Epangelo lyi ikwata pomutima molwevi tali fandithwa po oshimwene kee po momikunda

0
68

Komutoolinkundana

WINDHOEK – Epangelo olyi ikwata pomutima shi na sha nomukalo ngoka evi lyopamuthigululwakalo tali landithwa miitopolwa yomonooli nomoKavango, moka aanangeshefa naaniimaliwa yalwe taya gandja oombumbo komalelo gopamuthigululwakalo, medhina lyombandu yekaya. Osha monika kutya mpoka omalelo gopamuthigululwakalo ge na oongamba dha palathana, nenge mpoka pe na omalelo gaali taga kondjele evi nenge itaaga tsu kumwe netendo lyoongamba dhawo, aantu yamwe ohaya ka landa evi nokufuta mo elelo limwe, ndyoka tali kutha po evi ndyoka. Shika, epangelo otali ti ohashi eta engwangwano enene moshigwana.

Epangelo otali ti olya pitika ashike omalelo gopamuthigululwakalo ga tsikile nomukalo gokugandja evi konima yoveta ompe ndjoka ya li ya tulwa miilonga mo2004, ashike omukalo ogwa fa tagu longithwa pambambo kaantu mboka ya hala okulongitha evi ya likole iimaliwa. Yamwe otaya landa po evi lyopamuthigululwakalo ye li longithe onga oofaalama dhawo dhopaumwene, okutunga omagumbo omanene osho wo okutula po oongeshefa dhawo. Kashi li paveta okulanditha evi lyopamuthigululwakalo moNamibia. “Elanditho lyevi ndika lyaa li pambelewa omangeshefelo gopaumwene ngoka haga ningwa meholamo pokati kaantu ooyaali, shoka tashi ningile Uuministeli wEtalululo lyEvi oshidhigu wu shiilile nokupangula mboka taya taaguluka oveta,” Omupeviminista mUuministeli mbuka ta popi ngaaka mEgumbo Lyomutumba Gwopashigwana oshiwike shika.

Ta ti ofuto yevi ndyoka olundji oyi li pevi, moka haya futu konyala N$600 nenge ongombe yimwe nokupewa evi ndyoka taya vulu okulongitha onga ofaalama onshona kiitopolwa yokonooli, omanga komikunda dhaZambezi ofuto hayi tameke poN$1000 nenge ongombe yimwe.
“Okulanditha huka olundji ihaku lopotwa nenge ku pewe epitikilo lyoCommunal Land Board. Noonzapo tadhi ulike kutya ongoye mwene gwevi ndyoka olundji ihadhi gandjwa kaalandi,” Boois ta ti.

Shi ikwatelela koveta yetalululo lyevi, ano oCommunal Land Reform Act, evi alihe lyopamuthigululwakalo olyi li momake gepangelo, noli na okulongithwa pamukalo ngoka tagu kwatha aakalimo mboka haya zi miitopolwa moka.

Onkene, kape na omuntu gumwe a li e na okukala e na uuthemba okukala nevi enenenene, moka haye li tula menkolo nokutya eliko lyawo lyopaumwene, moka haya tindile yakwawo uulithilo.

Ashike epangelo olya mona kutya nonando pe na ompango noveta ndjika, elanditho lyevi lyoludhi nduka onkee lya vuka natango monooli yoshilongo osho wo mOkavango. Osha li sha monika kutya omalelo ogendji gwopamuthigululwakalo ohaga mono mo iiyemo mokulanditha evi. Omalanditho ngaka olundji ihaga lopotelwa omalelo gomavi gopamuthigululwakalo.
Elanditho lyevi ohali ningwa meholamo, nonando shi indikwa,”Boois ta ti ngaaka.

Elanditho lyevi ndika otaku popiwa lya vuka unene mOmusati, Oshana, Ohangwena, Oshikoto, Kavango West, Kavango East, Zambezi, Otjozondjupa nomaheke.

LEAVE A REPLY

Please enter your comment!
Please enter your name here