Euliko lyomoshilongo lyuunkulungu omwedhi twa taalela

0
14
Frans Uwanga, Gina Figuera, Helen Miller naSlick The Dick, mboka ya li taya popi pethimbo lyoonkundathana dhegandjomauyelele nkene aanduuluki yuunkulungu ye na okuhupa mehangano ndika

Pinehas Nakaziko

WINDHOEK – Ehangano lyoNamibia Arts Fair (NAF) otali dhana oshituthi shotango moshilongo sheuliko nelanditho lyiihongomwa yokoonyala yuunkulungu osho woo iikwayo ya yoolokathana, kutya oshi li metifa notashi ka ningwa pehulilo lyaJuli omvula ndjika.  
Ehangano olyo tuu ndika okwa li ishewe lya ningi oonkundathana dhegandjomauyelele kombinga nkene aanduluki yuunkulungu mwa kwatelwa aahikingalo naahondji yoonguwo, nkene ye na okuninga iipewa yawo okuziilila mokunduluka uunkulungu woludhi nduka, nokumona ekwatho lyopashimaliwa opo ya vule okumona uuhupilo tashi pitile muunongo wawo.

Shika oshituthi kwa li sha nana engathithi lyaaetipo yuunkulungu, osho woo aahikingalo mboka ya li ya hala okwiilonga noku uva nawa nkene ye na okuhupa moshituthi shoka sha etwa po kehangano olyo tuu ndika.

Lize Ehlers, Frank Ugwanga, Helen Miller, Gina Figuera naSlick the Dick, oyo aayetipo yuunkulungu wa yoolokathana, mwa kwatelwa mboka haya ningi iihongomwa yokoonyala, aahikingalo, osho woo aayolithi naanyandi moshilongo.
Oonkundathana ndhika kwa li dha ningilwa posenda yoGoethe moshilando okwa li oku ilongekidhila oshituthi shika kwa tengenekwa shi ka kale shotango tashi ka ningwa moshilongo, nankene aahongomwa naahikingalo mbaka ye na okulanditha uunongo wawo yo ya vule okuhupa moshituthi omo tuu muka.

Kakele kwaashoka, oshituthi shika sheuliko nelanditho lyuunkulungu otashi ka guma unene kombinga yokukwatakanitha aahikingalo, aanduuluki yuunkulungu, nankene ye na okulanditha noku ulika iilonga yawo mbyoka tayi hokitha.
Omukuluntu nomu etipo gwoshituthi shika, Ramatoulie Muhammed, okwa li a pandula ayehe mboka ya li ya holoka koshigongi shegandjomauyelele, ta ti shika osho oshinima sha pumbiwa moshilongo, nokutaambathana omayele oko ku li ekandulopo lyomukundu.
Samuel Matengu ngoka naye a li a holoka okwa li a pandula aanduluki yuunongo moshilongo, noku ya kumagidha opo ya tsikile okulonga nuudhiginini.

Okwati miigongi ya tya ngeyika oomoka taya vulu oku ilonga oshindji, mwa kwatelwa nkene ye na oku ulika iilonga yawo noku yi landitha moshilongo ashihe.

Okwa gwedha po ishewe ta ti peuliko lyiihongomwa mbika otapu ka kala mbyoka tayi ka landithwa kaanenentu, nondando yawo otayi ka kala ya londa noonkondo, oshoka oopelesenda 50 otadhi ka ya komahangano omayiyambi.  
Poshituthi shika otapu ka kala ishewe omainyanyudho ga kwata miiti, okuza kaahikingalo moshilongo ngaashi Miss H, Nga-I, Chantel, mwa kwatelwa Fire naJulio, mboka haya ningi uuhokololo.

Uutekete otau ka landithwa kooN$30, nomauyelele ogendji otaga ka adhika kepandja lyawo lyoFacebook lyoNam Art Fair.

LEAVE A REPLY

Please enter your comment!
Please enter your name here