Iilambo ya fulwa omavi tayi faalele oomwenyo dhaantu

0
86
Olutu lwaSakeus Sheefeni ndoka lwa yulwa mokatale kaakwashigwan nonete.

Victoria Kaapanda

ONGWEDIVA – Aakwashigwana komikunda oye li ya manga uukuni taya kondjitha aalandithi yomavi gokutunga mboka taya ti ohaya fulu omalambo nuuhasha, nokuthiga po omatale ngoka ga nika oshiponga kaantu nokiinamwenyo.
Otaku hokololwa aantu oyendji ya kanithila oomwenyo dhawo momatale ngoka ga hupwa inaaga thigwa wo tuu nando omituntu nenge omandhindiliko ngoka taga ulike kutya pokuma opu na etale.

Oshiningwanima oshitalalatalala ooshika sha faalele omwenyo gwomulumentu omunamivo 45 gwomomukunda Okaandja mOngwediva, ngoka anuwa a ka monika owala konima yomasiku gatano sho aanegumbo taya kwathelwa kaantu yamwe yopomukunda ya tokola okuneta okatale kamwe kopomukunda sho ya ningi omasiku yaahe mu wetu.

Otaku fekelwa omulumentu gwedhina Sakeus Sheefeni a kana ondjila ye yokegumbo, ee ta ende sigo omokatale hoka kaake na oontunu.
Nakutha po oshilambo shoka anuwa ke shiwike po naanaa pomukunda mpoka, ashike okuza owala sho okatale hoka ka hupwa, aanamukunda oya kala nokupopya taya pula opo andola a ninge nawa oshilambo she, e shi tule ngaa nando omondhalate, ihe inaya pondola sha.
“Paife tse inatu hale we a tule okatale haka mondhalate, otwa hala owala a file po oshilambo she,” osho Petrina Hangula a ti.
“Shimpa owala tu li momangumbo moka omuntu owi ikwata owala pomutima, ino hala nando uunona u ku ze momeho, shaashi owa tila kutya pamwe otau ka dhana wa uka kokatale,” Nashooshiwa Sheefeni ta gwedha po.

Aakalimo mbaka otaya hokolola kutya pethimbo lyomuloka ngele omvula ya loka ohashi kala oshidhigu ukutongolola mpoka okatale hoka ka gama.

Mwene gwomukunda gwaKaandje Onesmus Namulo okwa ti okwa li a popi nomuntu ngoka a hupa po okatale hoka, e mu pula andola e ka tule mondhalate ihe shoka inashi ningwa.

Omwedhi gwa zi ko aanamukunda yopEkamba oya li ya nyolele kombelewa yoshilolongo shUukwambi taya nyeyeta omatale ngoka taya ti oga fulwa unene pooha dhomagumbo.

Aakamba oya ti ondama ndjoka oya lya wo iinamwenyo yawo.
Ashike Omupopiliko gwUuministeli Womudhingonoko nOmatalelopo Romeo Muyunda okwa ti, oveta oya yela ngele tashi ya kokufula iilambo mokati kaantu.

Ta ti aakuthi yomavi mboka oya pumbwa oku kala haya file iilambo yawo nongele oya ndopa okulandula omilandu, otaya ka kuthilwa oonkatu dhopaveta.

LEAVE A REPLY

Please enter your comment!
Please enter your name here