‘Ohatu futu oosikola nuumaliwa wa za mowalande’ …Aalandithi yowalende taya pula ngele ombike oya ngambekwa otaya ka hupila moshike

0
302

Vicki Kaapanda

ONGWEDIVA – Aashingithi yombike momatala gaShakati oya yemata, noye li ompinge netompelo ndyoka lya popiwa mOmutumba Gwopashigwana kutya ombike, otombo, noshowo iidhungomwa yilwe yopamithigululwakalo nayi hulithwe po, molwaashoka anuwa otadhi teya po oshigwana. Oya pula ngele epangelo otali ke ya pa iilonga, nenge oshimaliwa shi thike pushoka hashi zi mokulanditha ookashipembe niidhungomwa iikwawo yopamithigululwakalo, opo ya vule okutsikila nokukutha po oompumbwe dhawo, ngaashi haya ningi ngashingeyi.

Omulandithi omukulu gwombike Marselina Endjabi okwa li a lombwele Kundana ta ti kutya oomvula odhi thike pomulongo ta landitha ombike ngashingeyi. Nonkalamwenyo ye ayihe oya ikolelela mokulanditha ombike, mo hamu zi okamaliwa ha ke kwatela po onkalamwenyo yaanegumbo lye.

Endjambi okwa gwedha po ta ti oku li ompinge lela noshietwa po shoka kutya ombike nayi hule po. Ta ti ota ka lya peni ye iha longo nontseyo ndji e na oyo ombike ashike.
“Epangelo oli tu nine po iilonga yasha se mba inatu longwa tu vule okwi ihupitha nenge olya tegelela tuka hupe ngiini”? Endjabi ta pula ngaaka.

Pomatala gaShakati ope na aalandithi yowalende ye thike po30, mboka ayehe taya popi kutya omagumbo gawo ohaga hupu melanditho lyombike. Yamwe yomaalandithi aakiintu oya ti aalumentu oyendji ihaya tala ko koyana, nuunona owundji nkene tuu wa valelwe wu mone omakwatho taga ziilile koohe.

Omutumba gopashigwana ogwa ningi esiku tagu patana oshinima shika shombike, shoka sha tameke sho omasiku gazi ko oshilyo shomutumba nguka shongundu yompilameno yo-UDF Dudu Murorua sha thikama nokupula ngele iidhungomwa yopamuthigululwakalo oya nika tuu uuyogoki. Murorua okwa ti iinima mbino ohayi longekidhilwa pomahala inaaga nika uuyogoki yo ishewe yimwe yomuyo ohayi hangwa niinima ya nika omauzigo.

Murorua okwa li unene e na eipulo kombinga yomukalo omupe ngoka hagu longithwa ngashingeyi okuhanga ombike. Ekemo lye olyo ndjoka kutya aantu yamwe ohaya hanga ombike taya tula mo omanyakwi giikutu ya kulupa yo oya kaka, niikulya yaola mbyoka tayi vulu oku eta oshiponga kuukolele gwomuntu. Ta ti oshinima shika osha pumbwa okukonaakonwa.
“Omukalo nguka ngele ogwoshili ogwa otwa pumbwa oku gu konaakona noku gu ningila omapekaapeko.

Otwa pumbwa okukonaakona ngele shika itashi ti sha kuukolele womuntu, nangele osha nika oshiponga okuhanga ombike naku hulithwe po,” Murorua osho a lombwele egumbo lyopashigwana.

Ominista yopevi yaaniilonga, neetepo lyiilonga Tommy Nambahu ye okwa pula opo pu etwe omulandu oku gokuwilika omalanditho giidhungomwa yopashigwana. Nambahu ta ti mbika ngele oya ethiwa i tsikile inaayi wilikwa kooveta, oolambika nootombo otadhi ka eta uunkundi nokuteya po uukolele waaNamibia oyendji. “Tse onga aaleli otwa pumbwa okukonga omikalo ndhoka tadhi gamene aantu yetu komauzigo,” Nambahu ta ti.

