Aanamibia ye shi enditha nawa kuudhano womartial arts

0
27
Sensei Lesley !Hoaeb (kolumoho) naUshidoshi Delano Müller nomakopi ngoka ya li ya sindana koBrazil.

Komutoolinkundana

WINDHOEK – Lesley !Hoaeb naDelano Müller Aanamibia yaali mboka ya li ya kutha ombinga muudhano wuuyuni womartial arts moAtlanta, USA, noya li ye shi enditha nawa. Nonando !Hoaeb a li a kanitha epapa lye lyuuyuni kiitsa, olugodhi olwa li talu popiwa kutya olwa li lwa kwata miiti. Okwa kanitha uudhano we kenyakwa lyaGermany lyoTaekwondo, Johannes Gottwald. Muudhano mbuka womartial arts aadhani ohaya thangathana, taya ipe dhopomeho, oku inwa po ondjumbu, okwiipa omankawa osho wo okuthindilathana pevi sigo taya vulu okukala itaya inyenge. !Hoaeb oku na epapa lyoSensei, shahala okutya okwa adha pamuthika guulongi muudhano mbuka. Muller oku na epapa lyoUshidoshi, shoka tashi ti nonande e li omulongwa, okwa adha onkatu yeuhumbato lyonawa moka ta vulu okukala omulongi gwopevi nota vulu okukala omulongi uuna omulongi kee po.

Müller, ngoka e na ondjundo yookilohalama 52, okwa li a sindana po epapa lyuuyuni moshiviha sho-RCFAI sho a dhenge mo Oscar Solache, ngoka ha vihi ookilohalama 65. Muller naSolache ayehe aakondjeli yepaya eluudhe muudhano. !Hoaeb okwa tegelelwa a ka dhanunune naGottwald omumvo tagu ya, opo ku talike ngele ota vulu okusindana epapa lyuuyuni. !Hoaeb naMuller ayehe oya li ya kutha ombinga methigathano lyoJiu-Jitsu moAtlanta moka ayehe ya li ya sindana oombandi dhoshingoli.

“Omanyakwa ngaka gaali oga li ge na elago lyokutsakanena naGary-Lee, ngoka a li e ya shangele etumwalaka lya sheywa,” osho ehangano lyoNamibia Kick Boxing Federation lya ti ngaaka. Gary-Lee omudhani gwiinyandwa a tseyika nawa mokafeelema Sidekicks, okwa tseyika wo koopolohalama yoko-Tv Black Belt Tv.

Okuza ko-USA, !Hoaeb naMuller oya li ya yi koBrazil momasiku 22 Juni moka ya li ya kutha ombinga methigathano lyoEscola de Jiu-Jitsu, ndyoka lya li moPort Alegre. Aadhani ayehe oya li ya sindana miiviha yawo noya li ya pewa omakopi koAZ Behring International. Mo24 Juni oya li ya kutha ombinga moGladiator Jiu-Jitsu Internanal Championship, moka !HOaeb a li a sindana po ombandi yoshikushu muudhano wawo naGabriel Delgado noshikushu moAbsolute Champion muudhano naVinicius Chaves Pereira. Muller okwa li a sindana po oshisiliveli nomukuthimbinga a za ko Uruguay. Aanamibia mbaka yaali oya li oshitopolwa shosipana Behring International noya sindana omakopi.

Muller okwa li natango a hiywa a ka wayimine Abu-Dhabi Grand Slam World Tour mo 2019. Ota ka kwashilipalekwa etata sho ta ka ya kuudhano mbuka.

!Hoaeb naMuller oya hiywa yi ki ilongekidhile uudhano wawo nomudheuli gwojudo Antonio Carlos Pereira, ngoka oye ha dheula osipana yaBrazil yojudo.

“Shika osha li oshiningwanima shopandjokonona moNamibia, sho aanamibia ya li inaaya kutha nando ombinga nale moJiu-Jitsu yaBrazil menenevi lilwe nando onale. Muller ngashiingeyi oku na epapa lyoSub-Saharan nota ka gamena epaya lye pethigathano lyoDesert Storm, ndyoka tali ka kala ko momasiku 28 no29 gaSepetemba moNamibia. Ope na aakondjithi yaali ngashiingeyi, gumwe a za koZambia nagumwe a za koZimbabwe, mboka ya hala epaya lye.

LEAVE A REPLY

Please enter your comment!
Please enter your name here