Oshilongwa shuunangeshefa sha patulula omeho gawo

0
35

Maria Namupala

ONDANGWA- Aalongwa posikola yoHeroes oya holola kutya oshilongwa shuunangeshefa osha patulula omeho gawo, nongashingeyi oyuuvite ko uunangeshefa noyendji oye na ehala okupatulula oongeshefa dhawo uuna ya mana omailongo gawo.
Osikola ndjika oya li ya longekidha esiku lyowina lyuunangeshefa, moka aalongwa yondondo onti-9 nontimulongo (10), ya li ya gongala nokulanditha uushikependjeweo wawo.

Aanasikola posikola mpoka oya ungu mpoka nokulanditha iinima yawo pehalandjandja lyosikola, nokuulika uunongo wawo muunangeshefa, ngaashi osho shi li elalakano lyoshilongwa osho tuu shoka..

Omulongi goshilongwa shoka posikola mpoka Helvi Ndjembo okwa yelitha kutya omumvo kehe ohaya unganeke esiku lyowina lyuunangeshefa, moka aalongwa haya kala taya landitha nokuulika nkene ye na ontseyo yawo yoshilongwa shoka.
Ndjembo ta ti konyala sho oshilongwa shoka shoEnterpreneurship she ya momusindalongo, oosikola adhihe moshilongo odha li dha tsuwa omukumo dhe ete po esiku lyowina mono taya kala taya dhana nokutyapula esiku lyuunangeshefa.

“ Otwa li twa pula aavali ya gandje sha kuunona opo wu ye wu landithe wo wu tale nkene omalandithilo haga kala, otandi pandula aavali oshoka oyendji oya li ya gandja kuunona iilandithomwa noya li ya landithwa po”, Ndjembo ta ti ngaaka.
Ta tsikile ko ta ti omalandithilo ngano ogopandjokonona oshoka oga li omanene okweelekanitha naangoka haga ningwa koondoolopa odhindji moshilongo. Ta ti aanona oyi itula mo moshilongwa shoka, aalongi oya li ya eta aanona yawo noya kala taya ulikile nkene iinima hayi landithwa.

Osha ningi omukalo ndjigilile naalongwa oya kala haya kutha ombinga mesiku ndika. Aalongwa posikola ndjoka oya li yu unganeke iinyangadhalwa ya yooloka, ta ti ohashi kala oshiwanawa opo aalongwa ya faathanithe shoka haya longwa mongulu opo woo ya kambadhale ngele taye shi eta pondje yongulu.

Ku yamwe mboka twa yi moonkundathana nayo posikola noye li aalongwa mpoka oya yelitha kutya oshilongwa shika otashi ya tsu omukumo noku ya longa nkene ye na okutota po oongeshefa dhawo, nokutya ethimbo lyokutota po ongeshefa ongaashingeyi.

Tiina Itana oku li omulongwa mondondo onti-9, okwa ti oshilongwa shika oshe mu longo oshindji unene ngaashi okukwata nawa iimaliwa ye, nonkene e na oku yi pungula uuna a likola. Okwa ti manga inaa longwa oshilongwa shika ka li eshi kutya uunangeshefa oshike, ashike ngele okwa pulwa ngashingeyi ota vulu okuyamukula a manguluka molwontseyo ndjoka a pewa komulongi gwe.
Albertina Enos naye omulongwa mondondo onti-10, okwa yelitha nkene oshilongwa shoka sha patulula omeho ge, nokwa ti oku na ehalo okupatulula ongeshefa ye uuna a mana eilongo lye.

Ta ti oshilongwa shoka oshe mu kwatha noku ya ulikila ondjila yuunangeshefa, molwaashoka ngashingeyi oku shi kutya oongeshefa ohadhi koleke eliko lyoshilongo, lyi kale lyi li pombanda.

Olinda Chipunga okwa popi kutya ngaashingeyi oku shi okuyakula aalandi, nonkene ta vulu oku ya shendja uuna ya gandja oshimaliwa oshindji, ta ti kakele kwaashoka oku na euveko ewanawa nokwa hala a mane eilongo lye a vule okupatulula ongeshefa ye.
Chipunga ta ti pethimbo ndika oha landitha uushikependjeweo we pegumbo mboka ha landelwa kaakuluntu ye, ngaashi uuleke, uumbisikiti nayilwe oyindji yopakathimbo. Ta gwedha po kutya shika osha pupaleke onkalamwenyo ye.

LEAVE A REPLY

Please enter your comment!
Please enter your name here