Ehangano loShack Dwellers Federation otali humu komesho moLüderitz

0
40

Tuulikki Abraham

Lüderitz – Ehangano lokutunga omaumbo kovanhu ovo ve na oiyemo yopedu lela, Shack Dwellers Federation of Namibia, otali ende tali humu komesho modoolopa yaLüderitz.

Eshi osha kolekwa komukwatakanifi woShack Dwellers Federation moshitopolwa sha//Kharas, Rosalinda Hendricks mehuliloshivike olo twa dja, eshi a li e ya okuyandja omauyelel kovanhu vakonda po 20, ovo kwa talika kutya otavadulu okupewa oshimaliwa kehangano opo va tunge omaumbo e va yeleka modoolopa yaLüderitz tava pitile momulandu woFederation.

Hendricks okwa pandula oilyo yehangano loShack Dwellers, eshi ye li tulamo mokuongala, nokuongela oshimaliwa, va dule okukolekwa kutya otava dulu okupewa oshimaliwa kehangano voo va dule okukatunga omaumbo avo kondado oyo ye va yeleka.
MoLüderitz omwa tungwa nale omaumbo okupitila mopolohalama yoShack Dwellers e li omi-20.

Omuwiliki wehangano loShack Dwellers Federation moLüderitz Rosalia Mwandingi, okwa tumbula kutya oilyo ihapu oye litula mo mokuongala, ashike oku na eindilo la yukilila aveshe ovo ve na ehalo okuwaimina ehangalo eli ve linyolife vo va kufe ombinga voo va dule okulimonea omaumbo kondado yopedu lela.

Veno Mununga oo naye e li yoo omuwiliki mehangano eli mo Lüderitz, okwa pandula elelo lodoolopa eshi le va tulila po omayakulo taa pumbiwa, ngaashi ominino donyata, oshoyo olusheno. Mununga okwa tumbula kutya omaumbo e li 20 okwa manifwa okutungwa koshi yomulandu wofederation modula 2013.

Modula 2015, elelo lodoolopa yaLüderitz ole va tulila po omayakulo, ngaashi omunhino woku enda onyata. Modula 2018 neudo, ova tulilwa po omalusheno, osho Mununga a tumbula kutya, voo onga ve li oilyo yehangano loShack Dwellers, ova pandula neenghono elelo lodoolopa yaLüderitz, nombelewa yoshikandjohoololwa sha!Nami#nus eshi ve va yambidida vo va dule okukala momaumbo ve na omaayakulo taa pumbiwa. Okwa pandula yoo ombelewa yoshikandjohoololwa sha!Nami#nus eshi ya yandja oukefa volusheno oshali, kovanhu ve li 9, ovo ve na omaumbo okupitila mopolohalama yoShack Dwellers Federation.

“Ondi na eindilo la yukilila ovanhu ovo ve na oiyemo ishona. Kashi na kutya, oho landifa okapana, ile ohowapaleke meumbo, shima ashike hokendambala opo u mone okamaliwa, ndele owa hala okutunga eumbo loye, ila ashike kufye, tu ongaleni, ohatu ongala Osoondaha keshe potundi 15h00.

Ngee hatu tale ponhele apa pa tungwa omaumbo oShack Dwellers Federtion moLüderitz, elelo lodoolopa ole tu pa eenhele di li 102, , omaumbo e li 20 okwa tungwa nale, omaumbo eli 20, oyoo taakahovelwa okutungwa paife, eindilo lange olo eli kovalimo vomo Lüderitz kutya nava endelele vuuye uninge omunelao womwaavo tava ka ya mehangano eli, nokupewa omhito mu ka tunge omaumbo eni kondado i li pedu, peenhele odo da hupa ko dihe na oovene di li 62. ” Mununga osho otumbula.

LEAVE A REPLY

Please enter your comment!
Please enter your name here