Okudhimbulukwa Patrice Lumumba, OmuAfrika ketindi

0
42
Patrice Lumumba esiku DRC a mona emanguluko kuBelgium ye ta gana a ninge omupirima gwaCongo.

Komutoolinkundana

WINDHOEK – Oshiwike sha za ko Belgium okwa li a kumitha uuyuni sho a li a lukulula ehala limwe lyaayehe Patrice Lumumba. Shika oshikumithi oshoka oshilongo shika osho sha li sha tula Lumumba mondholongo konima Lumumba sho a ningi omupreidente gwa- Democrtaic Republic of Congo (DRC), shoka sha li shimwe shomiilongo mbyoka yina uuyamba kamana, noya li ya yambidhidha eumboko koshipundi shoka sha li sha eta sigo omeso lyaLumumba

Okudhimbulukwa evalo lye, ndyoka lya li ko momasiku 02 Juli Aabelgium oya lukulula Square du Bastion ya ningi Patrice Lumumba. Ehala ndika olyo lyi na ondjila ndjoka yu uka koMatonge, moka mu na Aacongo oyendji, nomOlyomakaya osha li naana oomvula 58 sho Lumumba a li a tseyitha emanguluko lyoshilongo she.

Ashike aayambidhidhi mboka ya li ya nyanyukwa mOlyomakaya oya holeke ekwatahthano pokati kaBelgium naangoka a li nale oshikolonyekwalongo she. Epangelo lya Belgium mushoka sha tseyika ngashingeyi onga DRC oshinima hashi eta uumbanda, Aabelgium oyendji oye na omukulu gwonale gwawo gumwe a dhana onkandangala muukoloni waCongo, naBelgium okwa zimina pambelewa kutya medhipago lyaLumumba oku na mo olunyala.

Lumumba okwa li oye omuprima gwotango a hogololwa paudemokoli, ashike konima yiiwike 12, omukolonyeki Belgium okwa kwathela oku mu umba ko koshipundi kwa homatiwa.

Lumumba okwa li a valwa Patrice Hemery Lumumba, momasiku 12 Juli 1952 momukunda Onalua moshitopolwa shaKasai, mushoka nale sha li shi shiwike onga Belgian Congo. Konima sho a hiti osikola yongeleka, Lumumba okwa yi a ka longe koKindu Port-Empain, okwa tameke wo okushangela uutewo nomatotwahokololo kiifokundaneki yomoCongo. Pethimbo limwe okwa li wo a longo onga omunambelewa gwomopoosa, nokwa li a ningi omuyaluli gwiiniwe mopoosa yi li moStanleyville (ngashingeyi Kisangani). Mo 1955 Lumumba okwa li a ningi presidente gwopashitopolwa gwehangano lyaaniilonga yepangelo lyaCongo ndyoka lya li inaali yama komahangano gaaniilonga gaBelgium ge li gaali (Socialist noRoman Catholic).

MuKotomba gwo 1958, Lumumba, pamwe naaleli yalwe yaCongo, oya li ya toto Congolese National Movement (CNM) ongongundu yopapolitika yaantu yomoDRC. MuDesemba okwa li a hiti Oshigongiilonga shAantu ayehe aAfrika (All African People’s Conference) moAccra, Ghana, moka a li a tsakanene naahwahwameki yemanguluko ya za moAfrica nokwa li a ningwa oshilyo shehangano tali kalelele sha totwa po komutumba nguka.

Monkambadhala yokungungumaneka onkalo yopolitika yomoCongo, epangelo lyaBelgium olya li lya tseyitha opolohalama yi na elalakano lyoku ukitha kemanguluko lyaCongo, tayi tameke nomahogololo muDesemba 1959. Ongundu yaLumumba oya li ya sindana omahogolololo noopelesenda 90, shoka Aabelgium kaya li ya tegelela nando. MuJanuali 1960, epangelo lyaBelgium inaali hala okupulakena komawi gaantu mboka ya hogololola ongundu yaLumumba, olya li lyi ithana omutumbiilonga koBrussels moBelgium shoongundu adhihe dhopapolitika mo-DRC dhi ki ikunde onakuyiwa ya-DRC. Shika osha ningwa nonando ongundu yaLumumba yo-MNC, oya li ya sindana po omahogolololo noopelesenda 90 muDesemba.

MNC oya li ya tindi okuya komutumba ngoka pwaa na Lumumba, ngoka muJanuali a li a umbilwa mondholongo, oshoka aayambidhidhi yongundu ye oya li yi ipumu mumwe noongundu dhilwe kombinga yaBelgium sho a tindi okutaamba ko iizemo yo-MNC.

Belgium okwa li a mangulula Lumumba a ka hite omutumba nguka, moka kwa li kwa tokolwa ku ningwe omahogololo galwe muMai opo DRC a mone emanguluko lye mo30 Juni. Natango MNC naLumumba oya sindana po omahogololo, naBelgium ka li e na nkene kakele kokupula Lumumba a tote po epangelo lye epe lya manguluka.

