Omukwa omuti gwa dhinika, ihe ogu na oshilonga

0
165

Loide Jason

WINDHOEK – Omukulu gwonale okwa ti mokahwa wa dhina omo ngaa mu na ndimba, shika otashi kolekwa sho Kundana a tseya kutya nani omiti dhedhina omikwa moshilongo odho oonkulu muuyuni nohadhi longithwa woo okuteleka etete, okuninga ooshako noshowo iimpungulonga yilwe yi ili noyi ili.

Omapekaapeko ngaka oga li ga ningwa unene komikwa ndhoka dhi li momudhingoloko gwaTsumkwe moshitopolwa Otjozondjupa, noshowo Otsandi, Onesi nOutapi moshitopolwa shaMusati.

Omanongononi ngoka oga li ga tamekwa momumvo 2012 noga li ga tamekelwa komukwa ngoka gwedhina Nyae Nyae ngo gu li koTsumkwe noya li ya kutha ko uutopolwa mboka w aka ningilwa omalolelo komashina nosha li shu ulike kutya ngoka ogwo omuti omukulu muuyuni koonono.
Aanongononi oya kala nokukonenena omiti ndhika ominenenene nomikulukulukulu moSouth Africa, Namibia, Zimbabwe naZambia okuza mo2005. Ngashingeyi oya mona kutya hetatu dhomomikwa ndhoka ominene, nantano dhomwaandhoka hamano oonkulu odha sa, nenge oshitako shawo shoka oshikulu nenge oshinene osha ndonyoka nenge sha sa.

Pokati komumvo 2005 no2017, aapekaapeki oya mono kutya omiti ntano odha si moSouth Africa, ne moNamibia, ndatu moZimbabwe, osho wo omuti gumwe gwa si moBotswana, Mozambique nomoZambia.

moNamibia, omuti gumwe gwomwaandhoka dha sa ogwo gwa li gu na oongamba oonene dhi vule adhihe dhi li 60 lwaampoka hadhi adhika moAfrica. Gu na uule woometa 30,2, omuti nguka gwa lukwa Holboom, okwa li wo gumwe dhomwaandhoka oonde noonkondo notaku tengenekwa gwu na oomvula 1700. Omuti ngoka ogo gwa kulupa gu vule oonkwawo, ogwa li gwa ndonyoka nokugwa po mo 2010/11, nogwa li tagu ithanwa Panke nogwa li moZimbabwe, taku tengenekwa gwa kala ko uule woomvula 2 500.
Miilongo yilwe omiti odho tuu ndhoka ohadhi longithwa onga onzo yomeya kaantu mboka ye li momihoko ndhoka natango dha dhama moonkalo dhawo dhopamithigululwakalo.

Omafo nomidhi dhomiti ndhoka ohadhi longithwa okupanga omikithi dhi ili nodhi ili ngaashi  asthma, osho wo okukeelela oomwe, noshowo oonkalo yiipa mbyoka yi na uumbanda woonkalo dhontumba .
Miilongo yimwe ngaashi America omafo gwomikwa oga taambwa ko nawa. ngaashi iikwamboga iikwawo mboka aniwa yina uundjolowele.
Shika oshe ya puuyelele sho aanongononi noshowo aapekaapeki yomauyelele mboka ya taalele po oshilongo shetu ya shanga omulombopititithi tagu hololola ngaaka.

Sho Kundana a ningi omapekaapeko okwa li a gongele uuyelele kutya omidhi dhomakwa ndhoka hadhi adhika meni lyiipeta nuusila noshowo oontanga ohadhi longithwa okuninga ooshako dhokukwatelwa.

Omanga gumwe gwomaakulu yonale ngoka a popiwa naye ku Kundana ihe ina hala edhina lye lyi tumbulwe a ti kutya omakwa oga kala nokulongithwa oku teleka okatete koshuumbululwa hoka aniwa ke na omulyo kamana.

“Omakwa ohaga ningwa okatete hoka okawanawa mokulya ihe kake na naanaa ondjako. Ngele oka liwa kokanona okashona nena konima yethimbo efupi nena oke na okukala ishewe ka sa ondjala. Kake na uuwinayi washa ihe kake na ashike ondjako,” osho etungwa lyasiikilila ombepo lya hokololele Kundana.

Nguka okwa tsikile ko woo kutya opo aniwa okatete hoka ka kale okawanawa noonkondo, omuntu oha lala nduno a nengeka omakwa ngoka , opo ngula sho ta ka teleka omidhi odha za kumwe nuusila opo dhi vule okukuthwa mo oshoka ngele okatete oke na omidhi nena ita ka ende po nawa pothigo.

Omuntu aniwa oho kutha nduno omeya ngoka ga hogololwa omidhi e taga tulwa peziko mo otamu tulwa nduno uusila e ta pilula ngaashi naanaa iiyumbululwa iikwawo.

Shoka ishewe hashi longithwa okuzilila momakwa moka ooshoka kutya omidhi aniwa ndhoka ohadhi toolwa tuu nawa e tadhi falwa komashina opo dhi vule oku ningwa omahahi.

Shoka woo tashi nywitha omakutsi kombinga yomakwa ooshika kutya oontanga dhomikwa woo ohadhi longithwa woo okuninga omagadhi ngoka woo haga longithwa iinima ya yooloka mwa kwatelwa uunamiti kwaamboka ya hakukilwa kuuvu wontumba.
Ashike aanongononi mboka ya talele po omikwa moshillongo oya holola kutya aniwa omukwa ngoka gu li mOnesi ogu na iitayi yi li ihetatu naanguka ogwo gumwe gwomomikwa ndhoka tadhi ulike uukuluntu womuti.

Okuza omumvo 2016, omukwa nguka ogwa tameke tagu gu iitayi lwiikando yi li ine noshitayi oshinene osha gwiliila po thiluthilu niitayi yagwo yi li iitano mbyoka yali ya hupa po woo oya gwa po thiluthilu muNovemba omumvo gwa zi ko.
Omuti nguka ohagu pungula omeya, nohagu gandja iipalutha kaantu niinamwenyo. Omafo gomukwa ohaga fulukitha nohaga liwa kaantu yamwe ngaashi naana omboga, nenge taga longithwa momiti dhopamuthigululwakalo, omanga omayula haga tsuwa nokuningwa oongodhi, iiyuma osho woo omagala.

Elalakano lyomapekaapeko olya li lyokutala nkene omiti ndhika hadhi ningi oonene. Aapekaapeki oya li ya longitha omukalo gwopaunongononi tagu ithanwa carbon dating, ngoka hagu kwathele okumona oomvula dhoshinima. Oya li ya kutha uupambu womayula komiti dha yooloka. Oya mono wo kutya oshitako shomukwa ohashi mene okuza komidhi dha yooloka ndele kagu shi ashike gumwe.

LEAVE A REPLY

Please enter your comment!
Please enter your name here