Elite Academy tayi tyakaleke muudhano worugby woosikola moshilongo

0
19
Shiti okwa li ta tekele mbundje Olyomakaya ga za ko muudhano pokati koWindhoek High School noElite Rugby Academy yaShakati.

Shipi Elago

OSHAKATI – Osipana yoElite Rugby Academy oyi li tayi gandja uupyu muudhano woNamibia School Sports Union Rugby League ndjoka hayi dhanwa konyala koosikola dha konda pomulongo moshilongo ashihe.

Oshitopolwa shokonooli osho shimwe shomiitopolwa oyindji moshilongo moka uudhano mbuka wa kala ashike hawu dhumwa wa fa okadhi kombako nolundji oosipana ndhoka dha kala mo odha li hadhi pewa nambwa unene ngele otadhi dhana noosipana dhokuushimba.
Ashike kwakalelelwa ku na sha ko kwaa ziwa ku na omulombo, oshiputudhilo shaElite Rugby Academy oshi li she ya sha manga sha pama nomulongelo gwasho ogu li tagu tyakaleke oosipana odhindji moshilongo, oshinima shoka sha thiga oosipana odhindji tadhi yi oshidhungwe oshka oosipana mbali dhaamati yokohi yoomvula 15 naandjoka yaadhani ye li kohi yoomvula 19 odhi li tadhi dhenge oosikola dhomuushimba tadhi nuka.

Oshiputudhilo shika oshatungwa po kaadhani yoRugby yaza moosikola ngaashi Erundu ndyoka olyo li li thimba yina ongodhi muudhano woRugby monooli,Gabriel Taapopi, Kabatana Private School, Mweshipandeka,na Mauritz Devenish moboka ye li ya panga uukuni kumwe noku ninga osipana yopamihanga ndjoka yi li ta yi tsitha oosipana dhomuushimba omazima pethimbo ndika.

Osipana yokohi yoomvula 19 yoElite Academy oyi li hayi dhana oDevelopment League ndjoka yi na omadhina omanene morugby ngaashi Delta Secondary School, Academia, Karibib Private School, Gobabis Gymnasium, Grootfontein Agri College, P. K. De Villiers, Mariental Secondary School nEtosha Secondary School.

Osipana yo Elite sigo okeluwa ndika inayi kanitha nando uudhano washa, muudhano wayo wotango oya li ya dhenge Karibib Private School 29-14, omanga uudhano uutiyali ya pe Grootfontein Secondary School, 34-1.

Delta Secondary school kevi lyiimpungu okwa li a zi ko ompadhi ketako oshoka okwa li a pewa oshipandi shookoola 26-6.
Elite sho a li a ka homona Grootfontein SS okwa li e mu thigi a lala oshoka okwa li e mu pe 33-23, Olyomakaya ga za ko Elite okwa li a dhenge Windhoek High School 19-6 .
Osipana yaElite yokohi yoomvula 15 nayo oyi li moompadhi dhamukwawo sho ngashiingeyi ya kanitha ashike uudhano wumwe muudhano awuhe mboka ya dhana.

Okwa li a kanitha uudhano we wopondje wegumbo lye pethimbo a li a dhana naGrootfontein Agri College moka a li a dhengwa nookoola 32-29, ashike edhengo ndika olya li lye mu pe onyambi nokwa li a dhenge Grootfontein Secondary megumbo 48-12 muudhano we uutiyali, muudhano uutitatu mboka wa li wa dhanenwa mOshakati, Elite okwa li a pondola oku dhenga Grootfontein Agri College 12-10 muudhano mboka wa li itawu nuwa omeya.

Osipana yoElite yaadhani yokohi yoomvula 15 oya li ya tsikile noku tyakaleka oosipana oonkwawo moka ya li ya dhenge Tsumeb Gymnasium 51-5.

Ehuliloshiwike ndika oosipana dhika mbali otadhi ka ya mondambo natango sho mba yokohi yoomvula 15 taya ka dhana nEtosha Secondary School omanga mba yokohi yoomvula 19 taya ka dhana nAcademia Secondary School, uudhano awuhe otawu ka dhanenwa pokapale kosikola Erundu mOshakati.

LEAVE A REPLY

Please enter your comment!
Please enter your name here