Okuza esiku ndyoka iinima oya tameke tayi ende nayi. Belgium, Amerika niilongo yilwe yaEurope mbyoka ya li tayi li nawa moCongo kaya li ya hala Lumumba a lele oshilongo. Shika omolwashoka osha li sha yela kutya ita ka longela kumwe nando naakolonyeki ye. Lumumba okwa kala nokulombwela aakolonyeki olundji kutya: “Tse katu shi aakomunisi nenge aakatoolika.
Tse Aafrika twa hala emanguluko,” Lumumba okwa li ompinge netopolo lyi ikwatelela kuukwaamihoko, okwa tungu Congo lya hangana, nonado pwa li pe na oyendji ye li ompinge nasho.

Pethimbo ndika Amerika okwa li i itula mompito ombwaanawa yokulya oonzo dhopaushitwe dhaCongo, sha landula elongitho lyouranium ndjoka ya zi moomina dhomoCongo okulonga iilwitho yotango yolute yaAmerika, oomboma ndhoka dha longithwa moHiroshima noNagasaki moJapan. Netameko lyiita iitalala, osha li sha simana opo Amerika pamwe nookuume ke ya kale inaaya ilongekidhila Afrika ya kale ye na ewiliko lyoonzo dhaAfrika, oshoka oya li ya mbandapala oonzo ndhika dhi gwile momake gwomutondi gwawo Soviet Union.

Ashike omukumo gwaLumumba oku adha emanguluko lyoshili osho wo okukala e na oonzo dhaCongo momake ge opo e dhi longithe okuyambula po onkalo yaantu yetu osha li sha talika ko onga oshinima sha nika oshiponga kuAmerika, Belgium osho wo iilongo yilwe. Opo ye mu kondjithe, Amerika naBelgium oya longitha iilwitho ayihe ye na, mwa kwatelwa iilyo yOngundu yopIigwanahangano (UN) opo ya lande eyambidhidho kaakondjithi lyaLumumba, osho wo okukuta aantu ye mu dhipage. Iilongo mbika iinankondo oya li ya landa oonkondo dhuungundu wulwe uushona mboka wa kanitha omahogololo osho wo ookomanda yetanga lyegameno, mboka ya li ya yi ompinge nepangelo nokukutha ko oshitoplowa shoonzo kamana Katanga onga oshilongo shi ili moDRC.

Onga omuprima omupe, e li ashike mombelewa oomwedhi inadhi adha pumbali, Lumumba okwa li a indile ekwatho koUN yi tume omatanga opo ya kwathele oshilongo. Lumumba okwa li wo a hala aakwiita yaBelgium ya thige po oshilongo, oshoka ngashingeyi oshilongo osha li sha manguluka na ka sha li we sha pumbwa omatanga gegameno giilongo yilwe mevi lyasho. Ashike o-UN oya li kohi yewiliko lya-Amerika. UN ina tuma omatanga. UN ina tidha mo omatanga gaBelgium moCongo. Konima yoomwedhi ne mombelewa onga omuprima gwotango gwaCongo a manguluka, etanga lyaakwiita ye li kohi yekomando lyakakukutu komatanga Joseph Mobutu Sese Seko olya li lyu umbu ko Lumumba koshipundi onga omuprima. Aakwiita yaMobutu oya li yakutha ko oonkondo adhihe dhokulela aniwa opo ya kaleke po ombili moshilongo. Lumumba okwa li a yi ontuku okuza moshilandopangelo Kinshasa a ya koKisangani, hoka UN a li e na aakwiita nokwa luka ota ka gamenwa.
Aakwiita yaCongo, mboka ya li ye na uuyelele wa za koondaadhi dho-CIA, oya li ye mu kwata manga e li mela lyondjila noku mu manga po momasiku 02 gaDesemba 1960.

Okwa li a endithwa a mangwa, a kwatwa po uule wiiwike, nokonima yethimbo a falwa momuthitu moka a li a dhipagwa kaakwiita yaBelgium.
Oshimbuluma shika oshiwineyi osha li ehulilo lyoonkambadhala dhedhipago tali wilikwa kuBelgium naAmerika, mboka ya longitha Aacongo yontumba osho wo etanga lyaBelgium lyokudhipaga opo ya longe oshilonga shika.

Ludo De Witte, omuBelgium ngoka a shanga okambo dhingi hoka taka hokolola edhipago ndika, okwa li a shanga kutya ndika olyo edhipago lya simana momimvo dhopethimbo ndika.

Okuza sho Lumumba edhipago nedhimepo lyaLumumba ndyoka aakolonyeki ya li ye wete onga einda enene mokutapula mo oonzo dhawo moCongo, oonkambadhala dhopaigwana odha li dha tulwa miilonga opo ku gandjwe oonkondo kwaamboka taya lele ya gama kaakolonyeki. Shika osha li shah ulu nokuhulitha po epangelo lya Lumumba moKisangani muAguste 1961, osho wo etopoko lyaKasai mo 1962 naKatanga muJanuali 1963. – Sha za moonzo dhi ili nodhi ili

LEAVE A REPLY

Please enter your comment!
Please enter your name here