Aadhani aakulu yOshakati City ya indile aanyasha opo ya longithe okapale okape mOmuthiya

0
25

Shipi Elago

Oshakati
Aadhani aakulu yOshakati City olyomakaya gazako oya li ya talele po okapale okape hoka opo ka dhikwa monooli keli mondoolopa yaMuthiya muudhano wawo nosipana yaadhani aakulu moshitopolwa shoka yedhina Omuthiya Masters.
Kundana okwa li a kutha ompito opo a ye moonkundathana na yamwe yomaadhani aakulu yOshakati City puudhanbo mbuka mboka ya li ya holola omayiyuvo gawo kombinga yokapale haka.

Steyn Hamalwa ngoka e li omudhani omukulu gwomokati kokapale gwOshakati City okwa li a holola nkene okapale haka ke li eliko enene komawudhano monooli oshoka oke li lela pamuthika gwopawuyuni oku yelekanitha nuupale uukwawo mboka wu li monooli.
Okwa ti aanyanyamagulu mboka yena elalakano lyo ku humitha iitalenti yawo komeho nay a ninge ombili nomiti omanga opo ya longithe okaple haka yo yamone eyooloko na nkene okatanga kena oku ngongolithwa momwiidhi gwopashinanena.

“Okapale haka okena omwiidhi gwopawunongononi kagushi ngoka gwopawushitwe na ina gwu pumbwa okutekelwa oshoka ogwa longwa moplastic njoka ya longwa naanaa yafa emate lyomwiidhi na olyo lya yalekwa mokapale haka na olya fa naana omwiidhi” Steyn tati.
Okwa ti pethimbo lya wok a ya li ye na iikwa niipangitho yomawudhano iiwanawa ngaashi ta shi monika payife ashike nando ongawo oya li ya longo nuudhiginini oku nawapaleka ondondo yomawudhano gawo nando oya li pethimbo ka lina uupale wu li pomuthika omwaanawa.
Ashike Steyn okwa li a wo a gandja omakemo ge kombinga yokapale tati emate ndyoka lya tulwa mokapale ka li shi lela lyomonooli oshoka oha li pupyala uupyakadhi shoka sha li noku li sha etitha opo uudhano wawo wukatekwe noowili mbali konima sho ya li yena oku tameka potundi oyimwe yomutenya ashike na oya ka tameka owala potundi ontine yokomatango.

Osipana yaadhani aakulu yOshakti City oya li ya halakanitha po Omuthiya Masters nookola 8-2 na oshigwana oshga li lela sha holoka momwaalu omunene oku tala aadhani aakulu yena omadhina mboka oyendji ya kala owala ha ye ya uvu ya fa okatana komiilya.
Rafael “Chukwu” Nuumbembe omudhani omukulu gwokomeho mOshakati City okwa li a holola kutya okapale oka ngongola nawa, na ota ka kwathele mekoke po lyuudhano monooli oneke aanyasha nay a kuthe ompito ndjika ya tale ngele genongo ota ga fe tu gwongombe.

“Eholokopo lyetu mOmuthiya nena nomoodoolopa moka ta tu talele po olina wo oshitopolwa shetu shopankalathano oku kwathela omidhingoloko dhetu dhi hokwe omawudhano dho dhi tungile konakuyiwa yetu ombwaanawa pamawudhano, uunona owundji owa li weya kutse konima yomawudhano no ku popya natse wo ta w utu pula omayele nkene yena oku humitha iitalenti yawo komeho,” Chukwu tati.
Osipana ndjika oyi li ta yi talele po oondoolopa odhindji moshilongo na oye li ya thinda koTsumeb muudhano wawo walandula ko omanga ina ya ka talela po ondoolopa yaOpuwo kuyele omweedhi twathinda.

LEAVE A REPLY

Please enter your comment!
Please enter your name here