Tonateleni iipa yuunona wuuthithi

0
59

Alvine Kapitako

WINDHOEK – Oshiwike sha za ko, momasiku 13 Juni olya li Esiku lyOkugandja Uuyelele shi na sha nOmathithi mUuyini, Namibia okwa li a talulula nkene oshilongo hashi ungaunga naantu-unene tuu uunona- mboka wu na onkalo ndjika yoshipa.

Omanga okatongotongo kaantu ye na oshipa taka shuna pevi moNamibia, eshongo enene kaantu mbaka moNamibia, unene tuu aanona, omukithi gwokaankela yoshipa. Okwaa na elongo mokutekula uunona mbuka osha eta etaandelo lyetaambo moshipangelo lyi shepangelo moWindhoek Central Hospital, shika oshi ikwatelela kuDr. Peggy Emvula, omupyokoki mokulonga nomukithi gwokankela, noku li ha longele mosaala yokankera yaDr. AB May ndjoka yi li moshipangelo sha tumbulwa pombanda.

Omathimbo ga yi, uunona wu li utatu lwaampoka womathithi owa li wa taambelwa moshipangelo molwa okaankela yoshipa, ashike uuyelele mboka wopaife otawu ulike kutya konyala uunona wu li uheyali womathithi tawu taambwa omumvo kehe, shi ikwatelela kuEmvula. Uupyakadhi mbuka uunene unene kiitopolwa yokonooli yoshilongo, unene tuu miitopolwa yaKavango. “Uupyakadhi owo mbuka kutya aavali ihaya gandja esiloshimpwiyu lya gwana kuunona mbuka,” Emvula ta ti.

Omutotipo gwehangano lyoSupport in Namibia of Albinism Sufferers Requiring Assistance (SINASRA), Dr. Peter Stoermer, ota ti okatongotongo taka ningilwa omathithi otaku ende taka kuluka. Otaku tengenekwa kutya moNamibia omu na omathithi ge li lopomwaalu gu li pokati ko1800 no2000. “Otse tu na omathithi ogendji momuntu kehe muuyuni, Stoermer ta gwedha po ngaaka.

“Mbaka aantu ashike ngaashi aantu ooyakwawo notu na ashike okundungika oshigwana shi ya tale ko ngaaka. Pamadhiladhilo, kape na sha sha puka kuyo nope na omapekaapeko ngoka taga koleke kutya omathithi oge na oondunge ngaashi kehe gumwe,” Stoermer ta ti. Uuthithi onkalo yoshipa ndjoka hayi ningi ngoka a kwatwa a kale itaa vulu okupititha omelanin, ndjoka hayi gandja olwaala koohuki, oshipa, omeho nohayi gamene koonte dhetango ndhoka dha nika oshiponga.

Miilongo ngaashi Tanzania, omaponokelo taga ningilwa omathithi oga vuka oshoka iilyo yomalutu gawo oya talika ko onga eliko lyongushu, moka hayi landithwa mokukonga uupulile.

Namibia oku na omathithi ogendji momuntu muuyuni. Oshilongo, shoka shi na omwaalu gwaantu ye li konyala oomiliona 2.4, oyi na omathithi ge li pokati ko 1800no 2000 ye na uukwatya mbuka. Ashike uutile waNamibia owa yoolokathana kashona naamboka wopalwe, ngaashi kuuzilo waAfrica.

Namibia okwa talika ko e na e na ooveta nomisindalandu dhopashigwna tadhi gamene omathithi.
Epangelo lyaNamibia ohali gandja oshimaliwashokwiikwatha komathithi, Namibia mo 16 Juni okwa li a a dhimbulukwa esiku lyo-IAAD, ndyoka lya li kohi yoshipalanyolo, ‘Okutakamitha Omathithi’, sha li sha ningilwa kosikola yoVisually Impaired moWindhoek.
Oshimaliwa shika hashi gandjwa oshi lile po okukwathela metonatelo lyuunona mbuka kiitopolwa yokuushayi. Otatu pandula epangelo lyetu sho lye tu taamba ko nonando petameko kasha li oshipu,” Joseph Ndinomupya, omupresidente gwoNamibia Albino Association, osho a li a lombwele oshifo oshimwayina naashika, New Era, okuza koNew York.
Ndinomupya ta popi euvonayi kutya iimaliwa mbika okuza kepangelo ya nuninwa omathithi omathimbo gamwe ihayi thiki kwaamboka ye yi nuninwa.

“Otwa li tu na enyenyeto kombinga yomukulukadhi ngoka a li ta taamba ko iimaliwa pehala lyokamwanakadhona ashike okanona inaka monako sha. Otwa hala oshigwana shi hulithe po oishinima shika,” Ndinomupya ta ti.
Mo 13 Juni, ehangano lyoSINASRA olya li lya gandja omagano gomakende gokomeho gopashinanena kaalongwa ayehe 160 yomosikola yoVisually Impaired.

Oondokotola dhomeho opo dha li posikola dhi ninge omalolelo gomeho gaalongwa opo ya wape okulundulula omakende shi ikwatelela koonkondo dhomeho gawo. Omagano oga li ga kwatela mo omakende gomuzile, omambale gokomutse, uumbindja womaako omale, osho wo omagadhi gokugwaya ga li ga zi kaayambidhidhi, mwa kwatelwa ombelewa yomukalelipo gwaGermany moNamibia nOhorongo Cement.
Pethimbo lyegandjo lyomagano Stoermer okwa ti omakende ogaanona mboka ye ga pumbwa kosikola.

SINASRA okwa kala nokugandja omakende goludhi nduka uule woomvula, noshizemo osho shika kutya uunona owundji womathithi otawu otawu ishangitha okuya kosikola oshoka oye wete ko nawa ngashiingeyi, Stoermer ta ti.
Stoermer ta tsu omuthindo kutya uunona wuuthithi ou na oondunge wa fa ashike uukwawo mboka kaawu shi uuthithi.
“Otatu tsu omukumo aavali ayehe yuunona wuuthithi ya tume uunona wawo kosikola,” Stoermer ta ti. Ta kunkilile omathithi gi igamene nokuzala iikutu ya gamenwa mbyoka tayi ya gamene koonte dhetango.

Ta ti omiyonena hadhi ningilwa omathithi moNamibia otadhi shuna pevi.
Omiyonena tadhi ningilwa omathithi odhi na oku ya pehulilo,” Stoermer ta ti, ta gwedha po kutya ope na aantu mboka taya litha onkalo. –Ehokololo ndika olya li lya holoka tango moshifo shoNew Era shomasiku 13 Juni, nomwa gwedhwa uuyelele uupe.

LEAVE A REPLY

Please enter your comment!
Please enter your name here