Nonande ongaaka Nambahu, okwa zimina kutya aahangi yamwe ohaya hanga omalovu ge na omaukolele gaantu komutima nohaya hangele pomahala ga yogoka. Ta ti ngele ota pa kala okangundu kokutala omalovu ngono, naka tale kutya ogeni inaaga nika oshiponga ye ta gwedha po kutya omalongitho gomeya goopatilii, iinyakwi, niiikwawo yilwe ya nika oshiponga oha yi longithwa kaahangi opo yo kolithe nwa aantu.

Oshilyo shongundu yoPopular Democratic Movement Vipuakuje Muharukua okwa ti omalovu gopashigwana ngashingeyi nago otaga landithwa owala ngaashi ngoka gakashingolo, onkene nago oga pumbwa okuwilikwa ngaashi naanaa omalovu omakwao.
“Itatu vulu okukala tatu longo nuudhiginini okutunga oshigwana, ashike otatu etha oshigwana shoka tatu tungu opo shi hanagulwe po nokudhipagwa po komauzigo nokuninga oonkolwe,” osho Muharukua a ti.

Minsita gwopevo gwomahangano ga yama kepangelo Veikko Nekundi oye awike a li ta popile ombike niidhingomwa iikwawo yopamithigululwakalo. Nekundi okwa ti oku eta po omilandu nenge okudhipaga po iihangomwa yopashigwana otashi kwathele owala ehumokomeho lyomalovu gokondje yiilongo omanga yomoshilongo tayi dhipa gwa po.

“Iinima mbyoka tamu popile, iinima yuukoloni nomwa hala okuhumitha komeho oongeshefa nomadhilaadhilo gaazaizai moshilongo shetu,” Nekundi ta ti.

Ta ti oohapu dhaMurorua dhokutya omalovu gopamuthigululwakalo oha ga hangwelwa monkalo kaayi na uukolele kage li mondjila. Ina tu pitika opo opaliamente yi longitwe okutaandelitha omitoto,” Nekundi ta lombwele engumbo lyopashigwana.
Aashingithi yo walende momatala gaOshakati ota ya tsu kumwe naNekundi shaashi ina ya nyanyukilwa nando omapopyo gaMurorua naMuharukua.

Oya ti nonando okathilinga hoka haya mono mokulanditha ombike hako ngaa ne oka yamba, ohaya futile uutala mboka haya landithile N$50 komwedhi na mboka kayena uutala ohaya futile ehala N$10 kehe mesiku, ta ya kalanditha.
Endjabi ta ti ngele ombike oya hulithwa po oshigwana oshindji shoka hashi hupile mombike otashi ka ya mopandanda eta shi tameke okuyaka inima yaantu opo shi vule oku ihupitha.

Tuyamapi Kapembe ngoka naye omulandithi gwombike okwali a popi kutya, ombike kuye oya simana noonkondo oshoka oya hupitha aanona ye li yaali ngaashi ngeyi yeli koosikola dhokiputudhilo, ashike opo ya thike hoka okwa kala nokuya hupitha ta mono oshimaliwa tashi zi mombike ndyoka ta landitha.

Kapembe ta ti ombike omalovu ga zi nale nale, oshike ge na oku hula po paife. Ta ti ke wete pe na eyoloko pokati kombike nomalovu galwe, ga ili oshoka omalovu agehe ohaga kola ashike. Ano ngele ngele ombike otayi hulithwa po omalovu agehe naga hule po Kapembe a ti ngaaka.

“Kandi wete ombike yi na uupyakadhi nana moshigwana oshoka tse ombike ohatu yi dhungu moombe, oonduka nenge moonyandi. Ayihe mbyoka tayi popiwa kutya oombike dhimwe ohadhi dhungwa noomatayiyela nenge niikutu omitoto dhowala kape na nando oshinima shili ngawo no inandi shi tsakanenaka sigo onena,” Kapembe ati.

Omulumentu gumwe ngoka ta ti ye ombike osho oshikunwa she sha kehe siku, okwa popi kutya shoka tashi popiwa kutya “ihatu nyangadhala nokilonga atu dhimbwa ko iifundja iitokele. Ngele osho shili ngawo iimaliwa mbyoka hatu landitha ombike ohatu yikutha peni,” okastoma ya pula ngaaka.

LEAVE A REPLY

Please enter your comment!
Please enter your name here