo oya sindana oliha yoNorth West First Division itayi ka pitikwa opo yi dhane moliha onene oshoka omu na nale osipana yaUNAM yomoVenduka.

Pokati mpoka oliha yoNorth West First Division oya li yi na oshigongi oshinene mOkahao moka ya li ya hogolola elelo epe moka Philemon Fire Vatilifa a li a hogulululwa ongomunashipundi gwoliha ndjika omanga Laurence Kandundu a li wo naye a hogolululwa ongomupevinashipundi,Simon Kalumbu naEliaser Sheya nayo wo oya li ya hogulululwa onge iilyo yolutu talu lele oliha ndjika.
Oshigongi osha li sha hogolola wo iilyo yokangundumutima koliha yi li itano, elelomutima lyoliha ndjika oli na iilyo yi li omugoyi mbyoka ya tegelelwa opo yi ka topolelwe iinakugwanithwa moshigongi shopawulumompumbwe tashi kala ko ngula mOlyomakaya.

Pethimbo twa li moonkundathana naFire okwa li wo a holola kutya olweetho olutiyali lwoliha yoNorth West First Division otalu tameke ehuliloshiwike ndika ashike okwa li a holola kutya inashi kolekwa natango oshoka oya tegelela opo NFA e ya tumine oshimaliwa, ta ti ngele oshimaliwa inashi tumwa nena oliha otashi vulika yi ka undulilwe komeho.

LEAVE A REPLY

Please enter your comment!
Please enter your name here