Ondangwa Masters ya sindana po oSocial League

0
17

Maria Namupala

ONDANGWA – Konima sho kwa li kwa tamekithwa edhingoloko lyotango lyuudhano wokatanga kokoompadhi kaadhani aakulu, ehuliloshiwike lya zi ko olya li lyopandjokonona mondoolopa ndjoka sho ya fumvike onkolo edhingoloko ndyoka.

Osipana yOndangwa Masters oyo ya sindana po ekopi lyuudhano mboka, sho ya dhenge mo konyala oosipana adhihe dha kuthile ombinga medhingoloko ndyoka, noya ulike uunyakwa wayo nokuya pombanda niitsa oyindji.

Omudheuli gosipana yOndangwa Masters Johannes Natangwe Kambonde ngoka a tseyika nawa nedhina Couch Muhalili okwa ti edhingoloko lyuudhano mbuka olya dhanwa oshikando shotango, mono lya li lya tameke muJuli nuumvo, nosheeta uudhano mboka pehulilo ehuliloshiwike lya piti.

Ta gwedha po kutya uudhano mbuka owa li wa kwatelwa komeho nomadhiladhilo oga li ge etwa po kosipana yomenzulonkalo lyondholongo mOndangwa, nolundji owa kala hawu dhanenwa pokapale kawo mpoka.
“Kasha li oshipu okukutha ombinga medhingoloko ndika molwaashoka omwa li oosipana hetatu dhomanyakwa, nodhaadhani mboka ye ya nale mowela mokatanga kokoompadhi, oliha yetu oya kala tayi pula nawa komeho naadhani ayehe oya kala mombepo ombwaanawa noyelongelo kumwe,” Muhalili tati.

Okwa ti osipana yawo oya kala tayi ningi shanamutango, nokwa kala e na eyinekelo maadhani ye, shoka she ya pe ompito ya dhane edhingoloko lyahugunina nospana yomanyakwa yOndangwa Legend, ashike oya dhengwa nomiiyagaya.
Molwaashoka uudhano mboka ohawu dhanwa taku talika kiitsa mbyoka osipana yi na shi ikwatelela kiitsa nokookoola oshowo omasindano, Ondangwa Masters oye ya yotango taku landula osipana yaalongi ,Oshikoto AmaTeachers, nadhimwe dha landulathana omuhukilila.
Dhimwe dhomoosipana ndhoka dha kuthile ombinga ongaashi osipana yaaniilonga moShoprite mOndangwa, KK Palace, Oluno AmaTeachers nadhilwe woo. Muhalili okwati oliha ndjika oyali ya totwa po nelalakano lyokuhanganitha nokweeta aadhani aakulu pamwe, yo ya tsikile noshipewa shawo shohokwe yuudhano.

Okwa gwedha po kutya shika hasho tashi kala oshikando shawo shotango taya dhana edhingoloko ndika, ashike okuuvaneke tawu kala tawu dhanwa omumvo kehe.

“Etameko aluhe moshinima nenge moshinyangadhalwa kehe ohali kala edhigu, nonkene molwaashoka opo twa tameke nomakwatho oga kala taga nyangwanyangwa, moshiluku muka otwa pewa owala ekopi, noombandi, ashike moshikando tashi ya otwi inekela kutya otatu kala twa mona omakwatho mpaka naampeyaka,” ta gwedha po ngaaka.

Ta tsikile ko kutya oya hala oosipana odhindji dhi kuthe ombinga omumvo twa taalela, yo ya kale taya nyanyukilwa pamwe, molwaashoka omudhani gwetanga lyokoompadhi omudhani owala kutya otashi pula shike, tati uudhano wawo olundji ohawu dhanwa momahulilo shiwike uuna aantu ya vululukwapo kiilonga mbyoka yak ala yena omukokomoko goshiwike, nokwa pandula eitulemo lyaadhani ayehe ya kutha ombinga.

Nonande ya fumvike onkolo omumvo ngoka, okwati otaya ilongekidhile nokweetapo omathaneko ga nkene yena okuhumithakomeho omuthika gomaudhano monooli yoshilongo, no taya pula moshigwana aanangeshefa yeya yambidhidhe nokuya monena omakwatho, opo ya kale taya gandja omasindano omanene kaasindani monakuyiwa, yo ya tsikile nuudhiginini ngaashi shili shimwe shomiilalakanenwa yawo.
Okwa gwedhapo kutya monakuyiwa oya hala woo ya kale nomaudhano galwe ngaashi ovolleyball netanga lyomokambamba lyaakadhona, yo taya kala taya tsaathana omikumo ya yambulepo omaudhano momidhingoloko dhawo.

LEAVE A REPLY

Please enter your comment!
Please enter your name here