Aanona naya pewe ompito ya kuthe ombinga momaudhano

0
30

Maria Namupala

ONAMUKULO – Omuunganeki gomaudhano posikola yaNamukulo Lotto Nambandi okwa thamuna nkene sha simana, opo aanona ya kuthe ombinga momaudhano ga yooloka. Ndhika okwe dhi popi ehuliloshiwike lya piti sho osikola yawo yali yuunganeka edhigathano lyomaudhano.
Osikola ndjoka otayi adhika moshikandjohogololo Omulonga moshitopolwa shaHangwena, nohayi ungeke uudhano omumvo kehe moka haya hanganitha oosikola dhomomudhiingoloko, nuumvo uudhano wawo wokomumvo owali wa dhanwa ehulilo shiwike lya piti.
“Otwa li twa hiya konyala oosikola adhihe dhili miitopolwa yokonooli yoshilongo opo uunona wetu wuye pamwe wo wu tale nkene uudhano hawu dhanwa, otwali twa longekidha uudhano ngaashi etanga lyokoompadhi lyaamati oshowo etanga lyomokambamba, muudhano awuhe omwa kuthwa ombinga koosikola ntano (5),” Nambandi ta ti ngaaka.

Nambandi okwati oshili sha simana monkalamwenyo yokanona kehe opo ka pewe ompito ka kuthe ombinga muudhano mboka kehole, opo woo shi pupaleke uuluyi wako nokunyanyukilwa pamwe nooyakwawo yo taya ulike uunyangwa nuunkulungu wawo.
Ehuliloshiwike ndyoka opwali iiti tayi teka po kapwali mwali ta tumbu mukwawo molwaashoka kehe gumwe okwali ta lalakanene iikuthe kohi, ye amonike kutya nai oye enyakwa muudhano mboka.

Uudhano mboka awuhe owa fumvike onkolo osoondaha nometanga lyokoompadhi osipana yoskola yaImbili oyo yeya kadhenga noya pewa ekopi noshimaliwa shoo N$450, osikola yOnamutemo oyeya puutiyali omanga Onamukulo naye ati ita dhengelewa megumbo okweya puutitatu,
Muudhano wetanga lyomokambamba osipana yOnamutemo oyeya puutango sho ya dhengemo oosipana adhihe dha kuthile ombinga, tayi landulwa kosikola yaImbili nOnamukulo natango eya puutitatu.

Nambandi okwati otaya lalakanene okuyambulapo omuthika gomaudhano miitopolwa yokuushayi nokukwashilipaleka kutya aanona oya dheulilwa omaudhano ngoka yehole manga yeli moondondo dhopetameko.

Ta tsikileko ta pula aavali naalongi, ya gandje ompito kaanona ya kale taya kutha ombinga momaudhano, tati aanona mboka haya kutha ombinga momaudhano ohaya kuthwa mokulonga omiyonena, tati ohashi pupaleke woo uuliyi waanona nokuya kutha momapandaanda ya vule okutungapo omalutu gawo.

Nambati ta uvaneke kutya ngaashi shili oshilalakanenwa shawo otaya kala taya unganeke omaudhano gawo omumvo kehe, yo taya hanganitha aanona yaza koosikola dha yooloka moshitopolwa, molwaashoka mokati kawo omo muna aadhani yopashigwana monakuyiwa.

LEAVE A REPLY

Please enter your comment!
Please enter your name here