Oveta ompe yokulanditha oombuto nokutonatela iikunino

0
27
Berg Aukas Youth Skills Training Centre, yi li moGrootfontein, oyo oshiputudhilo shimwe tashi dheula aagundjuka okulonga oombuto. Mefano ndika ekulu otamu monika omupresidente omukulu Hifikepunye Pohamba (pokati) ta konaakona oombuto ndhoka dha longwa koshiputudhilo shika. (Omafano: Nampa)

Komutoolinkundana

WINDHOEK – Epangelo otali nduluka oveta ompe ndjoka tayi ka pula aantu mboka haya landitha nokulanda oombuto pamukalo gokutaambathana niilongomwa yilwe nayo oye na okwiishangitha onga aashingithi yoombuto.

Shi ikwatelelwa koveta ompe ndjoka ya thanekwa, oongeshefa ndhoka tadhi ka landitha oombuto naandhoka tadhi ka longa niikunino tayi landitha oombuto koshigwana, tadhi ki ishangitha nokupewa tango nuuministeli wUunamapya. Oveta ndjika otayi ka pula wo aanamapya naanafaalama mboka haa longo oombuto tadhi landitha koshigwana nayo ya kale ya shangithwa. Inashi tseyika natangao nkene oveta ndjika ompe tayi ka guma aanamapya yokuushayi mboka haya landitha oombuto uuna ya likola dha gwana momatala nomomahala galwe. Inashi tseyika wo nkene tashi ka guma aanangeshefa aashona mboka haya kunu omiti muukunino wawo uushona wu li konima yomagumbo gawo, osho wo iikuninino yamomikunda mbyoka hayi landitha uumuti noombuto nomo haya hupila moka.

Minista gUunafaalama Alpheus !Naruseb, okwa ti oveta ndjika yoombuto oyili natango ta yi longwa mo, na otayi ka kalela po okugamena aanafaalama Aanamibia, osho wo oshikondo shuunafaalama koombuto dhi na ongushu yi li pevi.
Otashi ka kwashilipaleka wo kutya oongeshefa itadhi ka landa omaludhi goombuto kadhi shiwike, osho wo omiti ndhoka tashi vulika dhi kale dha tulwa iilongitho yilwe yaashi yopaushitwe.

Edhilaadhilo olyo ndika kutya omuntu ngoka ta ka adhika ta teya oveta ndjika ompe ota vulu okupewa egeelo lyokufuta ooN$10 000 nenge ondholongo yuule woomwedhi inadhi konda oomwedhi dhi li 12, nenge a pewe egeelo lyofuto nondholongo.

Oveta natango inayi pita noyi li ashike ethaneko manga, oya pumbwa oku enda koshidhinditho shegumbo lyomutumba gwopashigwana.
!Naruseb ta fatulula kutya oveta otayi ka ninga eta miilonga euliko lyoRegistrar of Seeds and Seed Variety, osho wo yeinyolitho lyaalandithi mosho wo aatulungushu yoombuto moshilongo.

Ngashingeyi kapu na omaiyutho gokwiishangitha opo wu vule okulanditha oombuto moNamibia. !Naruseb ta ti shika osha eta uupyakadhi moka oombuto dhi na ongushu yi li pevi hadhi landithwa kaanafaalama, shoka hashi eta omangeshefelo ga nkundipala kumboka haya landitha oombuto dhi na ongushu shili moNamibia.

Ta fatulula kutya uuna oveta ndjika ya tulwa miilonga, otashi ka pula aalongi yoombuto naatulingushu yadho ya kale yi ishangitha opo ku kwashilipalekwe ongushu nokugamena aalandi ngele tashi ya koombuto dha yogoka, shoka tashi kakwathela okukeelela omikithi.
Mboka ye na iikunino, taya landitha omiti, oye na okukala yi ishangitha ku kwashilipalekwe kutya iikunino yawo oya adha tuu omuthika gwontumba ngele tashi ya kiikwa niipangitho, omutungilo, uunongo wopautekenika nowaantu mboka taya tonatele oshikuninino. Mongashingeyi kehe ngoka a hala ota vulu okukala noshikunino she, no mu na uukunino owundji moshilongo.

Kohi yewiliko lyoveta ompe, kape na oludhi lwombuto inaayi pitikwa mokafo kepangelo tayi ka longithwa muunafaalama, okukunwa nenge okutsikwa nando okomuntu gumwe kakele ngele ombuto yoludhi ndoka oya pitikwa pamushangwa.
“Uuna oveta ndjika ya pitithwa, kape na omuntu ta ka pitika a landithe, a taambathane, nenge a lande ombuto inaa ishangitha onga omulandithi gwombuto,” minista ta ti.

Oveta otayi ka eta po wo etotepo Okangundu kOoombuto moNamibia (Namibian Seed Council), okakomitiye komaludhi goombuto osho wo iilonga noonkondo dhawo, osho wo etotepo lyoNational Seed Varieties Register no Seed Certification Services niilonga noonkondo dhawo. Mbika otayi ka kwathela mokutula pamuthika ongushu yoombuto moshilongo.

Minista ta fatulula wo kutya kohi yoveta ompe kape na omuntu ta ka eta mo oombuto moshilongo itaadhi iyutha komilandu nodha shengelwa membo ndyoka tali utha dhi vule okukala dha etwa mo.

LEAVE A REPLY

Please enter your comment!
Please enter your name here